A compañía Aporía Escénica sabe que habelas, hailas. Para amosarllo ao público subirase esta fin de semana ao escenario do auditorio municipal de Goián para representar ‘Soga e Cinsa’, un tríptico renacentista con 11 bruxas e en 101 minutos co que abordar a caza de bruxas en Europa dos séculos XV ao XVII para visibilizar o xenocidio que supuxo e a súa perversa conexión co desenvolvemento do sistema capitalista.
Farao nunha gran peza teatral na que a súa autora e directora, Diana Mera, mestura con mestría horror, humor, emoción, reflexión e plasticidade nunha sucesión de paisaxes inesperados que irrompen na escena para que expresen a súa danza esquecida, nunha peregrinaxe de sombras espectrais que procura as luces da xustiza e do recoñecemento.
A alcaldesa de Tomiño, Sandra González, convida a toda a veciñanza a gozar dunha noite de teatro con esta obra “que xoga cos tópicos pero con personalidade, cunha imaxe impactante que conquistará e sorprenderá ao público dende o inicio ao final, cunha historia absorbente e suxestiva”. A obra representarase no auditorio municipal de Goián ás 21.00 horas e está recomendada para público a partir dos 13 anos. A entrada terá un prezo de 7 euros e poderá mercarse unha hora antes no despacho de billetes do auditorio.
