O grupo de Gaitas Avelaíña, da localidade coruñesa de Teo, proclamouse este sábado gañador do LIII Concurso de Gaitas do País celebrado en Ponteareas. A segunda posición logrouna o grupo Arghaço (Vigo) mentres que Laghareu (Santiago de Compostela) obtivo a terceira posición e Érbedo (Salvaterra de Miño) a cuarta. Esta foi a decisión final tras unha longa deliberación do xurado, composto nesta ocasión por Nadia Vázquez, José Manuel Gil, Antonio Gutiérrez, Xulia Feixoo, Sabela Olivares e Óscar Ibáñez.
Ademais, pola súa ampla traxectoria neste concurso, o Concello de Ponteareas fixo unha mención especial aos músicos Marcos Castro González e José Carlos Estévez Rodríguez, participantes un ano máis no Concurso de Gaitas.
O Concello de Ponteareas, a través do concelleiro de Cultura Fernando Groba, agradécelle á Fundación Artesanía de Galicia a súa colaboración co concurso por outorgarlle ao grupo gañador unha gaita do Obradoiro de Gaitas Gil e un tamboril co selo de Sanín Percusión Tradicional, que se suman ao premio de 1.800€ outorgado polo Concello de Ponteareas.
Fernando Groba sinalou que “a pesar da situación na que estamos púidose celebrar unha nova edición deste concurso con todas as garantías sanitarias e cun altísimo nivel de calidade, como recoñeceu o propio xurado, o que demostra a fortaleza e importancia do noso Concurso de Gaitas”. Neste sentido, Groba agradeceu aos grupos participantes “que co seu talento ano tras ano poñen en valor a nosa tradición e logran manter o nivel deste concurso como un dos máis importantes do país”.
O Concello de Baiona celebra mañá martes, 22 de setembro, o día da ‘Cidade sen coche! idea que ten a súa orixe na iniciativa europea da ‘Semana Europea da Movilidad’, que pretende atopar novas solucións aos problemas asociados ao aumento do tráfico nas cidades. Na carpa situada na praza do Concello de Baiona expoñeranse un vehículo eléctrico e outro híbrido para que os cidadáns achéguense a coñecer os beneficios desta nova modalidade de automóbiles. Os vehículos foron cedidos por un concesionario da localidade.
Así mesmo e como forma de concienciación da cidadanía, previuse unha zona no centro restrinxida para o paso de vehículos que comprende Carabela Pinta, zona peonil, (cruzamento con Ciudad de Vigo) e o acceso ao Casco Antigo da vila. Concretamente a Rúa Diego de Carmona (cruzamento con Hortas Reais), unión de rúa Conde con Ventura Misa, entrada ao casco por hotel Pinzón e entrada ao casco desde Santa Liberata. O acceso está prohibido aos vehículos de motor, excepto urxencias, todo o día.
Con iniciativas como esta contribúese a sensibilizar á poboación e fomentar hábitos de mobilidade sostible e saudable xa que se avanza cara a unha situación de mobilidade sostible, abordando un conxunto de propostas de actuación encamiñadas a promover a intermodalidad cara a formas de transporte con menor consumo de enerxía e unha diminución do uso do vehículo privado.
O alcalde, Carlos Gomez Prado, destacou que “o obxectivo con estas iniciativas é cambiar hábitos de mobilidade para conseguir que ‘Baiona sexa unha cidade máis sostible e accesible’” Gomez anima á cidadanía para “deixar por un día o coche e sumarse a este proxecto que ten como fin a concienciación. Ademais desta forma contribuímos a contaminar menos, reducir o ruído e as emisións de CO2”.
Por outra banda, o primeiro tenente alcalde e concelleiro de seguridade cidadá, Óscar Martínez, sinala a importancia e beneficios “do uso de modos de transporte máis sostibles como o transporte público, a bicicleta e as viaxes a pé, así como promover e proporcionar unha visión máis urbanística e diferente co obxectivo de municipios e #cidade accesibles”.
O tema elixido pola Comisión Europea para a campaña deste ano é ‘Por unha mobilidade sen emisións’. Esta temática reflicte o ambicioso obxectivo de alcanzar a neutralidade nas emisións para o ano 2050, recollido no Pacto Verde Europeo que tamén pretende resaltar a importancia da accesibilidade a sistemas de transporte de cero emisións e promover un sistema inclusivo para todas as persoas: mellor saúde, maior calidade de vida, menos contaminación.
A arquitecta María Fandiño acaba de gañar o premio internacional de arquitectura e natureza Simonetta Bastelli na categoría xove polo seu proxecto para a Explanada do Horizonte do Rosal. O xurado destacou o traballo feito por Fandiño nesta obra na que, tras un “atento e minucioso análise de coñecemento do lugar e da súa historia evolutiva, propón un novo capítulo para o seu desenvolvemento, cun deseño mínimo pero eficaz, utilizando técnicas e materiais que aínda sendo propios do sitio constrúen a súa nova identidade”.
Dende o Concello queremos felicitar a arquitecta por este galardón, que recoñece a nivel internacional o gran labor feito por María Fandiño no proxecto de revalorización e mellora deste tramo do Camiño de Santiago ao seu paso polo Rosal, co que tamén se dotará a Portocelo dunha nova área de esparexemento para os veciños. “O obxectivo do proxecto é recuperar a memoria do sitio, restaurar o ecosistema costeiro e devolver un lugar para quedarse cara o horizonte”, recolle a arquitecta na presentación do proxecto. Trátase de remodelar “o tramo da costa, mirando a estrutura, a topografía, analizando as súas proporcións, redibuxando o tramo cun vocabulario propio: as terrazas”.
A este galardón preséntanse propostas de proxectos europeos de intervencións arquitectónicas en catro categorías diferentes (profesional, xove, estudante e tese de doutoramento) que se dan a coñecer nun congreso internacional en Italia no que se tratan temas sobre accións no territorio e cambio climático. Este ano, debido á crise sanitaria, os proxectos presentáronse en formato virtual.
Fandiño tamén recibiu unha Mención de Honra na categoría senior pola súa iniciativa ‘Marxes Líquidas: proxecto de acondicionamento do Río Miño ao seu paso pola cidade de Tui’, que fixo xunto con Miriam García.
A Fundación Érguete-Integración, Deputación de Pontevedra e o Concello de Nigrán presentaron esta mañá no Centro Antena o curso ‘Acompañante de transporte escolar e comedor escolar’ de mellora da empregabilidade para 15 en paro. Ao acto acudíu o alcalde de Nigrán, Juan González; a presidenta da fundacion, Carmen Avendaño; e o deputado provincial Carlos López Font.
O proxecto Emprego Inclusivo, promovido pola Deputación de Pontevedra, e desenvolvido coa colaboración do Concello de Nigrán, está pensado para mellorar a empregabilidade das persoas situación de desemprego, facilitando a súa incorporación ou reincorporación ao mercado laboral, mediante formación ou capacitación técnica e prácticas en empresa, e Itinerarios Individualizados de Inserción, que engaden á formación, os servizos de orientación e intermediación laboral. Precisamente, este curso foi programado atendendo a unha maior demanda destes perfís laborais motivado polo Covid-19.
No curso, de 210 horas, aprenderán a realizar as tarefas de coidado e atención dos alumnos usuarios do servicio de comedor, inculcando bos hábitos alimenticios e ensinando ós nenos a comer de xeito saudable, e o control das saídas e entradas dos alumnos para que ningún abandone o recinto sen permiso. Na parte de acompañante de transporte escolar: o coidado dos menores durante o transporte e as operacións de acceso e abandono do vehículo, así como, no seu caso, da recollida e acompañamento dos/das alumnos/as dende e ata o interior do recinto escolar.
Paralelamente, Concello, Érguete e Zona Franca están a desenvolver un curso de auxiliar de comercio en Porto do Molle dirixido tamén a mellorar a empregabilidade entre persoas en busca activa de emprego.
A cooperación entre territorios xoga un papel crucial como instrumento potenciador do desenvolvemento. Conscientes desta realidade, a Eurocidade Cerveira-Tomiño participa nun intercambio co Consorcio transfronteirizo de Bidasoa Txingudi, integrado polos municipios vascos de Hondarribia, Irun e Hendaye, este último no País Vasco francés.
Ambos territorios comparten agora a súa experiencia en colaboración transfronteiriza, especialmente no relacionado cos servizos e axendas compartidas, a gobernanza ou a dinamización de sectores relevantes para a economía local.
Ao longo do mes de setembro, responsables técnicos dos cinco municipios implicados comparten documentación e sesións virtuais para intercambiar experiencias e coñecementos. Así, o pasado 10 de setembro abordáronse aspectos relacionados coa mobilidade e a participación cidadá e o 16 intercambiáronse experiencias nos ámbitos da cultura, o turismo e o deporte. Nestas videoconferencias participaron tamén representantes da AECT Rio Minho presentando a Axenda estratéxica 2030 e o proxecto Visit Rio Minho.
A terceira sesión, adicada ao emprego e a colaboración empresarial, está prevista para o vindeiro día 24 coa presenza, entre outros axentes económicos, de acuBam (Asociación de Cultivos Baixo Miño) e a Axencia de Desenvolvemento do Bidasoa.
O intercambio realízase ao abeiro do Programa de Capacitación e Participación en Redes de Cooperación da Axenda Estratéxica de Cooperación Transfronteiriza Amizade Cerveira-Tomiño, cofinanciado pola convocatoria INTERREG VA POCTEP, fondos FEDER da UE, e busca o coñecemento doutras experiencias, innovacións e boas prácticas no ámbito europeo.
O proceso culminará no outono cun encontro institucional entre os alcaldes dos concellos participantes.
A escasos días do comezo do curso escolar as nais e país do IES do Barral de Ponteareas lamentan “que a Xunta incumpra os compromisos publicitados nos medios de comunicación de baixar as ratios dos centros de ensino aumentando o número de Mestres para o presente curso”. ANPA e representantes das nais e pais no Consello Escolar, instan á Consellería de Educación “a reforzar de carácter urxente o equipo de docentes do centro”.
O reforzo solicitado atendería, sinalan, “as demandas do centro para desenvolver con normalidade o presente curso que convivir co perigo da COVID. “Señor Feijóo non hai escusa para recortar na educación dos noso fillos, invertir en educación e invertir no futuro e prosperidade da nosa nación”, lembran nais e pais.
Lamentan, por outra banda, que cando una das maiores premisas para evitar ou minimizar o perigo de contaxio e propagación sexa a hixiene e limpeza, “desde a Consellería opten por seguir mantendo o número de limpadoras/es que nos cursos anteriores, dividíndoas en dúas quendas una limpadora na quenda de mañá atendendo a limpeza de aseos e zoas común dun centro que mobiliza preto de persoas entre alumnado persoal docente, administrativo”, polo que salientan a necesidade de incrementar o persoal de limpeza.
Aseguran nais e pais que “tampouco saen as contas” xa que ano tras ano o centro ve como se multiplican o número de solicitudes de matricula “polo que tamén se pon enriba da mesa a necesidade de revisar o mapa escolar e modificalo para o mellor reparto do alumnado entre os centro da zoa escolar”.
“Non se pode deixar de obviar que para o presente curso o centro tivo que rexeitar alumnos por exceso de solicitudes derivándoos a outros centros da vila” rematan as nais e pais do IES do Barral .
A alcaldesa de Mos, Nidia Arévalo Gómez e o concelleiro de urbanismo e edil da parroquia de Torroso, Alberto Mendez Lago; reuníronse esta mañá co Presidente da Asociación de Veciños de Torroso, Juan José Romero Dominguez e demais membros da Xunta directiva, para proceder á sinatura da cesión de terreos do que na actualidade é o proxecto máis grande de toda Galicia do Plan Hurbe, ascendendo o orzamento total da obra de humanización a case 400.000 euros, 390.000 euros para ser exactos. Dos que a administración autonómica asume o 70% e o Concello financia un 30%.
