19.8 C
Pontevedra
Luns, 15 de Xullo de 2024
Máis
    HomeA ParadantaCoveloO servizo público de Atención Temperá de Covelo ofrece pautas para elixir...

    O servizo público de Atención Temperá de Covelo ofrece pautas para elixir os agasallos de Nadal dos cativos

    O goberno do Concello de Covelo, liderado polo alcalde Pablo Castillo, quere agradecer o traballo realizado polas tres profesionais do servizo de Atención Temperá que ao longo deste ano deu apoio a 10 familias de Covelo e a un total de 70 nenos nos catro concellos que cubre.

    Cada mércores no consultorio do centro de saúde de Maceira acompañan ás familias para promover a autonomía persoal entre nenos e nenas de 0 a 6 anos de idade. Derivadas por pediatría as familias atopan no servizo de Atención Temperá recursos para dar resposta o antes posible ás necesidades transitorias ou permanentes que presentan os nenos con trastornos no desenvolvemento ou en risco de padecelos.

    Nestes días de nadal nos que as familias afrontarán un maior tempo de convivencia nos fogares o servizo de Atención Temperá de Covelo da man da súa coordinadora e psicóloga Olalla R. Giráldez achéganos consellos e pautas. “Elixir agasallos para nenos entre 0 e 6 anos de idade pode parecer tarefa fácil. Con todo a experiencia dinos que a maioría de agasallos acaban esquecidos aos poucos días”. Por que ocorre iso?

    Durante as festas do Nadal nenas e nenos reciben máis da metade dos xoguetes cos que van xogar durante todo o ano. Desde a pediatría e a neuropsicoloxía desenvolvéronse   unha serie de recomendacións para que os pais e nais coñezan de primeira man que tipo de xoguetes son máis beneficiosos para o desenvolvemento cerebral dos seus fillos/as e cales non o son tanto ou mesmo poden ser prexudiciais.

    As recomendacións céntranse en eliminar da carta dos reis xoguetes tecnolóxicos xa que este tipo de xoguetes non achegan beneficios e reducen o tipo de xogos que os nenos adoitan desenvolver de forma natural. Moitos pais e nais déixanse seducir por este tipo de xoguetes xa que parece que ao ser máis complexos a interacción do neno é máis complexa tamén. Con todo, a realidade é que canto máis faga o xoguete, menos ten que facer o neno e o fin do xoguete é facilitar que o cerebro do mesmo, desenvolva interaccións complexas e non facelas por el/ela.

    Por ese motivo o máis recomendable é que os pais e nais aposten por xoguetes sinxelos que favorezan o desenvolvemento cerebral a través do xogo. Porque non esquezamos que o xogo é a ferramenta que ten o cerebro para aprender. E dentro dos seus obxectivos de aprendizaxe, o máis importantes é descubrir como funciona o mundo, dominar o vocabulario e o propio corpo e aprender a desenvolver destrezas como os movementos finos da man, a carreira, ou competir cos seus iguais.

     NON son recomendables  

    • Xoguetes como andadores ou colgadoiros que permitan ao bebé poñerse de pé ou camiñar antes de que sexa o seu momento, xa que poden interferir cun desenvolvemento adecuado dos circuítos neurolóxicos que permiten ao neno desenvolver un patrón de marcha adecuado.
    • Xoguetes tecnolóxicos que atrapen a atención do neno, como iPads, teléfonos de xoguete ou bonecos con moitas luces e son especialmente antes dos dous anos, pero durante o primeiros seis anos de vida, xa que poden interferir en un desenvolvemento positivo da atención, concentración e autocontrol.
    • Bonecos que ofrezan unha interacción co neno como bonecos que choran, ositos que responden xa que a interacción con amigos, pais ou irmáns é moito máis complexa e enriquecedora para o desenvolvemento emocional e social do neno.

