A capacidade de traballo conxunto e transversal coas diferentes Administracións e a preocupación pola creación de espazos de convivencia e servizos para a veciñanza centrou a visita do secretario xeral dos socialistas da provincia de Pontevedra a Tui, onde David Regades puido coñecer de primeira man o proxecto de humanización da Avenida de Portugal, “un proxecto longamente reclamado e que durante moitos anos durmiu nos caixóns ata que os gobernos socialistas de Enrique Cabaleiro e Pedro Sánchez viñeron a reactivalo a través da cooperación”, explicou Regades, quen lembrou o compromiso adquirido polo Ministerio de Fomento este verán para a rehabilitación de medio quilómetro desta avenida cun investimento de máis de 750.000 euros.
“Durante moitos anos o Concello de Tui reclamou a Fomento a actuación nesta avenida, vía principal de acceso á comunidade desde o país veciño e que ademais é parte do Camiño de Santiago, pero mentres Rajoy estivo no Goberno nada se fixo desde o Estado, a pesares de que o Concello investiu na redacción do proxecto”, explicou o alcalde de Tui.
“Coa chegada de Pedro Sánchez ao Goberno, a situación desatascouse e Tui ten por fin o compromiso de Fomento de que se van facer as melloras recollidas no documento que presentamos”, explicou ao tempo que fixo fincapé no moito que se xoga Tui nestas Eleccións Xerais.