Esta obra de humanización integrará o Centro Dotacional, o antigo Centro Cultural e a Igrexa de San Mamede nun espazo máis humanizado e habitable. Trátase dunha das principais promesas do programa electoral do goberno local mosense á que se dá cumprimento coa posta en marcha do proxecto.
A actuación abarcará uns 7.000 metros cadrados e suporá un cambio radical na parroquia, facendo máis habitable e humanizado o centro neurálxico da mesma; onde se concentran habitualmente gran número de veciños e foráneos que acuden a diario a esta zona para participar en actividades lúdicas, relixiosas, culturais, musicais…etc.
O Concello de Mos leva desde outubro traballando neste proxecto que se atopa dentro do Plan Municipal ‘Mos Humanizado’ e neste senso a alcaldesa de Mos, Nidia Arévalo, agradeceulles hoxe
Á Asociación de Veciños a cesión de estes terreos xa que esta obra marcará un antes e un despois na parroquia.
Asi mesmo a rexidora local agradeceu tamen enormemente o seu arduo labor neste proxecto tanto ao arquitecto municipal, Manuel Toucedo, como á arquitecta mosense, Estefanía Grandal, que quixo sumarse desinteresadamente a este proxecto, xa que é veciña da parroquia de Torroso, coa que non dubidou en colaborar para mellorala co seu excepcional traballo.
O prazo de execución desta obra é de 9 meses e os traballos a realizar consisten nun proxecto de urbanización e acondicionamento para uso de lecer e esparcemento, tratando de unificar o conxunto do vial e o torreiro da festa cunha pavimentación con materiais pétreos, así como deseño dunha peza de unión realizada con pedra. Nesta peza concéntrase a maior parte da intervención: asentos, iluminación, escaleiras de paso, vexetación, etc.
A humanización complétase coa execución dunha beirarrúa pola estrada Puxeiros-Mos que conectará o vial pavimentado co Centro Dotacional do Medio Rural de Torroso. Ademais realizarase un proxecto de iluminación con luminarias integradas no pavimento en diálogo co lugar e a intervención, e retiraranse as liñas aéreas (que serán soterradas) e as luminarias sobre postes, que serán substituídas por luminarias sobre báculos.
Como xa se dixo, as obras a realizar, comprenden a substitución do pavimento de aglomerado asfáltico por un pétreo (enlosado de granito/adoquín con solera de formigón baixo o pavimento) máis acorde co entorno, o que conlevará tamén unha renovación das instalacións, dotación de novas non existentes e reordenación do conxunto dos espazos adxacentes á Igrexa co consecuente novo amoblamento e deseño.
Os traballos de xardinería incluirán un estudo da vexetación existente para a súa mellora ou substitución. Xeración de novas sombras nos itinerarios propostos e axardinamento de baixo porte nos espazos ou percorridos que así o requiran.
A aceptación da subvención da Consellería de Medioambiente, Territorio e Vivenda da Xunta de Galicia con cargo ao Plan HURBE para financiar o 70% da Humanización da Contorna Parroquial de San Mamede-Torroso foi aprobada no pleno extraordinario do 16 de xuño cos votos a favor do equipo de goberno local e as abstencións de PSOE, GañaMOS e BNG.
Os primeiros aparcabicicletas do centro urbano de Ponteareas foron instalados o pasado venres na nova praza recentemente creada coas obras de humanización realizadas entre o Mercado Municipal e o Auditorio Reveriano Soutullo. Trátase de seis elementos para o estacionamento de bicicletas, tres situados no entronque coa rúa A Estrada e outros tres coa rúa Morales Hidalgo.
A instalación realízase coincidindo coa Semana Europea de Mobilidade, unha celebración que pretende promover a mobilidade sustentábel a pé, en bicicleta ou en transporte público.
Segundo informou o concelleiro de Mobilidade, Roberto Mera, “un dos nosos obxectivos é potenciar o uso da bicicleta como medio de desprazamento en Ponteareas. Temos todo a favor: unha vila pequena, radial, sen apenas costas e unha grande tradición ciclista.”. Mera lembrou que “para promocionar o uso da bicicleta son necesarias medidas regulatorias como a redución da velocidade do tráfico a motor a 20 km/h que implementamos recentemente, pois a bici debe convivir na mesma calzada cos coches e estes deben aprender a respectar ás persoas ciclistas. Pero tamén debemos facilitar equipamentos como os aparcabicicletas. Por iso o noso obxectivo é dotar nos vindeiros anos destes elementos a todos os edificios públicos de Ponteareas e ao maior número de rúas e prazas”.
Hoxe luns, 21 de setembro, celébrase o Día Mundial do Alzheimer, no marco da complexa situación que deixou a pandemia da Covid19.
A crise vivida tennos que servir para reflexionar máis sobre a sociedade e a importancia que damos aos nosos maiores, ás persoas con demencia e ás familias, así como a necesidade de reforzar o Estado de Benestar que construímos. Se para todas as persoas a situación da pandemia foi difícil, para as persoas con demencia foi moito máis complicada, incomprensible e desorientadora. Por iso, neste Día Mundial, desde Afaga Alzheimer poñemos o acento na ESENCIALIDADE.
En primeiro lugar, as persoas maiores e as persoas con demencia son esenciais. En momentos como os que vivimos, nos que os servizos sanitarios e hospitalarios saturáronse, e empezou a decidirse sobre a vida das persoas en función da idade ou a capacidade cognitiva, consideramos que utilizar a idade ou as situacións de demencia para cribar e decidir se se atende ou non a un paciente é algo incomprensible e inhumano. Todas as vidas son importantes e todas as persoas teñen dereito á sanidade pública, universal e gratuíta. E non se pode caer no “edadismo” e utilizar isto para negarlles unha correcta atención.
En segundo lugar, son esenciais os servizos de atención: os servizos de proximidade, os centros de día, as unidades de atención terapéuticas, os servizos públicos, que sen dúbida propician que a sociedade estea ben atendida. Estes recursos intermedios garanten a sociabilidade, evitan o illamento das persoas e atrasan o avance da deterioración, que lles permite vivir o maior tempo posible no seu domicilio.
En terceiro lugar, son esenciais os miles de profesionais que traballan en residencias, centros de día e centros terapéuticos e servizos sociosanitarios que estiveron un pouco esquecidos durante esta pandemia e nós queremos poñer en valor o importante labor que realizan. Eles tamén son esenciais.
E, por suposto, son esenciais as familias coidadoras. Nós somos unha asociación de familiares e queremos poñer o foco de atención na necesidade de contar cos recursos adecuados para que os coidadores poidan realizar o seu labor compatibilizándoa coa súa vida persoal.
As familias con persoas con demencia ao seu cargo pasaron momentos moi complicados e duros durante o confinamento, á complexidade do momento pola gravidade do virus, engadíanse situacións difíciles pola perda de rutinas, as situacións de soidade, a falta de programas de estimulación, que propiciou un aumento das demencias, e a sobrecarga no coidado.
Por iso, insistimos en que é esencial atender ás familias que teñen unha persoa con demencia en casa. E queremos aproveitar este Día Mundial, para lanzar esa mensaxe sobre a esencialidade dos servizos e das persoas.
Actividades previstas para conmemorar o Día Mundial do Alzheimer:
Entrega de premios da VI Edición do Concurso de Relatos Curtos ‘Nun Recuncho da Memoria’
Foi o Luns, 14 de setembro na sede de Vigo da Deputación coa presencia do deputado Carlos López Font e o presidente de Afaga, Juan Carlos Rodríguez.
Concerto da Coral Casablanca en favor de Afaga.
Foi o venres 18 de setembro, ás 20 horas. Real Club Náutico de Vigo
Conferencia: Título: ‘Covid e persoas con alzhéimer: consecuencias da pandemia’
• Mª JOSÉ MORENO, Neuróloga do Complexo Hospitalario Universitario de Vigo
• ÁGUEDA ROJO, coordinadora da Unidade de Psicoxeriatría da Área Sanitaria de Vigo
Data: 22 de setembro de 2020 ás 19:30 Horas
Lugar: Auditorio do Concello de Vigo. Plaza do Rei, 1. Aforo limitado: 80 prazas.
O Rosal será o escenario sobre o que se desenvolverá ‘Subterránea’, unha performance de Mónica Sueiro que se desenvolve ao abeiro do proxecto ‘Mulleres en acción: Violencia Zero’, unha iniciativa de acción artística da Deputación de Pontevedra que busca empregar o espazo público para reivindicar a igualdade de xénero e poñer o foco de atención no estado actual do problema da violencia machista. Esta espectáculo, de balde e dirixido a público adulto, terá lugar este xoves 24 de setembro ás 12.00 horas na Praza do Calvario.
A directora de escena, actriz, dramaturga, figurinista e pedagoga teatral Mónica Sueiro chegará ao Rosal cunha acción escénica na que a protagonista loita por saír da invisibilidade, reivindicando a súa presenza, conquistando a palabra, recoñecendo os seus propios méritos, facéndose forte e collendo impulso para volver ao seu territorio. Sueiro comeza a súa formación na Aula de Teatro Universitaria de Ourense con Sarabela Teatro, na que compaxina os seus traballos de actriz cos deseños de vestiarios. Dende entón continúa a formarse con grandes profesionais da interpretación, dirección e creación escénica do panorama nacional e internacional. Despois de estar uns anos centrada na dirección de escena e na pedagoxía teatral, retoma o seu proxecto como intérprete atendendo aos códigos escénicos que lle interesan e na procura de novas linguaxes.
‘Subterránea’ forma parte das acción artísticas preparadas para a quinta edición do programa ‘Violencia Zero’ promovido pola Diputación, que emprega a arte como axente mobilizador de conciencias ao tempo que ensalza o empoderamento da muller no campo cultural e artístico. É unha proposta de sensibilización para fomentar na veciñanza unha actitude crítica, visibilizar o traballo das artistas galegas, promover o achegamento á arte contemporánea a través do diálogo con todos os públicos e incentivando a integración de mulleres e homes na loita contra unha realidade que afecta a todos e todas.
“Expectativas desbordadas e unha excelente acollida do público. Estamos encantadas”. Así definiu a presidenta da Deputación, Carmela Silva o “éxito absoluto” do programa “Re-acción nos Castelos” que este verán acolleron os castelos de Soutomaior e Sobroso, mobilizando, a pesar das restricións da covid19, a máis de 800 persoas.
Con “Re-Acción nos Castelos”, unha das iniciativas coas que a Deputación quixo reactivar a actividade cultural na provincia e apoiar ao sector trala pandemia, Soutomaior e Sobroso convertéronse en escenarios inéditos de artes escénicas, música, danza e circo, contacontos, creación contemporánea e música clásica, amais da programación para as crianzas. Diferentes actividades condicionadas polos espazos e aforos e desenvolvidas baixo o estrito protocolo contra a covid19. Foron 14 espectáculos que esgotaron todas as prazas nada máis abrirse a inscrición, tanto as do público infantil como as do adulto.
Remata polo tanto a actividade nos Castelos aínda que a programación de “Re-acción Cultural” se segue a celebrar con “Música no Ar”, o ciclo centrado na música clásica en escenarios espectaculares da provincia como pazos, castelos e conxuntos patrimoniais. O vindeiro sábado 26, será o concerto do Cuarteto de Corda e instrumentos de Vento da Filharmónica de Pontevedra na Praza do Concello de Agolada.
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 4.304 deles 1.148 son da área da Coruña, 689 da de Lugo, 541 da de Ourense, 667 da de Pontevedra, 457 da área de Vigo, 625 da de Santiago, e 177 da de Ferrol.
