A Concellería de Cultura do Concello de Covelo convida a participar no seu desfile de entroido organizado en colaboración coa asociación de veciños de Maceira.
A concelleira de Cultura, Lourdes Enes, informa que todas as persoas interesadas en participar cunha comparsa deberán contactar coa asociación veciñal para inscribirse e poderán facelo no número de teléfono 678 681 952.
O desfile de entroido terá lugar na contorna da renovada praza do centro da parroquia o sábado día 26 de febreiro a partir das 17:00 horas.
O concello de Covelo e a asociación de veciños de Maceira entregarán tres premios ás tres mellores comparsas. Tres galardóns de entroido acompañados dun lote de produtos locais.
O desfile de entroido, no que despregarán a súa creatividade as comparsas, estará amenizado por música de charanga.
Cita especial coa “Mostra de produtos de Covelo”
Aínda que habitualmente a Mostra de Produtos de Covelo se celebra o primeiro sábado de cada mes, os produtores da comarca non quixeron perderse o entroido de Maceira e montarán os seus postos dende as 15:30 horas ata o remate da festa.
Deste xeito ademais de gozar do entroido tamén poderemos adquirir produtos de primeira calidade. Xoiería, agricultura ecolóxica, moda, artesanía, cosmética, roupa e diferentes produtos comarcais de primeira calidade estarán a disposición dos e das participantes na festa de entroido de Covelo.