A Iniciativa Cidadá Tudense pola Vida en Paz e Liberdade fixo entrega o pasado venres ao alcalde de Tui, Enrique Cabaleiro, de toda a documentación reunida nos anos en que estivo en actividade, así coma da pancarta que empregaban nas concentracións que convocaban cada vez que se producía un atentado terrorista.
Agora será o Concello de Tui quen, tras dixitalizar todo este material, o remita ao Centro Memorial das Vítimas do Terrorismo situado en Vitoria. A copia dixital quedará no Arquivo Municipal de Tui.
Esta Iniciativa Cidadá comezou hai 25 anos con motivo do asasinato de Miguel Ángel Blanco, e durante unha década convocou concentracións de repulsa tras cada asasinato terrorista que se producía. A última foi en 2007. Pedro Souto xunto a outros membros da Iniciativa fixo entrega de todo o material ao Concello de Tui.