Do total de pacientes positivos, 32 están en UCI, 211 en unidades de hospitalización e 4.061 no domicilio. Polo de agora, en Galicia hai un total de 16.995 persoas curadas, rexistrándose 718 falecementos. A última persoa falecida en centros hospitalarios foi unha muller de 87 anos que faleceu no Complexo Hospitalario de Ourense e presentaba patoloxías previas.
O número de PCR realizadas é de 431.081.
A Xunta continúa a traballar desde a máxima coordinación interdepartamental e co Ministerio de Sanidade, tamén mantendo o contacto con todos os axentes socioeconómicos de Galicia. Neste senso, Sanidade reitera que segue alerta actualizando todas as medidas e recomendacións e en vixilancia permanente.
Na xornada de onte produciuse un falecemento en centro residencial. Este tivo lugar na residencia de maiores Orpea Coruña (Culleredo)
Os datos de centros residenciais de servizos sociais corresponden aos que achegan con carácter diario os propios centros.
Uso do 061 para casos graves e emerxencias e o 900 400 116 para dúbidas
A Consellería de Sanidade reitera que a cidadanía empregue o número 061 só para emerxencias ou casos graves e aconsella utilizar o número gratuíto do 900 400 116 para consultar dúbidas ou síntomas leves de coronavirus.
Sinalar, ademais, que o Sergas ten a disposición da cidadanía a páxina web https://coronavirus.sergas.gal/ na que se pode consultar información dirixida á poboación, aos profesionais sanitarios e a outros colectivos.
Así mesmo, o departamento sanitario galego ten a disposición da poboación o teléfono 900 400 116, para dar información xeral sobre o coronavirus. Neste número pódense resolver todas as dúbidas da cidadanía ao respecto e tamén consultar sintomatoloxía leve.
Rexistro de viaxeiros no 881 00 2021 e obrigatoriedade do uso da máscara
Lémbrase que as persoas que visiten Galicia nas vindeiras datas e procedan ou estivesen, durante os 14 días previos a súa chegada, nalgún dos territorios con alta incidencia epidemiolóxica incluídos na listaxe publicada Diario Oficial de Galicia, deberán facilitar os seus datos de contacto ao Servizo Galego de Saúde, ben a través do teléfono 881 00 20 21 ou ben a través do formulario da web do Sergas.
Ademais, reitérase o carácter obrigatorio do uso da máscara tanto en espazos abertos como pechados, poñendo especial énfase na súa utilización nos locais e establecementos comerciais e de hostalería.
Recomendacións
Os técnicos da Dirección Xeral de Saúde Pública da Consellería de Sanidade volven reiterar as recomendacións consensuadas entre as comunidades autónomas e o Ministerio de Sanidade, e lembran que, en liñas xerais, aconséllase adoptar as medidas de autoprotección e limitación da diseminación do virus común a calquera infección respiratoria, como a gripe. Así, extremarase a hixiene de mans, lavándoas frecuentemente, especialmente despois de tusir ou soarse, e cubrirase o nariz e a boca cun pano -preferentemente desbotable- ao tusir ou esbirrar, ou se non se dispón de pano, na cara interna do cóbado. Ademais, evitarase tocar os ollos, o nariz e a boca coas mans.
Ainhoa Lameiro e Daniel Pérez culminaron a súa actuación no Europeo de slalom que se está a celebrar en Praga. Daniel Pérez tivo un erro na primeira manga clasificatoria no último remonte a esquerda tendo que ir a repesca. Na repesca, se ben a súa prestación mellorou considerablemente, dous toques deixárono as portas da semifinal ao quedar sexto nesta (só pasaban os cinco primeiros). Destacar que, entre outros grandes atletas, nesta repesca o padexeirto de Alxén tívose que medir ante o campión olímpico Dennis Garghaud Chanut a súa curta de idade de tan só 18 anos.
Ainhoa Lameiro fixo unha actuación impecable na clasificatoria pasando directa a semifinal xa na primeira manga. Na manga de semifinal, nun esixente recorrido a nivel técnico e físico, Ainhoa completou unha sólida manga no que algúns toques e unha pequena pérdida de traxectoria relegaron a nosa canoísta a posición 16ª. Gran actuación da padexeira de Salceda finalizando neste Campioanto de Europa moi cerca das finais.
Na competición por equipos, Ainhoa finalizou en quinta posición mentres que Daniel fixo o propio en séptima posición.
Superorgullosos dos nosos cracks do Penedo Teimporta, levando as cores do club e de España por todo Europa.
O alcalde de Ponteareas Xosé Represas anunciou o próximo acondicionamento dun grande aparcadoiro na rúa Samiento Rivera (fronte ao cuartel da Garda Civil) e outro na rúa Redondela. Represas sinalou que o aparcadoiro de Sarmiento Rivera terá unha superficie de 6.500 m2 que o converterán no aparcadoiro máis grande dos existentes na vila e que poderá acoller máis de douscentos vehículos. Esta nova zona de estacionamento superará en máis do dobre á máis grande existente na actualidade, a da Avenida Rosalía de Castro, de 3.000 m2 e con capacidade para 130 vehículos.
O aparcadoiro que se habilitará a carón da rúa Redondela terá preto de 1.000 m2, unha superficie semellante á do aparcadoiro existente no centro da Avenida de Castelao con 60 prazas dispoñibeis.
Actualmente existen 650 prazas nun total de 8 aparcadoiros de uso público repartidos ao redor do centro urbano de Ponteareas, polo que os dous novos aparcadoiros suporán incrementar o número de prazas existentes en aproximadamente un 50% máis.
Os traballos de preparación dos terreos comezarán a vindeira semana cos labores de desbroce e a intención do goberno local é que en poucas semanas os aparcadoiros poidan estar operativos. O novo espazo de estacionamento de Sarmiento Rivera está a tan só 150 metros e a dous minutos camiñando da Casa do Concello.
Represas salientou que con estas novas actuacións “damos un novo paso de cara a promover a mobilidade sustentábel en Ponteareas, facilitando aparcamento na contorna máis próxima da vila e promovendo os desprazamentos a pé desde eses aparcadoiros a calquera destino do centro urbano”, sinalou Represas. O alcalde lembrou que “desde estes aparcamentos calquera punto da vila se atopa a menos de 10 minutos camiñando”.
A Consellería do Mar participará activamente no desenvolvemento dun exercicio de loita contra a contaminación mariña que terá lugar a vindeira semana en Caminha froito da colaboración da Eurorrexión Galicia-Norte de Portugal, e farano a través do Instituto Tecnolóxico para o Control do Medio Mariño-Intecmar e do Centro Tecnolóxico do Mar-Fundación Cetmar, implicados nos proxectos de investigación responsables desta acción coordinada (Radar on Raia, MyCoast e Meloa).
O evento encádrase dentro do programa de exercicios contemplado no Plan Territorial de Continxencias por Contaminación Mariña Accidental de Galicia (Plan Camgal). Así, xunto ao Instituto Hidrográfico da Marinha Portuguesa (IH) e ao resto dos socios dos devanditos proxectos, estas institucións galegas traballarán na mellora das capacidades de resposta ante este tipo de continxencia, así como no fortalecemento do Observatorio Costeiro da Xunta de Galicia, que é a base dos novos desenvolvementos.
No caso do proxecto Radar on Raia, coordinado pola Fundación Cetmar e coa participación do Intecmar, realizarase a validación da estación Radar HF de Leixões, recentemente integrada no Sistema de HF de Galicia e que nun futuro permitirá coñecer as correntes superficiais en tempo real para a rexión transfronteiriza de Galicia e Norte de Portugal. No marco deste proyecto, no que participa o Intecmar, avaliaranse tamén as boias de deriva (drifters) capaces de seguir o movemento dos primeiros metros da columna de auga.
O exercicio servirá ademais para avaliar a resposta de dous modelos de drifters desenvolvidos polo proxecto Meloa, coñecidos como os drifterswavy littoral, con comunicacións GSM para zonas costeiras, e os drifterswavy ocean, con comunicacións satelitais para o seguimento de vertidos en alta mar. Ademais, utilizaranse os produtos de apoio á toma de decisións desenvolvidos e agregados no ámbito do proxecto MyCoast, entre eles un modelo de derivas e diversos produtos de predición meteo-oceanográfica.
Desenvolvemento do exercicio
O centro de operacións do exercicio, que ten unha duración prevista de arredor de 48 horas, establecerase o 21 de setembro na Capitanía de Caminha. O lanzamento das boias de deriva realizarase fronte á ría de Vigo ou Leixões/Caminha en función das condicións meteo-oceanográficas, e sempre co obxectivo de lograr a maior área de cobertura posible entre Porto e Vigo. Será o martes 22 de setembro grazas ás embarcacións cedidas pola Capitanía de Leixões ou Caminha, se ten lugar en Portugal, ou do Servicio de Gardacostas de Galicia e Salvamento Marítimo, no caso de que se efectúe en España.
Todos os datos enviados polas boias de deriva serán compilados en tempo case real nunha páxina web e, paralelamente, as derivas das boias compararanse cos modelos oceanográficos de apoio á toma de decisións. Ao mesmo tempo realizaranse validacións entre os datos das boias e os datos recollidos polos sistemas Radar HF.
O exercicio culminará cunha rolda de prensa que terá lugar na Cámara Municipal de Caminha o xoves 24 de setembro, cando se presentarán os principais resultados do exercicio e se incidirá na importancia da cooperación transfronteiriza e da observación costeira.
A iniciativa servirá ademais para reforzar a colaboración entre institucións a ambos lados da fronteira, así como entre os tres proxectos implicados, financiados pola Unión Europea a través de distintos programas: Radar on Raia, cofinanciado polo Fondo Europeo de Desenvolvemento Rexional (FEDER) a través do programa Interreg V-A España-Portugal (POCTEP) 2014-2020 e encadrado no eixo prioritario 1 “Crecemento intelixente a través dunha cooperación transfronteiriza para o impulso da innovación”; MyCoast (Interreg Atlantic Area) e Meloa (Horizonte 2020).
O Concello de Tomiño, a través da Oficina Municipal de Información Xuvenil (OMIX), oferta diferentes actividades para os vindeiros meses. Unha vez máis, os idiomas son unha das apostas fortes dirixidas á mocidade do concello, pero tras varias tempadas con cursos de inglés, francés, portugués, italiano, nos últimos anos apostouse por introducir a oferta de idiomas non clásicos, coma o chinés, o ruso e o xaponés, con grande aceptación por parte da cidadanía.
Así, a principios de outubro comezan os novos cursos de idiomas RUSO E XAPONÉS nivel básico, e o de CHINÉS nivel A2.1. As tres actividades formativas teñen aínda aberta a inscrición na páxina web municipal (www.tomino.gal) e serán en formato on-line e presencial, dependendo das circunstancias sanitarias.
Lili Wo, profesora nativa de Shangai e profesora na Universidade de Vigo, é a docente que vai impartir o curso de XAPONÉS BÁSICO os días xoves, de 17.00 a 19.00h. Este curso ten como obxectivo adquirir coñecementos básicos comunicativos: compresión auditiva, lectora, expresión verbal e escrita, estando destinado á mocidade sen coñecementos previos da lingua xaponesa e tendo un custe simbólico de 5 euros.
A mesma docente impartirá o curso de Curso online e/ou presencial de chinés nivel A2.1 dirixido á mocidade que xa ten coñecementos básicos comunicativos da lingua chinesa (A1). Neste curso afondarase máis na cultura e melloraranse os coñecementos en caracteres, léxico, gramática, e traballarase especialmente a comprensión auditiva, lectora, a expresión verbal e a escrita. A data prevista de inicio é tamén o día 1 de outubro, días xoves, de 19.00 a 21.00 horas e o prezo, 5 euros.
