22.8 C
Pontevedra
Domingo, 14 de Abril de 2024
Máis
    HomeA ParadantaCoveloCovelo implica ao alumnado do CEIP Antonio Rodríguez Blanco no coñecemento da...

    Covelo implica ao alumnado do CEIP Antonio Rodríguez Blanco no coñecemento da súa riqueza medioambiental

    O concello de Covelo amplía a súa proposta de actividades de desfrute e coñecemento do medio natural ao alumnado do CEIP Antonio Rodríguez Blanco. Deste xeito, ao longo de varios anos desenvolverá o proxecto “Ríos, aldeas e montañas” grazas ao que o alumnado poderá realizar saídas didácticas da man do guía de montaña Julio Eiroa.

    O Concello, en colaboración coa Deputación de Pontevedra, desenvolverá excursións interpretativas dende este ano 2023 ata o 2028 co obxectivo de acompañar ao alumnado dende que cursa 1º de primaria ata 6º. Deste xeito, durante o curso escolar realizarase unha saída por ciclo. 1º e 2º primaria sairán xuntos, 3º e 4º polo seu lado e 5º e 6º de primaria tamén. Un neno ou nena que neste ano curse 1º de primaria terá a oportunidade de realizar 6 excursións, totalmente de balde, de diferente temática nas que descubrir a riqueza natural do seu concello.

    “Cremos que a través do coñecemento conseguimos unha maior posta en valor e por iso pensabamos que é imprescindible que os máis pequenos e pequenas dos fogares e do colexio de Covelo coñezan o seu patrimonio natural e cultural porque eles e elas serán os que prolonguen este legado”, explica o alcalde Pablo Castillo.

    Un deseño previsto para desenvolver en varios anos consecutivos de excursións interpretativas de educación ambiental e patrimonial e que completa a oferta estable anual que xa viña desenvolvendo nos últimos anos o Concello dirixida a visitantes e público adulto en xeral.

    O nome do proxecto recolle os conceptos que unifican esta formación. Así os alumnos de 1º e 2º de primaria participarán en actividades no ecosistema fluvial do fondo dos vales que percorre Covelo. Os alumnos de 3º e 4 de primaria participarán en actividades ligadas á vida na aldea e parroquias e os alumnos de 5º e 6º de primaria visitarán as serras e montañas do concello de Covelo.  “A idea é realizar un percorrido dende o fondo do val cara os cumios das serras que permitan o territorio no que estes nenos e nenas viven”, explica Julio Eiroa.

    As saídas terán lugar en horario de mañá do día lectivo, con desprazamentos en autobús dos alumnos e alumnas ata lugares icónicos do territorio, onde realizar un pequeno percorrido a pé e actividades de interpretación. Entre os contidos a desenvolver podemos destacar para o primeiro ciclo: O río Tea, o bosque de ribeira, o salmón atlántico e os muíños. Para o segundo ciclo: O serradoiro de Carranos, o lagar de cera, as levadas e as eiras. Para o terceiro ciclo: A tradición gandeira, as chozas, chozos, currais e sesteiros, os foxos dos lobos, os camiños arrieiros e as turbeiras de montaña. Ademais, existen conceptos que se repetirán en todas as saídas como é o coñecemento das parroquias.

    Os beneficios de que o alumnado se integre no territorio son claros. Xera coñecemento da dimensión, xeografía, orientación e valores do territorio que habitan. Crea identidade no pobo e a conciencia de pertencer a un lugar valioso, ademais de aportar valores de respecto polo medio ambiente e o patrimonio.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.