O Concello de Covelo convida a participar este sábado na súa festa da bicicleta. Organizada en colaboración coa Deputación de Pontevedra, a marcha ciclista arrincará ás 19:30 horas da praza Mestre Cerviño para realizar un percorrido apto para toda a familia.
Na súa aposta por fomentar os hábitos de vida saudables, o Concello convida a participar nesta cita anual na que os e as ciclistas participarán no sorteo de diferentes accesorios deportivos. Tamén se sorteará unha bicicleta e será obrigatorio o uso do casco en todo o traxecto.
Ademais de ser unha actividade deportiva, a festa da bicicleta do Concello de Covelo supón un momento de convivencia e lecer ao aire libre que tamén promove os desprazamentos en bicicleta e ofrece a oportunidade de descubrir novos recunchos da súa xeografía.