19.5 C
Pontevedra
Luns, 15 de Xullo de 2024
Máis
    HomeA ParadantaCoveloCovelo converterá o baixo do pavillón municipal nun ximnasio e salas de...

    Covelo converterá o baixo do pavillón municipal nun ximnasio e salas de usos polivalentes

    O Concello de Covelo presenta, aos fondos PON2030 da Deputación de Pontevedra, o acondicionamento da planta baixa do recinto polideportivo do pavillón municipal para convertelo nun ximnasio e crear, ademais, salas de usos múltiples.

    O alcalde, Pablo Castillo, quere dar resposta á alta demanda de espazos cubertos para a práctica deportiva e a realización de encontros e actividades ao quedarse pequenas as salas das casas e centros culturais.

    Na actualidade esta zona do andar baixo do complexo deportivo non conta con acceso directo desde a rúa nin con abastecemento nin saneameno, para solventalo o proxecto contempla dous novos accesos nos dous laterais e a conexión ás redes municipais de subministros. O baixo conta con paredes de bloques de formigón sen revestir, sen soleira e a luz natural entra por varios ocos protexidos con placas translúcidas de polietileno, motivo polo que é imprescindible acometer unha obra integral de reforma e illamento.

    A rehabilitación terá como obxectivo a creación dun recinto para uso deportivo e de lecer, dedicado  tanto a nenos, xente nova, adultos e persoas de idade avanzada para que dispoñan dun lugar axeitado para a realización de actividades deportivas moi demandadas nos últimos anos e que debido á falta de instalacións non se poden realizar coas condicións de confortabilidade adecuadas.

    Co obxectivo de promover as actividades físicas e o deporte, o Concello de Covelo actuará en 283 m². Proponse unha sala polivalente para usos variados, baile, relaxación, lecer, realización de xuntanzas culturais, dinamización social, etc de superficie 85,58 m²; outra sala de 97 m2 para un ximnasio con máquinas e diverso material para a o exercizo físico e 3 aseos, un para homes, outro para mulleres e outro para persoas con mobilidade reducida.

    “Na actualidade hai unha tendencia cada vez maior a organizar e participar en todo tipo de actividades, o actual pavillón ten todos os horarios cubertos e existe unha importante necesidade de ter un espazo pechado no que realizar exercizo físico con dispoñibilidade de máquinas e accesorios deportivos que posibiliten, non só o uso, tamén recibir clases atendidas por profesionais”, explica o alcalde.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.