     SI son recomendables

    • Xoguetes que permiten equilibrar e integrar reflexos primarios: Para un bo desenvolvemento psicomotriz, intelectual e emocional é positivo que os nenos integren reflexos que aparecen no ventre materno. Así, os movementos de abalo, o rotar sobre as súas propias costas dun lado ao outro ou ser capaz de rotar sobre a súa cabeza (pinchacarneiro) son moi positivos para o seu desenvolvemento.
    • Colchón ou coxíns grandes onde o bebé poida xogar a voltearse, xogar cos seus pais e cando sexa un pouco maior facer pinchacarneiros
    • Randeeiras onde o neno teña o abalo de adiante cara atrás
    • Xoguetes balancín como un caballito que se arrola sobre si mesmo
    • Xoguetes que lles permiten desenvolver a súa capacidade e coordinación psicomotriz:    –  arrastrables como un tren ou un caballito que se arrastra cunha corda.
    • Xogos de lanzar como birlos ou petancas de felpa (ou de madeira se son algo maiores)
    • Patíns que lle axuden a mellorar o seu equilibrio e coordinación
    • Bicicletas con ou sen ruedines que lle permitan desenvolver coordinación
    • Xogos de pelota como balóns ou raquetas que lle permitan mellorar o seu tempo de reacción e capacidade psicomotriz
    • Xoguetes que lles permiten desenvolver a psicomotricidade fina e creatividade:
    • Cochecitos que o neno/para pode mover polo chan
    • Legos que permiten construír, seguindo instrucións ou de forma libre con axuda da imaxinación e movementos finos dos dedos.
    • Un estoxo con lapis de cores e tesoiras que permitan ao neno debuxar axudándolle a gañar forza e destreza nas mans
    • Plastilinas que lle permiten imaxinar, crear e desenvolver movementos complexos coas súas mans
    • Xoguetes que permiten desenvolver a linguaxe:

    En xeral, todos os xogos que non levan pilas favorecen o desenvolvemento da linguaxe, sobre todo se permiten ao neno interactuar cos seus pais dunha maneira positiva ou desenvolver roles. Tamén hai xogos que poden favorecer o desenvolvemento do vocabulario como:

    • Granxas ou animais de madeira ou plástico que o neno pode coñecer polo seu nome
    • Xoguetes como Mr. Potato que axudan a aprender as partes do corpo
    • Contos nos que aparecen todo tipo de situacións e obxectos
    • Instrumentos musicais como un triángulo, ou unhas maracas que podemos utilizar para cantar cancións, que son moi enriquecedoras para o desenvolvemento do vocabulario.
    • Xoguetes que lles permiten desenvolver a súa capacidade de solución de problemas
    • Bloques que permiten amontoarse entre si e axudan ao neno para entender relacións entre peso, altura, gravidade, equilibrio,
    • Quebracabezas
    • Construcións
    • Xogos de cartas: as cartas con familias ou xogos como o UN, que permitan ao neno/a unha vez coñece os números, razoar e tomar decisións.
    • Xoguetes que permiten desenvolver a cognición social 

    Durante os primeiros anos de vida, concretamente a partir dos dous anos aproximadamente, o xogo simbólico permite ao neno comezar a imaxinar distinto repertorio de actividades e desenvolver así a súa capacidade entender aos demais, a si mesmo e relacionarse socialmente. Estes xoguetes poden axudarlle a desenvolver xogos que favorezan este desenvolvemento.

    • Xogos que permiten desenvolver roles como unha cocinita ou unha tenda
    • Disfraces, xa que lle permiten interpretar distintos personaxes coa axuda do seu corpo e imaxinación
    • Bonecos que lle permiten desenvolver todo tipo de escenarios e relacións sociais
    • Xogos como o quen é quen onde ten que tentar pensar o que o outro está a pensar

    Todas estas recomendacións buscan o neurodesarrollo óptimo dos máis pequenos e a tranquilidade das súas mamás e papás á hora de comprar xoguetes que axuden aos seus fillos a estimular as súas potencialidades. Lembra que un dos compoñentes máis importantes é tamén que o xogo poida ser compartido coas principais figuras de apego, é dicir, papá, mamá, e outras persoas próximas da contorna. É o que máis pode desexar o voso ou vosa peque.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.