9.6 C
Pontevedra
Xoves, 28 de Marzo de 2024
Máis
    HomeO CondadoMondarizAugas de Galicia acometerá a reparación das sendas fluviais do Tea en...

    Augas de Galicia acometerá a reparación das sendas fluviais do Tea en Mondariz

    Na última sesión ordinaria do Pleno, a Corporación Municipal de Mondariz aprobou por unanimidade un convenio de colaboración entre o Concello e a entidade pública empresarial Augas de Galicia para a reparación das sendas fluviais dos ríos Tea e Xabriña que resultaron danadas polas riadas de 2016.

    O convenio, valorado en 86.964,93 €, foi pechado conxuntamente polos Concellos de Mondariz e Ponteareas nos últimos meses, despois de varios intentos frustrados de acadar un acordo. Augas de Galicia, que xa executara as obras de creación das sendas fluviais entre Mondariz e Ponteareas en 2013, farase cargo da reparación, eliminando elementos estruturais danados para devolver a un estado máis natural aquelas zonas da ribeira do río que se ven afectadas anualmente polas riadas.

    “Este convenio favorece a recuperación dos entornos naturais do río Tea e da desembocadura do Xabriña. Agardamos que estas obras de reparación poidan ser completadas este ano, preferiblemente antes do verán, xa que as sendas fluviais son moi importantes para promover a actividade física da veciñanza e o propio turismo de natureza en Mondariz”, comenta o alcalde, Xosé Emilio Barros.

    O mantemento e a limpeza da senda fluvial corre a cargo do Concello de Mondariz, que xa está planificando estas labores.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.