Pola súa banda, o cursiño online de Ruso nivel básico, será impartido pola profesora nativa Nina Yarovenko, graduada na Universidade Estatal de Moscú e con amplia experiencia. Está destinado a todas as persoas interesadas en coñecer o idioma e a cultura de Rusia. Inicio, 5 de outubro; días luns, de 19.00 a 20.00 horas. Custe, 5 euros.
Curso básico de correo electrónico online
Por outra banda, impartirase un curso básico de correo electrónico co obxectivo de aprender a crear unha conta de correo electrónico en Gmail, redactar mensaxes, facer filtrado e clasificación de correos, xestionar varias contas, coñecer outros programas de xestión de emails e saber utilizalos de xeito efectivo e produtivo.
A data de realización será a finais do mes de setembro, e o horario será escollido polas persoas participantes. xa que se trata dunha plataforma e-learning cun titor que atende de xeito personalizado as consultas do alumnado. Custe do curso: 5€. A inscrición está aínda aberta e pódese realizara comodamente dende a casa: https://tomino.gal/curso-basico-de-correo-electronico-online/.
Cambio de enderezo da OMIX
A OMIX de Tomiño e o Departamento de Cultura, mudouse novamente ao Campo da Feira coma acostumaba a estar en anos anteriores.
As consultas poden facerse tamén por whatsapp ao número 604 062 369, ou concertar unha cita para o asesoramento por videochamada. Aténdese presencialmente só CON CITA PREVIA.
Unha muller quedou atrapada despois de bater co seu coche contra un muro en Nigrán.
Para liberar á única ocupante do vehículo foi necesaria a intervención dos equipos de salvamento e excarceración, que facilitaron, deste modo, a atención sanitaria.
Foi un particular quen, ás 00:30 horas de hoxe, alertou do que pasaba a través da súa chamada ao 112 Galicia. Isto permitiu activar un operativo que integraban os profesionais de Urxencias Sanitarias de Galicia-061, así como os Bombeiros do Baixo Miño e os membros do GES de Val Miñor, que, finalmente, fixeron fronte á excarceración da ferida para que puidese recibir a asistencia médica.
Ademais, comprobaron o estado do vehículo e descartaron que ardese como apuntaban algunhas das persoas que chamaron ao 112 Galicia para avisar. Iso si, precisaron o lugar no que se produciu o accidente, isto é, na estrada de Camposancos, concretamente, na parroquia de Priegue.
Cómpre indicar que o operativo completárono os axentes da Garda Civil de Tráfico co fin de coñecer as circunstancias do accidente.
Tralo gran arranque do I Ciclo de Conferencias Aida Fernández Ríos coa webinar sobre o cancro a cargo de Xosé Ramón García Bustelo, a Deputación de Pontevedra abre o prazo de inscrición na web (www.depo.gal) para as seguintes seis conferencias que se celebran entre outubro e decembro. Este ciclo, que a Deputación organiza en colaboración coa Real Academia Galega de Ciencias, ten como obxectivo principal achegar a ciencia á sociedade e, debido á pandemia da Covid-19, realízase de maneira on line en formato webinar.
As conferencias, que serán ás 19 horas, están abertas a todos os públicos que desexen informarse sobre temas de actualidade, impartidas por nove destacadas persoas científicas. Deste xeito, o vindeiro 1 de outubro terá lugar a seguinte sesión que estará formada por dúas webinars enmarcadas en sanidade: “Como os nanomedicamentos poden cambiar as nosas vidas”, a cargo da catedrática en Farmacia e Tecnoloxía Farmacéutica María José Alonso Fernández, e “Inmunidade fronte a Covid-19” que impartirá a presidenta da Sociedade Española de Inmunoloxía, África González Fernández. En canto á webinar “Cambio estacional de hora e fuxo horario en España”, chegará o 22 de outubro con Jorge Mira Pérez, catedrático de Electromagnetismo.
Xa en novembro, o día 5 será a quenda dunha conferencia formada por dúas charlas baixo a temática intelixencia artificial: Senén Barro, catedrático da área de Ciencias da Computación e Intelixencia Artificial, impartirá “Os paradoxos da intelixencia artificial”; e Ulises Cortés, catedrático de Ciencias da Computación e Intelixencia Artificial, encargarase de “Humanismo, ética e intelixencia artificial”. Máis adiante, o 19 de novembro terá lugar a webinar “A tecnoloxía das cadeas de bloques: máis alá do bitcoin e contra o coronavirus”, a cargo de Martín López Nores, membro do departamento de Enxeñaría Telemática da Universidade de Vigo. Pola súa banda, o catedrático de Economía Aplicada Luis Caramés será o encargado de impartir a conferencia “Incerteza e ciclo económico” que se celebrará o 26 de novembro. Por último, o 3 de decembro será a quenda dunha sesión formada por dúas charlas que versarán sobre pesca, acuicultura e biotecnoloxía: a catedrática de Bioloxía Concepción Ferreiro impartirá “Microalgas: Microfactorías verdes” e a coordinadora nacional da Área de Ciencia e Tecnoloxía de Alimentos do CSIC Isabel Medina falará sobre “O mar, fonte de saúde: beneficios do consumo dos produtos da pesca e da acuicultura”. Este ciclo de conferencias busca achegar a ciencia ao conxunto da sociedade ao mesmo tempo que lle dá visibilidade ás mulleres deste eido como Aida Fernández Ríos.
O departamento de Medio Ambiente do Concello de Redondela, xestionado por Roberto Villar, ven de sinalizar no paseo do Río Maceiras un niño de Vespa Crabro para que continúe coa función de depredador natural da vespa asiática ou velutina.
Premer a foto para ampliar
Dende que na primeira semana de setembro se recibira en Medio Ambiente o aviso da presenza dun niño desta especie, o S.E.I.S (Servizo de Emerxencias Incendios e Seguridade) de Redondela procedía a balizalo e a comprobar si podía causar problemas de inseguridade. Unha vez pasados os datos, a técnica do departamento de Medio Ambiente apuntou que a vespa crabro é unha especie que non abunda moito e que é un dos poucos depredadores naturais das Velutinas.
Logo de realizar as consultas técnicas pertinentes sobre a vespa crabro e comprobar nas últimas semanas que non houbo ningún tipo de incidencia no paseo balizado, decidiuse dende a parte técnica do Concello conservar o niño balizado para favorecer a reprodución desta especie capaz de depredar as vespas asiáticas ou velutinas.
Así procedeuse a indicar o lugar cun cartel de precaución no que se mencionan unha serie de pautas para non perturbar a tranquilidade das vespas crabro unha especie que está considerada “non agresiva” per que deféndense si se senten atacadas preto do niño, polo que non deben ser molestadas.
Dende Medio Ambiente piden que se respecte o niño e non se lle den golpes o tronco , nin se lle metan cousas dentro.
Os xardíns da Urbanización Regojo, unha das zonas máis novas do casco urbano de Redondela, serán remodelados na súa integridade para ofrecer un novo espazo de lecer á veciñanza e, ao mesmo tempo, para que sexan “un permanente recordatorio da importancia que tivo na historia industrial de Redondela e fábrica que aquí estaba instalada”, afirmou a alcaldesa, Digna Rivas, durante a visita realizada ao espazo a recuperar.
A alcaldesa, acompañada pola concelleira de Urbanismo, María Castro e polo concelleiro de Parques e Xardíns, Alberto Álvarez, recibiu detalladas explicacións do proxecto por parte da directora do obradoiro de emprego ‘Redondela Vila Bela III’, Imelda Barrio Santamaría, cuxo alumnado das especialidades de cantería e xardinería está a realizar os traballos de adecuación ca contorna.
Segundo explicou a directora do obradoiro, trátase dun amplo espazo –ao redor de 3.000 metros cadrados distribuído ao redor da cheminea da antiga fábrica– que pola súa distribución en socalcos ofrece numerosas vantaxe á hora de distribución tanto dos espazos coma dos distintos elementos que irán dentro dos mesmos.
Dado que o obxectivo é dobre, poñer unha nova zona de lecer ao servizo da veciñanza e poñer en valor o a historia industrial de Redondela, todos os elementos, realizados polos alumnos da especialidade de cantería do ‘Redondela Vila Vela III’, están directamente relacionados coa industria téxtil da que Regojo foi un referente a nivel nacional e internacional. Agullas, máquinas, carretes de fío ou as míticas ‘camisas Dalí’ estarán representadas con todo detalle por todo o parque nun excelente traballo do alumnado do obradoiro.
Pola súa banda, o alumnado da especializade de Deseño Gráfico do xa rematado obradoiro de garantía xuvenil ‘Redondela Sotible’ xa elaborara con anterioridade os paneis explicativos que se distribuirán por toda a zona para que a historia desta industria e a súa importancia, non caia no esquecemento. Cómpre salientar, e así figura nos paneis, que nos anos 70, Regojo era a fábrica de camisas máis importante de España, facendo 12.000 camisas diarias, exportando 30.000 unidades a Alemaña mensualmente e cunha rede de máis de 15.000 tendas en toda España.
Los laterais, tamén distribuídos en socalcos, estableceranse dúas zonas de xogos, para maiores e adultos, elaborados en pedra, que contribúen a darlle un novo valor a todo o espazo. Finalmente, a cheminea, que preside toda a zona, poñerase en valor dotándoa de alumeado.
A alcaldesa Digna Rivas, quen gabou o traballo realizado polo alumnado do obradoiro de emprego ‘Redondela Sostible’, amosaba a súa satisfacción pola realización dun proxecto “que ofrece unha nova alternativa de lecer a veciñas e veciños, incrementa os espazos verdes do casco urbano e permite manter viva unha parte da historia industrial do noso municipio”.
A Xunta de Goberno da Deputación de Pontevedra vén de aprobar o gasto de 1,2 millóns de euros destinados a novas subvencións ao deporte das que se beneficiarán un total de 132 clubs da provincia. En concreto, destinaranse 775.000 euros para clubs deportivos que participan en competicións federadas no ámbito nacional, e outros 473.500 para clubs de deportes náuticos, co obxectivo, en ambos casos, de apoiar a súa participación en ligas e competicións oficiais.
No caso dos clubs federados que compiten en ámbito nacional, serán 81 os beneficiados destas axudas. Trátase de entidades de múltiples disciplinas deportivas, como o atletismo, balonmán, ciclismo, judo, tenis de mesa ou voleibol. E, no caso das subvencións ao deporte náutico, destinaranse a 51 clubs de remo, vela e piragüismo. Para os primeiros destinaranse 141.5oo euros, mentres que 71.500 euros serán para clubs de vela e 260.500 euros para os de piragüismo.
A presidenta da Deputación, Carmela Silva, subliñou que este ano a institución destina en conxunto un investimento de máis de 3 millóns de euros ao deporte da provincia, no marco da súa firme aposta por este eido. “Somos unha grande referencia en deporte e queremos seguir apostando para que os clubs teñan os recursos para poder manter a súa actividade, máis agora nestes tempos complicados de pandemia”, destacou.
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 4.350 deles 1.178 son da área da Coruña, 725 da de Lugo, 527 da de Ourense, 658 da de Pontevedra, 440 da área de Vigo, 637 da de Santiago, e 184 da de Ferrol.
Do total de pacientes positivos, 29 están en UCI, 207 en unidades de hospitalización e 4.114 no domicilio. Polo de agora, en Galicia hai un total de 16.758 persoas curadas, rexistrándose 715 falecementos. As dúas últimas persoas falecidas en centros hospitalarios foron varón de 96 anos que faleceu no Hospital Lucus Augusti e unha muller de 85 años que tamén faleceu no HULA. Todos presentaban patoloxías previas.
O número de PCR realizadas é de 426.934.
Na xornada de onte produciuse un falecemento en centro residencial. Este tivo lugar na residencia de maiores DomusVi Lugo (Outeiro de Rei).
Uso do 061 para casos graves e emerxencias e o 900 400 116 para dúbidas
A Consellería de Sanidade reitera que a cidadanía empregue o número 061 só para emerxencias ou casos graves e aconsella utilizar o número gratuíto do 900 400 116 para consultar dúbidas ou síntomas leves de coronavirus.
