Como cada ano os elfos de Nadal visitan o Concello de Covelo para facer maxia e inundar de ilusión cada recuncho, por este motivo o Concello convida a toda a cidadanía a participar no grupo de voluntariado “Fábrica de felicidade” que xa comezou a traballar para preparar o desfile navideño.
Cada luns pola tarde os baixos do pavillón municipal convértense nun almacén de ideas dispostas a facerse realidade. Fitas de cores, adornos e un amplo despregue de imaxinación para deseñar e realizar as carrozas que desfilarán por parroquias e centro urbano.
Animados por un chocolate quente e un bo biscoito caseiro os voluntarios fan da xornada de traballo unha festa e preparan todo para a chegada dos elfos. Como cada ano as persoas voluntarias participarán, ademais, no desfile e formarán parte da comitiva que visita a residencia de maiores, o centro educativo, as parroquias e os locais de hostalaría, entre outros lugares.
Voluntarias animan aos veciños a achegarse e compartir as tardes dos luns porque ademais de contribuír de aprender manualidades uns doutros, bótanse unhas boas risadas e deixan unha pegada solidaria na historia da vila.
