O Concello de Arbo vén de iniciar a segunda fase da mellora e ensanchamento do camiño Urzal-Cividá, na parroquia de Barcela, obra que se desenvolve ao abeiro do Plan Concellos da Deputación de Pontevedra e que conta cun investimento de 90.978,94 €.
Con esta actuación o Concello que preside Horacio Gil busca mellorar a súa rede municipal de estradas reparando aquelas que contan con firme de asfalto e pavimentando aquelas que todavía son de terra. Unha das prioridades, sinala o alcalde, “é mellorar a seguridade viaria en todas as estradas, executando ensanches e mellorar o trazado nos tramos mais perigosos”.
Cómpre salientar que “manter a rede viaria en perfecto estado é complicado pola ampla superficie do concello e o gran número de estradas e camiños existentes” polo que son precisos contínuos traballos de pavimentación que rexeneren completamente a rodadura en ditas estradas e que melloren a seguridade viaria coa optimización do trazado.
Coas actuacións previstas pretendese mellorar o servizo que ofrece para os usuarios o camiño Urzal-Cividá ao ser un camiño utilizado, tanto por vehículos como por peóns, “mellorándose súa pavimentación, que se atopa en mal estado, e así dar continuidade ao xa realizado nunha primeira fase desta obra”, conclúe Horacio Gil.