Sinalar, ademais, que o Sergas ten a disposición da cidadanía a páxina web https://coronavirus.sergas.gal/ na que se pode consultar información dirixida á poboación, aos profesionais sanitarios e a outros colectivos.
Así mesmo, o departamento sanitario galego ten a disposición da poboación o teléfono 900 400 116, para dar información xeral sobre o coronavirus. Neste número pódense resolver todas as dúbidas da cidadanía ao respecto e tamén consultar sintomatoloxía leve.
Recomendacións
Os técnicos da Dirección Xeral de Saúde Pública da Consellería de Sanidade volven reiterar as recomendacións consensuadas entre as comunidades autónomas e o Ministerio de Sanidade, e lembran que, en liñas xerais, aconséllase adoptar as medidas de autoprotección e limitación da diseminación do virus común a calquera infección respiratoria, como a gripe. Así, extremarase a hixiene de mans, lavándoas frecuentemente, especialmente despois de tusir ou soarse, e cubrirase o nariz e a boca cun pano -preferentemente desbotable- ao tusir ou esbirrar, ou se non se dispón de pano, na cara interna do cóbado. Ademais, evitarase tocar os ollos, o nariz e a boca coas mans.
O Concello de Arbo conta xa coa súa primeira vivienda social, logo de ter rematados os traballos de reparación e mellora da vivenda dos mestres da antiga escola de Cequeliños, traballos para os que o Concello recibía unha achega por importe de 8.269 € do Instituto Galego de Vivenda e Solo da Consellería de Medio Ambiente.
A adxudicación do contrato realizábase a principio de ano e os traballos encargábanse a empresa local. As obras de rehabilitación da casa de mestres de Cequeliños, tiveron que se aprazadas durante o estado de alarma o que retrasou un pouco a evolución do proceso. Cómpre salientar que outra das viviendas de titularidade municipal, a casa dos mestres de Sela, tamén foi rehabilitada para a posta en marcha da Casa do Maior que, dende xuño de 2019, da servizo a cinco persoas dependentes.
O obxetivo da recuperación das vivendas de mestres de Cequeliños e poñelas a disposición, en réxime de alugamento, para residencia habitual e permanente para aquelas familias con baixos recursos. Así o anunciou o rexedor da localidade de Arbo, Horacio Gil, quen explicou que unha vez rematada a antiga casa de mestres de Cequeliños “reforzarase a política social” que se esta levando a cabo dende a chegada do seu Goberno ao Concello de Arbo.
“Melloras no SAF, Axudas de Emerxencia social, a Casa do Maior en Sela, a compra de inmoble para Centro Social que se licitara en breve, ou o terreno para a residencia da Terceira Idade, avalan o traballo realizado dende o ano 2014 ata o momento”, conclúe o rexedor local
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 4.365 deles 1.223 son da área da Coruña, 744 da de Lugo, 509 da de Ourense, 651 da de Pontevedra, 431 da área de Vigo, 626 da de Santiago, e 181 da de Ferrol.
Do total de pacientes positivos, 29 están en UCI, 200 en unidades de hospitalización e 4.136 no domicilio. Polo de agora, en Galicia hai un total de 16.525 persoas curadas, rexistrándose 710 falecementos. As tres últimas persoas falecidas en centros hospitalarios foron varón de 93 años que faleceu no hospital privado POLUSA de Lugo, unha muller de 85 años que faleceu no Hospital Lucus Augusti e un varón de 89 anos que faleceu no CHUAC. Todos presentaban patoloxías previas.
O número de PCR realizadas é de 421.776.
Ensino
Casos positivos de Covid-19 relativos aos centros educativos, tanto nas escolas infantís dependentes da Consellería de Política Social, como no resto dos centros de ensino non universitario, dependentes da Consellería de Cultura, Educación e Universidade.
O Concello de Nigrán e a Comunidade de Montes de Chandebrito continuarán coa escavación e musealización do Castro de Chandebrito acometendo traballos para conservar, consolidar e restaurar a muralla superior do primeiro recinto, datada no VIII a.C. Con este obxectivo o Concello tramitou xa unha subvención por importe de 13.000 € á Deputación de Pontevedra destinada á rehabilitación e sinalización do patrimonio histórico-cultural. O goberno local continúa deste xeito os traballos de escavación que iniciou no 2019 a través da cooperativa Árbore Arqueoloxía coa meta de situar este Castro como referente etnográfico en toda Galicia.
Esta segunda actuación, conforme á propia autorización de Patrimonio e e tamén a cargo de Árbore, suporá restaurar un tramo de aproximadamente 110 metros cadrados de muralla localizados na terraza superior e que quedaron parcialmente á vista nas escavacións promovidas desde o Concello o ano pasado en 58 metros cadrados onde se atoparon tres construccións diferentes e outras dúas murallas a maiores. “Pedimos esta subvención para consolidar a muralla máis antiga, a primixenia, pero non descartamos máis actuacións complementarias neste ano e o vindeiro, o potencial é enorme e non queremos desaproveitalo”, indica Juan González, alcalde de Nigrán, quen incide que o obxectivo final é musealizar ao aire libre toda a cima do Castro mediante sucesivas actuacións. “Estamos máis que satisfeitos cos traballos desenvolvidos por Árbore no 2019, grazas a eles temos un claro camiño a seguir para ir descubrindo paso a paso esta cima”, incide González.
“
Entre os achados documentados destacan miles de fragmentos de cerámica de diferentes periodos históricos, o que sitúa a Chandebrito como un referente etnográfico de toda Galicia
O Castro de Chandebrito foi oficialmente escavado no 2008 nunha pequena intervención que permitiu situalo como habitado entre os séculos VI a.C ao II a.C, sen embargo, a nova investigación realizada no 2019 por Árbore Arqueoloxía a instancias do Concello de Nigrán amplía a ocupación do VIII a.C ao I d.C. É dicir, ten a súa orixe a finais da Idade de Bronce, nos inicios da cultura castrexa que tres séculos máis tarde se espallaría por toda Galicia dando lugar á maioría dos asentamentos coñecidos. Así o certifican as decenas de pezas atopadas (fusos de fío, lá e liño, pedras de afiar, pezas de metal, unha conta púnica…) e os miles de fragmentos de cerámica de diferentes épocas da Historia e moi ben conservadas, algunhas delas con decoración profusa (apareceron desde ánforas romanas ou fenicias que certifican o comercio dos habitantes de Chandebrito cos pobos mediterráneos a cerámica propiamente castrexa). “Esta nova escavación quedará totalmente á vista, polo que dará unha idea clara ao visitante de como era o Castro na súa orixe, que segundo os diferentes achados podemos situar no S. VIII”, explica Benito Vilas, un dos arqueólogos responsables.
“Estamos ante o gran tesouro patrimonial de Nigrán e da comarca. O potencial deste castro é maior do que xa se supoñía; dende o Concello seguiremos promovendo novas fases de escavación porque sabemos que este é o camiño para que sexa un referente etnográfico de toda Galicia”, destaca o alcalde, Juan González, quen incide en que, despois dos incendios, “todos comprendemos que a cultura, o respecto ao medio ambiente e a actividade económica deben ir sempre da man” por iso dende o goberno local se aposta por facer investimentos como a musealización deste espazo único con increíbles vistas á ría de Vigo ou a creación do primeiro parque forestal da comarca en terreos queimados das parroquias de Camos e Chandebrito.
O Concello de Baiona, en colaboración cos centros educativos do municipio, implantou unha serie de medidas para protexer á comunidade escolar ante a actual situación sanitaria. Entre as medidas levadas a cabo atópase a distribución de espazos nos centros polo que dende o Concello axudaron nesta tarefa mediante a cesión de valos, que permiten a correcta circulación e disposición do alumnado.
Doutra banda, entre as novas medidas orientadas a conseguir centros seguros procedeuse á recolocación do mobiliario das distintas estancias dos colexios, para manter a distancia mínima interpersoal esixida.
Durante os meses de verán o Concello de Baiona estivo traballando para preparar a volta ás aulas, sempre pendentes das actualizacións das directrices marcadas pola Xunta. Con todo, pola situación excepcional que se está vivindo, este ano tivéronse que intensificar as tarefas nos colexios, así como apostar por novas medidas cuxo fin é garantir que os centros educativos sexan lugares seguros para toda a comunidade educativa.
O concelleiro Óscar Martínez destaca que este labor é posible grazas aos operarios municipais, que teñen que deixar as súas ocupacións habituais para colaborar coas escolas. “A prioridade nestes días –sinalou Martínez– ten que ser a mellor protección posible para as nenas e os nenos de Baiona”.
Pola súa banda, o concelleiro de Educación, Óscar Carreño, explicou que os centros precisan axuda para poder botar a andar un curso que se prevé moi complicado, e o Concello está a colaborar para que este desenvólvase correctamente, “aínda que as competencias na implantación destas medidas sexan autonómicas e non municipais”.
O Concello de Nigrán abre do luns 21 de setembro ao sábado 26 o prazo de inscrición para as actividades deportivas municipais e culturais, que arrancarán o 5 de outubro e se manteñen igual que o ano pasado pero cun aforo reducido de entre un 50% e 30% en grupos de como máximo 10 persoas e cun protocolo específico de seguridade supervisado polo Servicio de Prevención de Riscos Municipal. Igualmente, habilitaranse grupos matinais de persoas maiores de 65 anos para Ioga, Zumba e Mantemento. Os prezos, as bonificacións e o tipo de actividades continúan igual e en todos os casos deberán desenvolverse con emprego de máscaras en todo momento.
A inscrición para as actividades deportivas (ioga, ximnasia de mantemento, ximnasia de terceira idade, aerobic-step, taichi, taekwondo, pilates, zumba, tenis) levarase a cabo na Oficina de Turismo de Gaifar (Panxón) en horario de 10:00 a 14:00 e de 16:00 a 20:00 de luns a venres e o sábado de 10:00 a 14:00. Estas se terán lugar, sempre que a climatoloxía o permita, ao aire libre no espazo deportivo de Gaifar. Pola súa banda, as inscricións para as culturais (música, cerámica, torno e pintura) serán tamén do día 21 ao 26 de setembro no Auditorio Municipal de 10:00 a 14:00 de luns a venres. En ambos casos as prazas se cubrirán por rigorosa orde de inscrición.
O Concello de Nigrán manterá un estricto protocolo de seguridade sanitaria con control de temperatura ao inicio da actividade, distancia de seguridade, realización de test periódicos aos monitores, desinfección de mans… Precisamente por criterios de seguridade sanitaria, a sala de máquinas permanecerá pechada.
As actividades finalizarán o 31 de maio e, tal e como sucedeu neste curso pasado, os poderán suspenderse xerando o dereito de devolución dos meses non disfrutados.
A Concellaría de Vías, Obras e Alumeado, que dirixe Chus Garrote, vén de adxudicar o proxecto de ‘Amplicación de potencia e reforma da instalación eléctrica do centro de transformación do Complexo Deportivo Álvaro Pino”, proxecto adxudicado por 32.653,28 € e permite unha importante mellora na seguridade e protección das instalacións.
A concelleira visitou as instalacións co responsable da empresa xestora, Insdega, para deseñar os tempos de desenvolvemento de execución da mellora que en ningún momento interferirá coa actividade diaria do complexo.
Arredor de dous mil usuarios/as empregan as distintas instalacións do complexo deportivo Álvaro Pino formadas por dous pavillóns, o ximnasio, a pista de padel e a piscina. Ademais, o complexo acolle multitude de torneos e competicións deportivas nas que participan deportistas de toda a península.
