10.8 C
Pontevedra
Sábado, 2 de Marzo de 2024
Máis
    HomeBaixo MiñoTomiñoA Xunta incorpora ao catálogo de árbores senlleiras varios exemplares de Tomiño

    A Xunta incorpora ao catálogo de árbores senlleiras varios exemplares de Tomiño

    A Xunta de Galicia incorpora ao Catálogo de árbores senlleiras dúas sobreiras, localizadas no concello de Valga, e unha formación de 14 exemplares desa mesma especie, que se atopan no municipio de Tomiño, segundo a resolución que publica hoxe o Diario Oficial de Galicia.

    As Sobreiras da Capela dos Mártires, son dous exemplares cunha idade estimada de máis de 200 anos, localízanse xunto a unha antiga necrópole na parroquia de San Miguel de Valga. De feito, baixo estas sobreiras, hai dous sartegos, de granito, a ras do chan e semisoterrados. Ademais, cómpre salientar que o lugar se atopa no trazado dun antigo camiño sacramental que coincide coa actual Vía Mariana Luso-Galaica.

    No que atinxe á formación das 14 sobreiras que se atopan na parroquia de Goián (Tomiño), distribúense en 4 grupos ao longo do adro a carón da capela de San Roque, espazo de interese histórico e patrimonial. A idade estimada dos exemplares está en máis de 250 anos.

    Unha ferramenta en constante actualización

    O catálogo galego de árbores senlleiras é unha ferramenta aberta e en constante actualización, podendo propoñer a inclusión de elementos novos os seus propietarios, as administracións, os centros de investigación ou asociacións e aquelas entidades privadas ou públicas que teñan entre os seus fins estatutarios a protección da natureza.

    De feito, desde a aprobación do seu regulamento no ano 2007, foi obxecto xa de diversas revisións e periodicamente sométense a información pública novas propostas para valorar a posible incorporación de exemplares con valores salientables, como é o caso das sobreiras que veñen de incorporarse.

    Este rexistro público de carácter administrativo inclúe todas aquelas árbores e formacións excepcionais merecentes de protección en atención ás excepcionais características do seu porte, proporcións, idade, rareza, significación histórica ou cultural, interese científico, educativo, estético, paisaxístico ou calquera outra circunstancia que as faga merecentes dunha especial protección.

    Na actualidade, forman parte do Catálogo un total de 192 elementos —151 exemplares e 41 formacións arbóreas— pertencentes a 84 especies diferentes e coa seguinte distribución por provincias:

    PROVINCIAÁRBORESFORMACIÓNSTOTAL
    A Coruña431457
    Lugo35641
    Ourense20626
    Pontevedra531568
    Total15141192

    LIBROS

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.

    Fran Fernández Davila, «Groenlandia»

    A Fran Fernández Davila gústalle sorprender cos seus traballos literarios, descolocar ao lector para levalo por paisaxes pouco transitadas física e emocionalmente, escapar da rutina diaria e, cunha forte carga de imaxinación, argallar historias nas que a intriga e o humor acaban por se converter en personaxes convidadas da trama.