Un total de 198 alumnos e alumnas e docentes de 4º de ESO do IES San Paio, do Colexio Maristas Santa María e do Seminario Menor San Paio asistiron esta mañá á proxección da segunda película do programa “O Cine nas Aulas”, no Teatro Municipal de Tui.
Con esta película traballarán sobre valores de igualdade, respecto ás persoas e non agresión baixo ningún concepto; drogas e submisión química.
O cine ten un indubidable atractivo para o público obxectivo deste programa, que é a mocidade. Pero, neste caso, non debe ser entendido como un mero divertimento, senón como a oportunidade de captar a atención dos máis novos e novas, apoiar a súa capacidade de reflexión e favorecer a análise e a crítica dos contidos educativos que presenta.
A metodoloxía do curso é que o alumnado traballe o tema da prevención a partir das películas. Todo o material complementario que se lle facilita, serve como soporte para tratar as diversas temáticas transversais que aparecen en cada guía, xa que se considera que o cinema pode resultar un recurso de primeira magnitude para implementar todo iso, e que pode facilitar, ademais, profundar noutros ámbitos transversais que resulten do interese de cada docente.
