A Xunta activa o Plan Territorial de Emerxencias de Galicia (Platerga) co fin de ofrecer unha resposta coordinada ante a situación creada polo incendio dunha nave industrial no Porriño.
Así, no lugar do incendio, no Polígono da Granxa, están a traballar efectivos de extinción do parque do Baixo Miño e tamén dos máis próximos como son Vigo, Morrazo e Ribadumia, así como os membros do GES-SPEIS de Ponteareas e do GES de Mos.
Igualmente, vén de incorporarse o Grupo de Apoio Loxístico (GALI) da Axencia Galega de Emerxencias (AXEGA), que achega unha cisterna de gran capacidade.
Ademais, por precaución, está mobilizada unha dotación de Urxencias Sanitarias de Galicia-061, aínda que os traballadores e traballadoras da nave afectada están localizados e localizadas e en bo estado de saúde.
Pouco antes do mediodía, o 112 Galicia obtivo información sobre este suceso mediante as chamadas de alerta de varias persoas particulares, que observaban como unha columna de fume intenso saía dunha nave destinada ao subministro de maquinaria para perforacións e sondaxes. Esta instalación atópase á beira da PO-510, ao paso pola parroquia de Atios, no Porriño.
Alí acudiron, en primeira instancia, os Bombeiros do Baixo Miño e voluntarios de Protección Civil da localidade, ademais dos axentes da Policía Local e da Garda Civil. Sen embargo, a importancia da situación levou aos técnicos da Xunta de Galicia a activar o Plan Territorial de Emerxencias de Galicia para garantir a correcta coordinación dos distintos equipos e organismos necesarios nesta intervención.
