O Concello de Tomiño incorporará este ano ao seu persoal a catro persoas desempregadas ao abeiro do proxecto ‘Primeira Experiencia Profesional 2023/2024’, un plan para o fomento da empregabilidade posto en marcha pola Deputación de Pontevedra. Xa está pendurado no taboleiro de anuncios da Sede Electrónica municipal o documento cos perfís profesionais que se solicitarán nos vindeiros días na Oficina de Emprego de Tui, que realizará a sondaxe previa ao proceso selectivo.
O inicio dos contratos está previsto para o 15 de xullo de 2023 e terán unha duración dun ano a tempo completo. As persoas candidatas deberán estar inscritas como demandantes de emprego ou en mellora de emprego no Servizo Público de Emprego e cumprir os requisitos da convocatoria, como estar en posesión da titulación solicitada ou empadroados preferiblemente en Tomiño ou noutro concello da provincia, entre outros.
Nesta ocasión búscase unha persoa co Grao en Ciencias Ambientais ou en Agricultura para a xestión do servizo de baleirado de fosas sépticas, de préstamo de biotrituradoras e das incidencias relacionadas coa recollida de lixo e limpeza viaria, para a colaboración coas traídas de augas comunais ou a tramitación de expedientes.
Por outra banda, contratarase a unha persoas co Grao en Publicidade e Relacións Públicas para a planificación, organización e xestión de eventos e actividades, fundamentalmente de carácter cultural e deportivo; a elaboración de estudos de impacto e alcance das actividades; deseño da publicidade ou creación de contidos audiovisuais ou gráficos para medios e redes sociais.
Tamén se buscarán a dúas persoas con Grao universitario en economía para prospección de recursos infrautilizados, de proxectos empresariais de promoción económica local e iniciativas innovadoras para a xeración de emprego; o acompañamento técnico no inicio de proxectos empresariais; a implantación de políticas activas de emprego e promoción e promoción da formación ocupacional; o deseño de programas de intervención para a inserción laboral de persoas desempregadas; ou a tramitación de axudas con ou sen fondos europeos, subvencións e reclamacións patrimoniais.