“Seguimos centrados na mellora dos espazos, instalacións e servizos que ofrecemos á cidadanía e que son de todas e de todos nós. Seguimos contruíndo unha cidade que aposta polas persoas e pola sostibilidade na liña marcada pola nosa estratexia de crecemento Ponteareas, habitat saudable”, explicou Chus Garrote.
Estas obras contan co apoio da Deputación de Pontevedra a través do Plan Concellos e co financiamento tamén dos fondos propios do Concello.
Remataron as obras de mellora de camiños municipais de acceso a parcelas agrícolas nos lugares de Ladeira, As Cales e Vilar, na parroquia de Chenlo, segundo informa a Concellería de Infraestruturas que dirixe Pedro Pereira.
Estas obras consistiron na mellora do firme e da drenaxe. Realizáronse cunetas novas para a recollida de augas pluviais e os camiños pavimentáronse con aglomerado quente de 5 cms de espesura.
Mellora de camiños rurais
Pereira manifestou que “estes camiños atopábanse en moi mal estado e a súa reparación propúxose pola concellería de Infraestruturas para acollerse a estas subvencións da AGADER”.
A actuación tiña un orzamento de 49.000 € e o Concello do Porriño recibiu unha subvención da AGADER (Axencia Galega de Desenvolvemento Rural), outorgada e confirmada o pasado mes de agosto.
Despois de escoitar as recomendacións do Comité Clínico, en canto a evolución do número de casos activos durante esta última semana, Sanidade decide poñer fin as restricións que anunciara o pasado 11 de setembro. O anuncio farase público no DOGA e terá vixencia a partir das 0:00 h do sábado 19 de setembro.
A última comunicación da situación epidemiolóxica na Guarda, realizada na tarde do xoves 17 de setembro, elevaba a 22 o número de casos activos, 8 menos que fai unha semana. Así mesmo Sanidade comunicaba que hai 53 casos aos que se lle está facendo estreito seguimento.
O concello seguirá mantendo para este sábado a medida de prevención de non celebrar o mercadillo, salvo cos postos de alimentación e flores. No caso de manterse a evolución epidemiolóxica desta semana, o próximo sábado día 26, celebrarase de novo o mercadillo completo, tendo sempre en conta as medidas de prevención recomendadas.
A vindeira semana A Guarda acolle as celebracións do Día de Santa Trega(festividade local -23 Set), que neste ano tan atípico, e ante as medidas de prevención motivadas pola pandemia da COVID-19, terán que realizarse dun xeito distinto.
As misas, que tradicionalmente se celebran na ermida no Monte de Santa Trega, celebraranse na Igrexa Parroquial e con limitacións de aforo tal e como ditan as normas sanitarias vixentes, non se realizarán as Poxas de produtos típicos nin a procesión.
A Ermida de Santa Trega estará aberta ao público nesta xornada para todos os fieis e devotos que desexen facer as súas ofrendas, sempre respectando as distancias de seguridade, o uso obrigatorio de máscaras de protección e hidroxel.
Como en anteriores ocasións, o concello insta a cumprir as medidas de prevención a toda a poboación: uso da mascarilla, hixiene de mans e o mantemento da distancia social, sobre todo tendo en conta que co comenzo da actividade escolar aparecen novos factores de risco. Dende o concello queremos trasladarlle ás familias que reforcen as medidas de precaución cos cativos, prestando especial atención a aparición de febre.
O mercado semanal que cada xoves se celebra en Tui cumpre coas medidas de seguridade establecidas polas autoridades sanitarias e o 100 % dos postos que acoden ao mesmo están regularizados. Dende que retomou a súa actividade o pasado 18 de xuño, tras o parón debido ao estado de alarma, o mercado semanal celébrase agora na prolongación da rúa Casal Aboy e nos terreos das antigas instalacións de Cam-Fran.
O goberno municipal apostou na súa reapertura polo cambio de ubicación para garantir que puideran regresar os 160 postos autorizados cumprindo a normativa establecida, que recolle entre outras medidas a distancia mínima entre postos.
Dende o Concello apostouse por un mercado seguro co establecemento de xel hidroalcólico nas entradas e saídas do mercado, fixando un sentido de tránsito único con percorridos separados por valos e cinta e marcando unha separación de 6 metros con respecto ao posto situado enfronte e coma mínimo metro e medio co lateral. Amais nas inmediacións habilitouse un aparcamento gratuíto para facilitar a asistencia de público.
Amais dende o Concello fixouse coma obxectivo que todos os vendedores e vendedoras acudirán en igualdade de condicións no referido ao pago das taxas municipais. Por este motivo no momento de retomar a actividade do mercado comunicóuselle aos vendedores ambulantes que acumulaban débedas dende 2019 que dispuñan dun prazo improrrogable de 30 días para regularizar a súa situación, ou en caso contrario, segundo o recollido na ordenanza municipal, revogaríase a autorización do posto por incumprimento das condicións establecidas.
Transcorrido ese prazo o 97,5% dos 160 postos regularizaron a súa situación segundo explica a concelleira de Comercio e Mercado, Ana Mª Núñez, quen sinala que “isto deixa de manifesto claramente que o mercadillo de Tui cumpre as súas expectativas de venda”. A edil salienta a implicación do goberno municipal para garantir a continuidade do mercado dun xeito seguro e en condicións de igualdade para todos os vendedores e vendedoras.
Amais na última mesa de traballo coas asociacións representativas dos vendedores ambulantes da provincia que acoden os xoves a Tui xurdiron novas propostas que están a ser estudadas. A concelleira de Mercado, Ana Mª Núñez, agradece a implicación dos vendedores ambulantes para que o de Tui sexa un mercado seguro e digno, e un referente en modelo de venda ambulante. Tamén agradece a súa entrega e bo facer ao equipo técnico, persoal municipal, e Policía Local.
A directora xeral de Saúde Pública da Consellería de Sanidade, Carmen Durán Parrondo, presentou hoxe, na compaña do director xeral de Asistencia Sanitaria do Sergas, Jorge Aboal Viñas. a campaña de vacinación da gripe 2020, que ten como obxectivo xeral diminuír o número e a gravidade das complicacións derivadas do padecemento desta enfermidade, minimizando o efecto na saúde mediante a súa prevención. A tal efecto, o departamento sanitario galego vai investir 3,2 millóns de euros.
Tal e como destacou a directora xeral, outros obxectivos específicos da campaña, que arranca o día 13 de outubro e remata o 31 de decembro, por tanto, 12 semanas de xeito continuado, é acadar unha cobertura na poboación de 65 ou máis anos e nos traballadores sanitarios do Sergas igual ou superior ao 75%. No caso das mulleres embarazadas e persoas con condición de risco, o obxectivo de cobertura sitúase unha porcentaxe igual ou superior ao 60%.
Sanidade lembra a importancia de vacinarse este ano fronte á gripe, xa que, no contexto da pandemia pola covid, poden coincidir ambas infeccións, de aí o trascendental da vacinación antigripal das persoas en risco e a redución da carga desta enfermidade.
A Consellería de Sanidade mercou inicialmente un total de 617.500 doses, e o resto das doses, ata completar o total de 865.830, son subministradas polo Ministerio de Sanidade (248.330). O total de doses deste ano supón 200.830 máis que no ano anterior.
A directora xeral destacou que, respecto das coberturas fronte á gripe no pasado ano, Galicia, cun 60,42%, sitúose 6,5 puntos por riba da media nacional, e subliñou que manterase a indicación de vacinación ao persoal sanitario do Sergas dende unha semana antes do inicio da campaña xeral, por tanto para este colectivo comezará o 5 de outubro.
Incidiu Carmen Durán en que a campaña conta con 900 puntos de vacinación, entre centros de primaria e hospitalaria do Sergas, centros médicos e consultas privadas, residencias da 3º idade públicas ou privadas, centros penitenciarios, unidades de atención aos drogodependentes, centros de menores e discapacitados, etc.
Poboación diana
A poboación diana da campaña á que se lle oferta gratuitamente a vacina son as persoas de 60 ou máis anos, especialmente os de 65 ou máis anos ou as que convivan en institucións pechadas (residencias de persoas maiores e outros centros de atención e crónicos).
Tamén son poboación diana da campaña as persoas de menos de 60 anos que teñen un risco de complicacións derivadas da gripe, presentado esta campaña como novidade as mulleres durante o puerperio (ata 6 meses tras o parto), sempre que non se vacinarán no embarazo.
Son igualmente poboación diana as persoas que lles poden transmitir a gripe a outras con alto risco de complicacións. Trátase de persoal de centros sanitarios de primaria e hospitalaria, públicos e privados, de oficinas de farmacia, de institucións xeriátricas e de atención a enfermos crónicos, estudantes en prácticas en centros sanitarios, asistentes domiciliarios de pacientes de alto risco ou persoas maiores, así como convivintes de persoas de grupos de risco.
Outras persoas nas que se recomenda a vacinación son as que desenvolven traballos esenciais para a comunidade e os traballadores expostos directamente a aves ou porcos nas granxas ou explotacións avícolas ou porcinas e tamén ás aves silvestres.
Remarcar que, por primeira vez, Galicia empregará nesta campaña unha vacina tetravalente de alta carga para as persoas máis vulnerables, aquelas de 65 ou máis anos ingresadas en residencias.
Sinalar, así mesmo, que entre a loxística da campaña está o feito de que a partir da terceira semana da campaña realizarase unha chamada por parte dos profesionais de enfermería de atención primaria á poboación de 65 a 74 anos. Ademais, enviaranse sms masivos de recordo de vacinación á poboación entre 65 e 74 anos, estableceranse axendas de citación especial para vacinación e vacinaranse aos enfermos crónicos nas visitas a domicilio. Por último, o Sergas lembra a importancia, este ano máis que nunca, de concertar cita para a vacinación nos centros de saúde e non acudir directamente sen ser citado.
O club natación Ponteareas e o complexo deportivo Álvaro Pino retoman a súa axenda de competicións e eventos e convidan a gozar da celebración do XXI Trofeo Amizade que terá lugar esta fin de semana na piscina municipal. A empresa xestora do complexo acordou celebrar este trofeo a porta pechada para garantir a seguridade sanitaria tanto das e dos propios participantes como das usuarias e dos usuarios habituais da piscina municipal que non poderán adestrar mañá sábado ao estar só aberta para os e as participantes no trofeo.
“Seguindo a liña fixada dende o comezo da pandemia, daremos prioridade á seguridade sanitaria por iso para prexudicar o menos posible aos nosos usuarios habituais abriremos a piscina o vindeiro domingo día 27 de setembro para que poidan recuperar este sábado no que a piscina se pecha para que se poida celebrar o Trofeo Amizade”, explica o xerente de INSDEGA.
Co obxectivo de minimizar riscos e a pesar de que no mes de setembro a piscina non abre os domingos, a empresa xestora toma esta medida excepcional de abrir o domingo 27 para que este sábado non coincidan nas mesmas instalacións os e as participantes no torneo cos e coas nadadoras habituais da piscina municipal.
Neste trofeo participarán clubs de distintas localidades galegas: Boiro, Pontevedra, Coruña, Lugo, Arteixo, Ourense e Vilagarcía. Cun formato diferente 11 equipos galegos e preto de 200 nadadores e nadadores van competir na primeira proba que se celebra en piscina tras a interrupción producida pola crise sanitaria no mes de marzo, contando cun sistema de cronómetro electrónico.
Para que todas e todos poidamos gozar deste espectáculo deportivo a competición do sábado, en categoría absoluta, vaise retransmitir por streaming na ligazón:
O CNPonteareas agradece ao Concello de Ponteareas, a Protección Civil e aos patrocinadores locais o esforzo e a colaboración para que con todas as medidas de protección e seguridade sanitaria saia adiante con éxito.
A alcaldesa de Redondela e concelleira de Igualdade, Digna Rivas, asinou esta mañá a adhesión do Concello ao manifesto ‘Bibliotecas en Igualdade’, un proxecto posto en marcha pola ‘Asociación Clásicas y Modernas’, asociación de carácter nacional que ten como obxectivo acadar a igualdade no eido da cultura.
