13.7 C
Pontevedra
Sábado, 18 de Maio de 2024
Máis
    HomeO CondadoMondariz BalnearioO BNG de Mondariz Balneario urxe ao Concello que atalle o "calamitoso"...

    O BNG de Mondariz Balneario urxe ao Concello que atalle o “calamitoso” estado do arborado municipal

    O BNG de Mondariz Balneario denuncia a desidia do goberno local ao non convocar a comisión de investigación sobre a caída da árbore que levou por diante a vida dunha veciña mentres decorría un evento cultural organizado polo Concello.

    5 meses despois do fatal suceso nos xardíns do Gran Hotel nada mudou no Concello Mondariz Balneario, o risco de que un acontecemento como aquel volte suceder segue estando vixente. A única medida tomada polo concello foi a de tallar parte das emblemáticas árbores do municipio, mais sen ningunha medida dirixida a reconducir o maltrato e as malas praxes no mantemento do arborado municipal, polo que a degradación sobre os restantes segue sendo unha realidade e o risco de que colapsen segue incrementándose cada día que pasa.

    Trala convocatoria dun pleno extraordinario a solicitude do grupo municipal do BNG no que, por unanimidade da corporación, se acordou a constitución dunha comisión de investigación, o alcalde da vila soamente convocou unha das tres xuntanzas acordadas. Colle lembrar que esta comisión recollía a participación de todas as partes implicadas no sucedido co obxectivo de clarexar responsabilidades, elaborar un documento conclusivo do que sacar ideas para mellorar a seguridade da vila, elaborar protocolos para o mantemento do arborado e, a fin de contas, devolverlle a tranquilidade á veciñanza e ás persoas que visitan a vila. A día de hoxe non se elaborou ditame algún, polo que de nada serviu o acordo plenario e a situación segue sendo a mesma que antes do suceso, co risco que isto supón para as persoas que desfrutan do entorno privilexiado que constitúe a vila balnearia.

    Desgraciadamente, tanto o grupo municipal do BNG en Mondariz Balneario coma os veciños, están afeitos a vivir situacións de desprezo por parte do rexedor municipal e os seus concelleiros, que incumpren de xeito reiterado os acordos plenarios. Mais non por iso deixaremos de denunciar as prácticas antidemocráticas e de baixeza moral deste goberno que, ante situacións de máxima gravidade, como a que estamos a tratar nesta comisión de investigación, tentan ocultar a súa responsabilidade, desacreditando a existencia da mesma e impedindo o seu normal desenvolvemento para que as partes implicadas poidan dar conta do sucedido.

    Dende o BNG esiximos unha vez mais a convocatoria das xuntanzas da comisión de investigación e a inmediata toma de medidas para reconducir o calamitoso estado no que se atopa boa parte do arborado municipal.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.