O Concello do Porriño acometerá a humanización da céntrica rúa San Sebastián. Concluída a humanización de Manuel Rodríguez e do tramo que enlaza con Fernández Areal, e para poder avanzar no acondicionamento dos barrios de San Bieito e San Sebastián, é prioritaira a humanización do segundo tramo desta rúa, dende o seu enlace coa Avenida Domingo Bueno ata a capela do mesmo nome, dado o deficiente estado que presenta na actualidade.
“A obra conectará coas de acondicionamento do parque do Campo da Feira que xa se atopa en execución e coas de humanización da rúa Parque Infantil que xa están proxectadas”, explicou o alcalde, Alejandro Lorenzo, “Esta é unha das actuacións que se inclúen no proxecto que temos para a que é unha das principais vías de acceso ao centro urbano, unha das nosas cartas de presentación”.
Tendo en conta as características desta obra a intervención dividirase en dúas fases de actuación. Unha primeira, a que se leva agora a pleno cunha inversión de 555.384 euros que abrangue dende Domingo Bueno e a praza de San Sebastián, e unha segunda entre a praza e a capela.