No acto de sinatura, a alcaldesa estivo acompañada polo concelleiro de Cultura, Daniel Boullosa e por Mariana Carballal, socia e representante en Galicia da Asociación Clásicas y Moderna e, de xeito telemático dende Madrid, pola secretaria xeral da asociación, Marina Gilabert.
Coa sinatura deste convenio que terá validez ata 2022 e que conta co financiamento do Ministerio de Cultura, o Concello de Redondela comprométese a activar unha mirada crítica coa perspectiva de igualdade no eido das bibliotecas e a contribuír a dar unha maior visibilidade ás escritoras.
Do mesmo xeito promoverase a adquisición de obras de lectura e consulta procurando equilibrio na autoría para reparar o esquecemento e facilitar o acceso ás novidades asinadas por homes e mulleres. Igualmente potenciarase a cooperación e creación de alianzas entre bibliotecas e outros axentes implicados para a optimización dunha nova perspectiva que acabe coa fenda de xénero.
Redondela convértese na terceira institución galega que participa neste proxecto xunto co Concello de Verín e a Universidade de Vigo. “Non podía ser doutro xeito –afirmou a alcaldesa Digna Rivas– nun concello que ten a igualdade por bandeira e que loita, día a día, por que non sexa só unha palabra senón unha actitude de toda a veciñanza”.
Esta iniciativa, na que o Concello participará con persoal político e técnico das concellerías de Igualdade e Cultura, é plenamente coincidente coa ‘transversalidade’ que o Goberno local busca en todas e cada unha das súas accións, xa que o traballo de ‘Bibliotecas en Igualdade’ integrará tamén ás concellerías de Educación, Servizos Sociais, Maiores, Normalización Lingüística e Mocidade, amais de axentes externos como centros educativos, servizos sociais e colectivos culturais e veciñais.
Trátase, explica Rivas, “de involucrar a toda a cidadanía na loita pola igualdade para poder seguir construíndo unha sociedade máis xusta”.
Como remate ao acto oficial de sinatura, as actrices Casilda Alfaro e Sonia Rúas interpretaron a lectura dramatizada dun fragmento de Voaxa e Carmín de Ester Carrodeaguas.
O Concello de Salvaterra de Miño continua co seu labor de integración tras poñer en marcha un Plan de Emprego 2020 financiado con 167.149,40 euros pola Diputación de Pontevedra que arrincou en marzo.
Gracias a esta subvención o concello contratou a 15 novos traballadores e traballadoras municipais ao amparo da Liña 3 do Plan Concellos 2020.
As persoas contratadas en diferentes postos e categorías están a dedicarse a labores de conservación e funcionamento de bens e servizos municipais, tal e como recollen as bases reguladoras da convocatoria do plan.
A concellería de Mobilidade e Tráfico informa da entrada en vigor da redución da velocidade máxima de circulacion na Avenida de Castelao a 30 km/h. A medida, autorizada pola Xunta de Galicia que é titular do vial, persegue mellorar a seguridade vial e reducir a contaminación e adiántase á previsión anunciada pola Dirección Xeral de Tráfico de reducir por lei a velocidade máxima en vías urbanas a 30 km/h como máximo.
Esta medida complementa a adoptada xa no mes de maio consistente en reducir a velocidade no resto das vías urbanas de titularidade municipal a 20 km/h dando as mesmas carácter residencial e, polo tanto, prioridade peonil en calquera punto da calzada.
Esta redución de velocidade para incrementar a seguridade vial e, especialmente, das persoas que camiñan ou circulan en bicicleta, engádese a outras actuacións de mellora da mobilidade peonil e da seguridade realizadas nesta avenida nos últimos meses. Por unha banda retiráronse das beirarrúas cinco terrazas de hostalaría que se reubicaron en zonas de estacionamento, asemade procedeuse á retirada de tres postes de media tensión en desuso desde hai anos que se atopaban no medio das beirarrúas e pintáronse cinco pasos de peóns para dar continuidade aos itinerarios peonís das beirarrúas (nos cruces coas rúas San Roque, Perillana, acceso ao Santiago Apostol, Ramiro Sabell e a carón do parque infantil da Avenida de Castelao).
O artista invidente Serafín Zubiri, acompañando pola pianista e profesora do conservatorio de Gondomar Brenda Vidal e a Banda de Música de Vincios, despedirán este sábado 19 de setembro o verán no campo de fútbol de Lourido (Nigrán, 21:00 horas) co concerto inclusivo “Lembrando a Nino Bravo”. Con esta unión de talentos musicais exposta ex-profeso para a ocasión desde ‘Un Nigrán para todos’ o Concello adianta a celebración do Día Internacional das Persoas Xordas do día 26 de setembro.
“É unha honra recibir a Serafín Zubiri en Nigrán e máximo se o fai acompañado pola Banda de Música de Vincios e a pianista Brenda Vidal, será unha noite inesquecible chea de emocións e dedicada especialmente ás persoas con diversidade. Consideramos que non pode haber mellor maneira de concluír o verán”, sinala o alcalde, Juan González, quen incide en que, como en cada concerto, as mochilas vibratorias estarán ao dispor de toda aquela persoa que as solicite a través do mail [email protected] ou no whatsapp 690679675. O evento gratuíto contará con todas as medidas de seguridade e limite de aforo.
O ano pasado, xunto a 20 persoas con diversidade funcional, Zubiri realizou o Camiño Francés a Santiago coa axuda da tecnoloxía GPS co obxectivo de facer “accesible” o roteiro a persoas con algún tipo de discapacidade, foi nesa ocasión onde probou por vez primeira as mochilas vibratorias do Concello de Nigrán e onde fraguou xunto ao propio rexedor (participante no último tramo) a idea deste concerto inclusivo. O espectáculo, co que percorreu máis de cen localidades do país, está estruturado en tres bloques nos que se fai un percorrido cronolóxico polas cancións máis coñecidas dos cinco discos que se editaron de Nino Bravo. Entre cada bloque, a banda interpretará unha canción instrumental e proxectaranse imaxes dos momentos máis importantes da carreira do valenciano. “A idea é crear un clima emocionante onde Zubiri, representante de España en Eurovisión en 1992, repasará temas emblemáticos do tamén eurovisivo Nino Bravo, como Che quero, quéroche; Noelia; Un bico e unha flor; América; Libre…”, explica González.
A vida de Serafín Zubiri estivo protagonizada pola superación a través da música e o deporte. A súa cegueira de nacemento non lle impediu sacar adiante a súa carreira como artista –editou oito discos– e fraguar un gran currículo deportivo. De feito, en 1992 foi elixido para representar a España en Eurovisión coa canción “Todo isto é a música”, e no nadal dese mesmo ano interpretou o tema central da banda sonora da película de Disney A bela e a besta. No ano 2000 representou a España por segunda vez no Festival da Canción con “Colgado dun soño”, sendo seleccionado por votación popular. Como deportista, fixo incursións en distintas disciplinas, como submarinismo, paracaidismo, salto desde pontes… Aínda que especialmente atletismo e montañismo.
“É un exemplo para todos de superación e o mellor representante que podemos ter para este concerto inclusivo que expomos desde o grupo de traballo ‘Un Nigrán para todos’”, resume González, quen agradece a enorme disposición para unir talentos das tres partes: Zubiri, Banda de Música de Vincios e Brenda Vidal.
“Seguimos a apostar para que non se deteña nada que teña que ver con promover a igualdade”, asegurou a presidenta da Deputación no lanzamento da quinta edición dos Premios Sofía Novoa. Estes galardóns, que impulsou o goberno de Carmela Silva fai catro anos, premian a integración da perspectiva de xénero nos traballos universitarios de Fin de Grao e Fin de Máster defendidos e aprobados nos campus de Pontevedra e Vigo da Universidade de Vigo durante o curso 2019/2020. As bases desta nova edición, que repartirá premios por valor de 5.200 €, véñense de publicar hoxe no Boletín Oficial da Provincia, manténdose aberto o prazo de inscrición ata o 2 de outubro.
Carmela Silva destacou o dobre obxectivo deste premios que valoran “a innovación, estudio, investigación, propostas de traballo para conseguir a igualdade”, pero tamén “visibilizan a Sofía Novoa, unha muller moi avanzada no seu tempo, pedagoga, música, que estivo na Residencia de Señoritas de Madrid, onde moitas mulleres do primeiro terzo do século XX puideron ter unha formación educativa que lles permitiu ocupar moitos espazos de referencia”.
A edición deste ano dos Sofía Novoa entregarán dous premios de 1.000 € e un accésit de 600 euros tanto na modalidade de Traballos Fin de Grao como de Máster. As persoas gañadoras serán avaliadas de xeito anónimo, xa que os traballos non poderán conter ningún elemento identificativo, por un xurado integrado por persoas da administración provincial e da Universidade de Vigo. En liñas xerais, o xurado analizará a calidade do traballo, a relevancia e carácter innovador da súa temática e metodoloxía, a aplicabilidade práctica das achegas do estudo, o uso da linguaxe inclusiva e da lingua galega, así como o emprego de referencias e fontes bibliográficas. Na última edición dos Premios Sofía Novoa obtiveron galardóns na modalidade de Fin de Grao Karen Giselle Engster, de Salceda, por “Constitución Española inclusiva. Estudio previo y propuestas de redacción”; Cristina Pérez, de (Pontevedra, por “Trabajar con perspectiva de género a través de la metodología por proyectos en la Educación Infantil”; e Antía Álvarez, de Vigo, por “Menores transexuales en el ámbito educativo”. No caso dos Traballos Fin de Máster os premios foron para Marta Molina, de Vigo, por “Sensibilización e formación en igualdade de xénero do profesorado de FP”; Rut Guinarte, de Redondela, por “Mediando a temática do traballo de coidados na aula de inglés: co-construíndo novas realidades igualitarias”; e Fernando Miguel Otero, de Vigo, por “A situación do alumnado trans no Ensino Secundario de Galicia”.
Un total de 150.141 estudantes comezarán a partir do vindeiro 23 de setembro –de xeito gradual por mor da pandemia da covid-19– as clases na educación secundaria obrigatoria (ESO), bacharelato e ensinanzas de réxime especial (ensinanzas para adultos, artísticas e deportivas), segundo os datos provisionais recompilados polos servizos estatísticos da Consellería de Cultura, Educación e Universidade. Cómpre lembrar que as cifras de matriculación son moi similares as do curso 2019/2020 e non serán definitivas ata dentro dunhas semanas, dado que aínda nos últimos días se realizaron exames de recuperación en secundaria. Ademais, esta cifra non inclúe os datos de matriculación en Formación Profesional, ensinanzas nas que aínda é posible matricularse.
A Xunta de Galicia vén de publicar no Diario Oficial de Galicia a Orde pola que se ditan instrucións sobre o comezo do curso académico 2020/2021, a través das que se dota de seguridade xurídica ás últimas decisións tomadas neste eido, principalmente o adiamento do inicio do curso en Secundaria, a nova distancia xeral de seguridade de 1,5 metros e a opción da semipresencialidade. Cómpre lembrar que todas estas medidas foron acordadas tras a reunión conxunta da Conferencia Sectorial de Educación e do Consejo Interritorial del Sistema Nacional de Salud (o pasado 27 de agosto), da reunión do Consello Escolar de Galicia (o 9 de setembro) e do encontro coa Xunta Autonómica de Directores, os representantes dos centros de Secundaria e os xefes da Inspección educativa nas catro provincias (o pasado 11 de setembro).
