O alcalde Luis Piña inaugurou a mostra fotográfica “Punto e Seguido: A vida despois do Dano Cerebral Adquirido”, acompañado de persoal da Federación Galega de Asociacións de Dano Cerebral Fegadace (unha das comisarias da obra xunto con Adaceco, Adace Lugo, Alento, Sarela e Renacer Ourense), que estará aberta ao público ata o 18 de xuño na Casa do Concello en horario de 8:30 a 15:00 horas.
A exposición está composta por un total de 37 fotografías tomadas polo autor Aigi Boga no ano 2017 nas que o autor captura instantáneas das persoas que sufren esta enfermidade nos centros que FEGADACE ten en Galicia.
Estas fotografías revelan momentos de debate nos centros de día, traballando o razoamento, de diversión e convivencia, expresión física e control do corpo, de traballos de potenciación das habilidades, entre outros moitos.
A exposición é unha continuidade da charla impartida o pasado 6 de maio no Concello sobre esta enfermidade.
