13.7 C
Pontevedra
Sábado, 18 de Maio de 2024
Máis
    HomeLouriñaO Porriño'Para sempre, Malévich', baseada nun texto de Diego Giráldez, estrearase no Porriño...

    ‘Para sempre, Malévich’, baseada nun texto de Diego Giráldez, estrearase no Porriño e Tui

    Cando en febreiro de 2020 se daba no Porriño a claqueta final da rodaxe da curtametraxe ‘Para sempre Malévich’, pouco podían os seus responsables prever o que se lles viña enriba. O proxecto, que adapta a obra do escritor galego Diego Giráldez, tiña todo para funcionar: un elenco de contrastado talento, unha obra literaria detrás recoñecida por crítica e público, un proxecto de sensibilización arredor da diversidade funcional e unha listaxe de certames aos que se presentar. E chegou marzo e derrubouno todo.

    Da pandemia, o sector cultural e máis concretamente o audiovisual, posiblemente foron os máis afectados. Un impacto aínda maior, se cabe, no mundo da curtametraxe, xa habitualmente precario. E neste sentido, ‘Para sempre Malévich’ non era unha excepción.

    O proxecto, que comezou a forxarse en xullo de 2019, buscaba adaptar os textos de ‘Galería de Saldos’ de Giráldez e converterse ao mesmo tempo na ópera prima dos seus creadores: o director e guionista Antón Veiga e o director de fotografía Mateo Hernández.

    A obra que por fin se estrea conta con Iria Sobrado como actriz protagonista dunha historia na que a súa personaxe, a galerista de arte Mara, coñece a Berthram, un tratante de arte cego, quen é interpretado polo actor do grupo de teatro da ONCE Valacar, Felipe Cotelo.

    Making of realizado por Andrea Mariño, encargada da foto fixa durante a rodaxe

    Foi precisamente o compromiso dos creadores por contar cun actor invidente o que atraeu a atención dos medios no momento da rodaxe. E o que lle abriría as portas á obra para participar en festivais de curtametraxe de todo o territorio, pero poñendo un especial

    interese en Cans, que pechaba a súa inscrición a poucos días de se iniciar a rodaxe. Toda unha maratón de filmación en 4 días para chegar á data de peche de inscricións. E non exenta de contratempos, coma calquera rodaxe. O que, naquel momento, era o normal

    Banda sonora de Para sempre, Malévich, composta e interpretada por Eladio Santos

    A curta consegue, finalmente, chegar a pequenas salas de toda Galicia, adaptada a todos os condicionantes dos novos tempos:salas moito máis reducidas. Aforos moi acotados. Sen apertas nin bicos. Moi lonxe do que podían ter na cabeza cando comezaron o proxecto, pero pensando en que, se cadra, agardar máis para estreala lles roubase tamén iso.

    As estreas dan inicio, como non podía ser doutro xeito, no Porriño o día 20 de agosto no Pub Bumba, un dos escenarios da rodaxe nese xa, afastado febreiro. Continuarán o 21 de agosto en Tui, no Bar Pancho; o 26 en Santiago de Compostela, no Eme Club; o 27 en La Casa de Arriba de Vigo; e o 28 en A Coruña, na libraría Fiandón.

    Todo isto sempre que a pandemia o permita e non os persiga, de novo, a maldición de Malévich.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.