Calendario
No que atinxe ás datas concretas do regreso gradual ás aulas, o 23 de setembro volverán os alumnos de 1º e 2º de ESO e os de 1º de Bacharelato, 1º de FP de grao medio e 1º de FP de grao superior e as ensinanzas básicas de educación para persoas adultas polas modalidades presencial e a distancia. O día 24 de setembro farano os de 3º de ESO, de 2º de Bacharelato, 2º de FP de grao medio e 2º de FP de grao superior. Finalmente, o día 25 incorporarase o alumnado de 4º de ESO, e todos os cursos de FP Básica.
No caso das ensinanzas de réxime especial, o alumnado das ensinanzas profesionais de Artes Plásticas e Deseño e das deportivas incorporarase nas mesmas datas establecidas para os estudantes de FP. O alumnado das demais ensinanzas de réxime especial incorporarase a partir do 23 de setembro de acordo cos calendarios de organización e funcionamento dos centros.
Contratación de profesorado
Malia manter practicamente o mesmo número de alumnado, o curso comeza coa incorporación de arredor de 2.000 novos profesores ao sistema de ensino público, o que supón un incremento do 6,2% sobre a plantilla total de profesorado para este curso.
Dos preto de 2.000 novos profesores, 1.107 serán para as etapas de ESO, Bacharelato e Formación Profesional (847 para reforzar as medidas de seguridade contra a covid e 260 que se incorporan para atender o incremento de oferta); 240 son para Infantil e Primaria (que xa están contratados e traballando nos centros) e 543 son novos docentes de apoio a través do programa ARCO de reforzo educativo (221 para Primaria e 322 para Secundaria).
Outras medidas
Cómpre lembrar que, a maiores do reforzo do profesorado, a principal para garantir a seguridade sanitaria e a calidade educativa nos centros, a Xunta de Galicia tomou outras adicionais para facilitar a xestión e organización do inicio do curso nos centros de Secundaria, tales como o devandito adiamento nunha semana do comezo do inicio das clases, a opción de solicitar a semipresencialidade para Bacharelato e FP o incremento das accións formativas dirixidas a profesorado e alumnado en materia hixiénico sanitaria, ou a posibilidade de instalación de mamparas protectoras en aulas e talleres, todas elas recollidas na Orde publicada no DOG.
Neste sentido, a orde indica que, de non ser posible manter a distancia de seguridade indicada para estas etapas, (e non puidesen atoparse outras solucións como a retirada de material ou o uso doutras aulas máis amplas), previa autorización da inspección educativa, poderá optarse por opcións como o desdobre do grupo de alumnos (xa realizado nas últimas semanas), a instalación de mamparas ou separacións que garantan a protección individual do alumnado ou os desdobres do grupo de alumnos, ou a semipresencialidade rotatoria (agás na ESO). Tamén se especifica que nos talleres de formación profesional e ensinanzas de réxime especial, cando proceda, se adoptarán medidas de seguridade usando pantallas de protección facial.
No referido á semipresencialidade, a orde indica que a actividade lectiva será presencial con carácter xeral para todos os niveis e etapas do sistema educativo, con prioridade para o alumnado de menor idade e que, excepcionalmente, poderán impartirse semipresencialmente as ensinanzas de bacharelato, formación profesional, así como as ensinanzas de réxime especial.
Ademais, a orde recolle a realización de accións formativas para o profesorado, tanto no relativo ás ferramentas tecnolóxicas para docentes como ás ferramentas institucionais para o ensino mixto.
ESO
Segundo as estimacións e datos provisionais da Xunta de Galicia, 94.664 alumnos e alumnas comezarán o curso en ESO, o que supón un 1,5 % máis ca no curso 2019/20.
Por tipo de centros e por provincias queda do seguinte modo:
Centros públicos
Centros privados concertados
Centros privados non concertados
A Coruña
28.354 alumnos
10.185 alumnos
975 alumnos
Lugo
7.138 alumnos
2.013 alumnos
268 alumnos
Ourense
5.659 alumnos
3.194 alumnos
144 alumnos
Pontevedra
25.073 alumnos
10.664 alumnos
997 alumnos
Total
66.224 alumnos
26.056 alumnos
2.384 alumnos
Nesta etapa educativa o alumnado non nacionalizado español incrementouse case un 9% respecto do curso anterior:
2019/20
2020/21
A Coruña
1.292 alumnos
1.407 alumnos
Lugo
531 alumnos
578 alumnos
Ourense
424 alumnos
462 alumnos
Pontevedra
1.123 alumnos
1.223 alumnos
Total
3.370 alumnos
3.670 alumnos
Bacharelato ordinario
Por outra banda os mesmos datos provisionais que manexa a Consellería, indican que 31.371 alumnos e alumnas comezarán o luns as clases de bacharelato ordinario en Galicia, o que supón que a cifra se mantén case invariable respecto do curso 2019/20.
Centros públicos
Centros privados non concertados
A Coruña
10.739 alumnos
2.629 alumnos
Lugo
2.869 alumnos
294 alumnos
Ourense
2.334 alumnos
562 alumnos
Pontevedra
10.086 alumnos
1.858 alumnos
Total
26.028 alumnos
5.343 alumnos
No caso do bacharelato ordinario o número de alumnos e alumnas sen nacionalidade española incrementouse nun 6,3%:
2019/20
2020/21
A Coruña
289 alumnos
307 alumnos
Lugo
89 alumnos
95 alumnos
Ourense
64 alumnos
68 alumnos
Pontevedra
251 alumnos
267 alumnos
Total
693 alumnos
737 alumnos
Ensinanzas de adultos
No que atinxe ás ensinanzas de réxime especial, en concreto no referido ás básicas, de secundaria e bacharelato para adultos e ao bacharelato semipresencial ou a distancia, segundo os datos provisionais o descenso do alumnado, ata os 11.378 estudantes, é do 7% respecto do curso 2019/20.
A distribución por provincias e ensinanzas no curso 2019/20 é a seguinte:
A Coruña
Lugo
Ourense
Pontevedra
Total
Ensinanzas básicas nivel I
211 alumnos
211 alumnos
28 alumnos
191 alumnos
641 alumnos
Ensinanzas básicas nivel II
218 alumnos
30 alumnos
24 alumnos
162 alumnos
434 alumnos
Ed. Secundaria adultos niveis I e II
2.030 alumnos
512 alumnos
511 alumnos
1.830 alumnos
4.883 alumnos
Bacharelato presencial
529 alumnos
47 alumnos
110 alumnos
444 alumnos
1.130 alumnos
Bacharelato semipresencial/distancia
1.584 alumnos
317 alumnos
200 alumnos
555 alumnos
2.656 alumnos
Ensinanzas non regradas
201 alumnos
355 alumnos
370 alumnos
708 alumnos
1.634 alumnos
Ensinanzas artísticas e deportivas
Pola súa banda, o número total de estudantes nas ensinanzas artísticas acada este curso os 10.488, un 1,7% menos ca no curso anterior.
En concreto, nas ensinanzas regradas de música, segundo as estimacións da Consellería, o número de alumnos será de 8.367, un 2,4 % menos ca no ano académico 2019/20:
A Coruña
Lugo
Ourense
Pontevedra
Total
Conservatorios de música e Centros autorizados de música
3.428 alumnos
1.058 alumnos
955 alumnos
2.926 alumnos
8.367 alumnos
No caso das ensinanzas regradas de danza o número de matriculados é de 349, un 3% menos ca no curso 2019/20; mentres que nas de arte dramática haberá 173 alumnas e alumnos, un 3% máis ca no ano académico anterior.
Pola súa banda o alumnado matriculado en ensinanzas profesionais de artes plásticas e deseño aumenta case un 1%, con 727 estudantes. No caso dos estudos superiores de deseño haberá 795 matriculados, un 4% máis ca no curso anterior; mentres que nos estudos superiores de conservación e restauración de bens culturais haberá 77 alumnos, 8 menos ca no 2019/20.
Finalmente, nas ensinanzas deportivas o incremento de alumnado é de case o 8%, acadando os 2.240 alumnos.
Formación Profesional
No caso da Formación Profesional a Consellería está aínda a pechar os datos de matriculación. Aínda así, a previsión inicial realizada polo departamento educativo da Xunta de Galicia é que -contando tanto os ciclos formativos en réxime ordinario e modular como a FP a distancia, a FP Dual e a nova FP Básica- o número de alumnas e alumnos sexa de arredor de 56.000, o que suporía un crecemento do 5% respecto do curso 2019/20.
Centros escolares
Os centros (públicos, concertados e privados) que imparten as devanditas ensinanzas quedan distribuídos do seguinte xeito:
A Coruña
Lugo
Ourense
Pontevedra
Galicia
Educa. Primaria e Secundaria (1)
54
25
21
64
164
C. de ESO
17
3
2
16
38
C. de ESO e ensinanzas postobrigatorias
83
35
25
70
213
C. de ensinanzas postobrigatorias
43
11
12
33
99
C. de primaria, ESO e ensinanzas postobrigatorias (1)
33
4
7
26
70
C. de adultos (2)
3
2
2
3
10
TOTAIS
233
80
69
212
594
Inclúense os centros que imparten tamén o segundo ciclo de educación infantil.
Inclúense nesta categoría os centros que imparten exclusivamente ensinanzas de adultos
Un ano máis, o Barbeira Season Fest ten que reinventarse a causa do mal tempo. A un día da celebración en Baiona do último festival de música do verán en Galicia, a organización ultima os preparativos do recinto da Península de Santa Marta.
“Fixemos un gran esforzo para cumprir estritamente as medidas de seguridade que marcan as autoridades sanitarias, temos todas as entradas vendidas, a confianza do público e as ganas dos grupos por subirse ao Escenario Mahou, a choiva non pode nin debe ser un impedimento contra todo isto. Ademais, habilitamos unha zona de carpas”, comenta o director do festival Isaac González. “Digo o mesmo que o ano pasado, cando nos veu encima aquel temporal a dous días da celebración do evento: en Galicia non se deberían suspender eventos por culpa da choiva, hai que integrala”, comenta. Ademais, González di que despois de toda a incerteza que padecemos por mor da pandemia, suspender por choiva sería absurdo. Moita xente depende disto. Hai que seguir contra vento, marea e o que faga falta”, finaliza.
Música e alta cociña
Ás 14:00 horas, ábrense as portas do recinto e a zona gastro “Aceites Abril”. Os chefs de Cociña Ourense empezarán a elaborar os seus pratos para o público que poderán comer alí mesmo a un prezo alcanzable mentres a DJ Paula Docampo arrinca a súa sesión. Ás 16:00 h. comezan os concertos no Escenario Mahou por esta orde: Ortiga, Lisasinson, La La Love You e Ginebras. Ás 22:00 horas despídese o festival de novo na zona gastro.
O Barbeira Season Fest está organizado pola promotora de eventos Elemental Street e conta co apoio do Concello de Baiona e Mahou, como patrocinadores principal, e a colaboración de Aceites Abril, Galicia Calidade, Deputación de Ourense, El Afilador e Lolea.
Utilizamos cookies para mejorar su experiencia y nuestros servicios, analizando la navegación en nuestro sitio web. Si continua navegando, consideramos que acepta su uso. Puede obtener más información pulsando aquí:.Saber MásAceptar
Cookies
Privacy Overview
This website uses cookies to improve your experience while you navigate through the website. Out of these, the cookies that are categorized as necessary are stored on your browser as they are essential for the working of basic functionalities of the website. We also use third-party cookies that help us analyze and understand how you use this website. These cookies will be stored in your browser only with your consent. You also have the option to opt-out of these cookies. But opting out of some of these cookies may affect your browsing experience.
Necessary cookies are absolutely essential for the website to function properly. This category only includes cookies that ensures basic functionalities and security features of the website. These cookies do not store any personal information.
Any cookies that may not be particularly necessary for the website to function and is used specifically to collect user personal data via analytics, ads, other embedded contents are termed as non-necessary cookies. It is mandatory to procure user consent prior to running these cookies on your website.
