11.4 C
Pontevedra
Domingo, 19 de Maio de 2024
Máis
    HomeBaixo MiñoTomiñoO Baixo Miño adapta o seu agro para un desenvolvemento sostible

    O Baixo Miño adapta o seu agro para un desenvolvemento sostible

    Cambio climático, contaminación, despoboación… son algúns dos problemas máis importantes aos que se enfronta o agro, un sector que no Baixo Miño leva tempo traballando e esforzándose por convertese en motor de desenvolvemento sostible da comarca, tanto a nivel ambiental como económico e social. Por este motivo, as empresas do sector levan tempo implementando sistemas de optimización enerxética e de recursos.

    Mención especial merece a optimización dos hídricos, nos que se empregan as novas tecnoloxías para monitorizar e obter información precisa que permite por exemplo un rego de precisión ou reciclando a auga sobrante do regadío e a pluvial para reducir o consumo. A rotación de cultivos e o uso de recursos endóxenos, coa selección xenética e botánica de cultivos e o uso de clones autóctonos adaptados ás condicións da comarca, permiten poñer en valor o produto tanto a nivel agronómico como económico.

    O futuro: profesionalización e bolsa de emprego
    Pero esa sustentabilidade medioambiental debe camiñar da man cun futuro económico prometedor e coa capacidade de xerar emprego de calidade. A Asociación de Cultivos do Baixo Miño (acuBam) segue apostando pola profesionalización do sector, motivo polo que a 16ª Mostra de Cultivos contará cunha xornada específica na que se abordarán as necesidades laborais do agro na comarca e as ofertas formativas que se están a desenvolver e se promoverá unha colaboración estable entre empresas e docentes.

    Nela tamén se presentará a primeira bolsa de emprego agraria transfronteiriza, a través da que acuBam formará unha base de datos de traballadores do sector coa que cubrir as necesidades laborais das empresas socias. As persoas interesadas poderán achegar o seu currículum á Mostra de Cultivos ou ben entrar na web acubam.org e deixalo de xeito virtual ou consultar as ofertas de emprego dispoñibles nese momento.

    Nun sector no que o 80% das persoas traballadoras son mulleres séntese fundamental sustentar ese desenvolvemento no fomento da igualdade, con plans de conciliación ou de formación, así como na posta en marcha de iniciativas que fomenten a responsabilidade social das empresas, que se traduce por exemplo en distintas colaboracións coa Asociación San Xerome, entre outras entidades.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.