As concelleiras socialistas de Tomiño, Violeta de Santiago e Mirta Misa presentaron no Pleno da Corporación unha moción sobre a peonalización da Avenida Ordóñez en Goián, unha obra que, segundo as concelleiras “provoca un grande rexeitamento entre o comercio de Goián e na veciñanza el xeral”.
Na súa proposta, as socialistas tomiñesas instaban, por unha banda, a que o equipo de Goberno abrira unha canle de diálogo cos comerciantes de cara a escoitar as súas propostas. Doutra banda, Violeta de Santiago e Mirta Misca pedían que se planificase e xestionase “a cohexistencia na accesibilidade” tanto peonil como con vehículo na Avenida Ordóñez “dun xeito racional e tendo en conta o día a día da localidade e das persoas que nela viven e traballan”.
Defenderon as concelleiras socialistas, entre outras cuestións, a posibilidade de que a zona se limite a 20 km/h dando prioridade a circulación a pé e permitindo a convivencia cos vehículos con limitacións e sen obstáculos de mobiliario urbano.
Outra posibilidade que os propios comerciantes expoñen é a peonalización en determinados horarios e/ ou nas fins de semana. En todo caso, as e os comerciantes deixaron ver o seu temor a que á actual crise epidemiolóxica súmese outra económica e social, do mesmo xeito que manifestaban o seu malestar polo comenzo das obras en plena campaña de Nadal para, días despois, quedar paralizadas.
O certo, sinala o PSOE tomiñés, é que o debate non foi posible dende o momento que o voceiro do BNG, ao inicio da súa intervención, manifestou a inamovible decisión do Goberno de non modificar o proxecto.
De nada serviu que Violeta de Santiago, como voceira socialista apelara ao consenso e a que “escoiten e atendan a xente e que interioricen que os pobos non pertencen aos gobernantes de turno. Pertencen ás veciñas e veciños e ao tecido comercial que é a garantía de prosperidade”.
Por último Violeta de Santiago lembroulle ao goberno nacionalista que esa rúa “é patrimonio inmaterial da vila ó ser o antigo ‘Camiño da barca’ o cal debería ser tido en conta, pois forma parte da identidade de Goián”.
Por outra banda, varios comerciantes do concello pediron ao grupo socialista que trasladara ao Goberno “o seu profundo malestar” polo que consideran “mala organización da Campaña de Nadal e concurso de escaparates”. Ao entender de moitos comerciantes, “faltou información” o que fixo que moitos comercios “non poideran adherirse”.
Aseguran que foi unha campaña anunciada con moi pouca antelación e, esa mala planificación, fixo que moitos “xa tiveran os seus escaparates diseñados ou decorados”. A maiores chaman a atención sobre o que consideran un “incumprimento das propias bases” ao permitir a participación a establecementos que, segundo esas mesmas bases, non poderían facelo e non permitindo a outros, con iguais características, a súa participación.
Para o PSOE, “a desigualdade provocada polo esquecemento, o illamento e o maltrato ás parroquias que son unha vez máis as grandes esquecidas nesta campaña, vén sendo recorrente”.
Finalmente e con respecto á decoración alternativa de Nadal instalada nas prazas do Seixo e da Mina, Mirta Misa e Violeta de Santiago alertaron que eses elementos foron utilizados nos xogos dos nenos e nenas sin ningunha medida de seguridade, nin control, nin desinfección o que contrasta co peche absoluto dos parques e pistas deportivas”.
