O Partido Popular de Tomiño revelou que a Axencia Tributaria vén de confirmar, coa imposición dunha sanción económica, a comisión de irregularidades no Concello de Tomiño, con responsabilidade do goberno local, no uso fraudulento de gasóleo nun vehículo da frota municipal.
Segundo a notificación de acordo de imposición de sanción por infracción tributaria dirixida ao Concello, á que tiveron acceso os populares tomiñeses, exponse que “no presente caso considérase probado que o obrigado tributario –é dicir o Concello de Tomiño– cometeu a infracción tributaria antes detallada, sendo responsable da mesma ao ser o arrendatario do vehículo no momento da comisión da infracción”. Ademais, tamén quedou demostrado que a maquinaria que contiña o gasóleo B estaba alugada polo consistorio durante o período de infracción.
O Partido Popular de Tomiño, que esixe a depuración de responsabilidades no seo do goberno local e que ofrezan explicacións e pidan desculpas á cidadanía, achacou a responsabilidade absoluta ao goberno local.
“O goberno do BNG saiu a criticarnos cando lamentamos esta situación e pedimos explicacións, algo que lle debemos aos veciños, con mentiras e difamacións, dicindo que falabamos mal do noso concello, pero o que fala mal do noso concello é ter un goberno local que usa gasóleo de xeito fraudulento e que ten que pagar unha multa en vez de adicar eses cartos aos veciños. Supoño que agora estarán agochados, porque a realidade é teimuda, ante un exemplo máis da súa nefasta xestión”, sinalou Meneses.
Os populares insisten en que se debe chegar ao fondo do caso para coñecer canto tempo se leva producindo esta situación en torno ao parque móbil municipal, aínda que agardan, sen moita confianza, que o goberno local puxera couto a esta situación e establecera medidas de control.
Ademais, dende o PP tomiñés tamén manifestan que este é un feito dobremente grave, posto que nas alegacións do goberno local neste caso de uso fraudulento de gasóleo escudábanse en que deixaban prestada, supostamente, a maquinaria municipal a empresas e xente externa ao Concello durante o tempo no que a mesma estaba sendo alugada, e polo tanta pagada, polo propio Concello.
Por elo, o PP de Tomiño agarda, por unha banda, que se dean explicacións e se depuren responsabilidades por este caso, pero cren que a situación, máis alá do tema do uso irregular de gasóleo, “non está zanxada porque hai unha segunda parte e seguimos sen saber que está a acontecer co emprego dos vehículos do Concello nas fins de semana e en xornadas festivas e non laborables”. Nesta liña, indicaron que seguirán traballando nesta cuestión “malia o escurantismo do goberno nacionalista e do seu intento constante de empregar cortinas de fume cando se critica, moi merecidamente, a súa xestión e se lles esixe un traballo exemplar que é o que merecen os nosos veciños”.
