Este domingo día 20 as pistas deportivas de Barcia de Mera, en Covelo, acollerán unha nova sesión do cine na rúa enmarcada na programación Verán Cultural. Ás 22 horas comezará a proxección da película Spirit o corcel indomable. Unha película dirixida por Kelly Asbury e Lorna Cook e coas voces de actores como Matt Damon, James Cromwell, Chopper Bernet, Charles Napier, Zahn McClarnon ou Adam Paul.
Spirit é un cabalo salvaxe que naceu nas pradeiras virxes do Oeste Americano, coincidindo xusto cos primeiros anos da Conquista. Durante a súa infancia non coñeceu máis que xogos e aventuras, descubrindo con asombro a inmensidade, os infinitos recursos e a beleza maxestosa da súa terra natal. Agora que é adulto, converteuse no líder da súa manda. Todo cambia unha noite, no momento no que Spirit se atopa con Home. O cabalo é entón capturado por un coronel que o tentará domar.
