Oficina antiga do Consorcio de Augas do Louro
Co fin de facilitar a súa accesibilidade e localización, o Consorcio de Augas do Louro, anuncia o cambio de oficina de atención ao público no Porriño. Trátase dunha proposta e petición do presidente do Consorcio, Alejandro Lorenzo, de achegar máis se cabe ao cidadán estas instalacións, que sexan coñecedores da súa existencia e dos servizos que nelas se lles ofrece.
O Consorcio dispón dunhas instalacións para atender aos seus usuarios en cada un dos catro concellos que integra, Mos, O Porriño, Salceda de Caselas e Tui.
No caso do Porriño, trasládase a un local a pé de rúa, un baixo e non unha segunda planta como ata agora, preto da casa consistorial, concretamente no número 5 da rúa Antonio Palacios. O horario de atención ao público seguirá a ser o mesmo, de luns a venres de 09.00 a 13.00 horas.
En todas as oficinas das que dispón o Consorcio, os profesionais que están ao fronte ofrecen un servizo próximo ao cidadán, nun ambiente totalmente colaborativo. Nelas a veciñanza pode acudir para a realización de calquera das seguintes xestións: contratación do servizo de abastecementos e saneamento, cambio de titularidade do contrato, modificación de datos e domiciliación bancaria, tramitación de reclamacións, emisión de duplicados de facturas, solicitude de orzamentos de acometidas, baixa do subministro e resolver calquera outra dúbida ou xestión requirida polo usuario.