A Dirección Xeral de Tráfico incluíu na lista de radares e puntos de control de velocidade o coñecido como “súper radar”, instalado na PO-340, entre Tui e Gondomar. Trátase dun dispositivo que controla a velocidade nun tramo desta estrada pontevedresa. En concreto, controla a que velocidade circulan os vehículos que pasan en ambos sentidos entre os puntos quilométricos 4.3 e 6.28.
Como funciona o súper radar?
Este dispositivo especial de control do tráfico non só vixía se os condutores superan a velocidade permitida, 60 quilómetros por hora, nese tramo de case dous quilómetros desta estrada. Tamén revisa se os condutores que circulan pola PO-340 incumpren outras normas de circulación. Este “súper radar” controla posibles adiantamentos en zonas de liña continua, o uso do móbil ao volante ou se o condutor leva posto o cinto de seguridade.
Os dous dispositivos colocados nos quilómetros 4.3 e 6.28 da PO-340 instaláronse o pasado ano e ata este mes de marzo non foron incluídos na lista de radares e puntos de control de velocidade da DXT. Un súper radar situado nunha zona con diversas curvas, onde non se poden superar os 60 quilómetros por hora. Estes novos dispositivos obrigarán os condutores a circular con aínda máis precaución e a cumprir escrupulosamente as normas de tráfico indicadas.