O vindeiro domingo 2 de abril a Asociación Forestal de Educación Ambiental A Jalleira organiza unha xornada de voluntariado ambiental no monte veciñal de Viladesuso, unha iniciativa que consistirá na eliminación de eucalipto no monte da Groba.
Con este traballo voluntario, preténdese erradicar esta especie invasora nunha área de especial interese paisaxístico, e mellorar as condicións de hábitats prioritarios degradados que atopamos nesta zona coñecida como “O Campo do Xunco”, recentemente incluida no inventario de zonas húmidas de Galicia.
A xornada comezará ás 10:00 h, o punto de encontro será no Refuxio Fonte do Toxo (a localización pode consultarse nesta ligazón). Ao remate haberá un pequeno xantar para todas as persoas participantes da xornada. Para máis información e inscrición, as e os interesados poden dirixirse ao enderezo de correo electrónico [email protected].