Balneario de Mondariz foi recoñecido nunha gala en Madrid co Premio Nacional á Excelencia Turística por tres séculos de historia termal desde que, en 1873, os irmáns Peinador fundasen a empresa e fosen declaradas de utilidade pública as súas augas mineromedicinais. Un galardón dentro da XXXII edición dos Premios Executivos que contou coa presenza de Ángel Asensio, presidente da Cámara de Comercio de Madrid, Manuel Gago, vicepresidente da Confederación Española de Directivos, a ex ministra Ana Mato, presidenta de AECEM e numerosas caras coñecidas da empresa española e sociedade madrileña.
Entre os galardoados, destacaron Vanessa Prats, vicepresidenta e directora xeral de P&G, Iberdrola, L’Oréal Group, Cupra, Michelin, Carrefour España e a Startup.Senniors. O Balneario de Mondariz non só é considerado pioneiro do termalismo nacional senón tamén un referente entre as principais vilas termais de Europa, e potenciador de destino turístico de Galicia. Sendo recoñecido o seu proxecto en diferentes premios nacionais internacionais, polas súas instalacións, equipo e innovación. Un traballo do seu presidente Javier Solano, que nestes 30 anos que se cumpren en 2024, deixou atrás o famoso incendio do Gran Hotel en 1973 que deixou a vila termal histórica no máis absoluto dos abandonos. Un proxecto de recuperación que lle valeu grandes logros e recoñecementos, entre eles “Mellor Balneario de España” nos anos 2005 e 2006, “Mellor Aloxamento de Galicia”, en 2007; e Conde Nast Traveler 2012 como Mellor Spa de España, ademais do Premio Nacional de saúde en 2017.
Na actualidade, Balneario de Mondariz está considerado como un dos motores máis importantes do rural galego que dá traballo directamente a 150 familias e ao redor de 300 familias dunha forma indirecta. Un desenvolvemento que enriquece toda a zona, sendo un exemplo de empresa que defende os recursos naturais galegos como punto de partida dunha actividade que innova en saúde, lecer, deporte e turismo.