O programa da Deputación de Pontevedra “Conectadas” continúa esta semana con novas accións formativas que comezan en Cambados, Cangas, Lalín e Ponte Caldelas para un total de 70 mulleres. O programa, que arrancou a pasada semana en Rodeiro, ten como obxectivo promover a participación e a formación de máis de 4.000 mulleres de 53 concellos da provincia a través de diferentes actividades.
O martes 1 de agosto a Asociación de Veciños O Batuqueiro, de Cambados, dará o tiro de saída ao seu curso de pilates, no que participarán 22 mulleres. Neste caso, impartirase no Antigo Colexio Infantil do Sineiro todos os martes de 20:00 h a 21:30 horas. Ademais, 16 mulleres de Cangas participarán no curso de pilates, organizado pola Asociación mulleres progresistas de Darbo. Neste caso comezarán o mércores 2 de agosto e desenvolverase na Escola Vella de Darbo todos os luns, de 18:00 h a 19:00 horas, e mércores, de 11:00 h a 12:00 horas.
En Lalín, 12 mulleres da Asociación Mulleres en Igualdade de Donsión, comezan tamén o 2 de agosto a acción formativa de ximnasia hipopresiva, que terá lugar os luns e mércores de 16:30 h a 17:30 horas no Local social de Donsión. Por último, o sábado 5 de agosto serán 20 as mulleres da Asociación Mulleres Rurais de Taboadelo, en Ponte Caldelas, as que iniciarán o seu curso de pilates, do que poderán desfrutar os sábados de 10:00 h a 11:30 horas na Casa do Pobo de Taboadelo.
Este ano participarán no programa “Conectadas” 219 entidades de 53 concellos da provincia (Agolada, Arbo, Baiona, Barro, Bueu, Caldas de Reis, Cambados, Campo Lameiro, Cangas, Catoira, Cerdedo-Cotobade, Covelo, Crecente, Dozón, A Estrada, Fornelos de Montes, Gondomar, O Grove, A Guarda, A Illa de Arousa, Lalín, A Lama, Marín, Meaño, Meis, Moaña, Mondariz, Moraña, Mos, Nigrán, Oia, Pazos, Poio, Ponte Caldelas, Ponteareas, Pontevedra, Portas, Redondela, Rodeiro, O Rosal, Salceda, Salvaterra, Sanxenxo, Silleda, Soutomaior, Tomiño, Tui, Valga, Vigo, Vila de Cruces, Vilaboa, Vilagarcía e Vilanova). As entidades beneficiarias puideron escoller entre 30 obradoiros ofertados dentro de cinco bloques temáticos: “Emprende, iniciativas sostibles para o emprego”, “ExpresARTE”, “Conéctate”, “Sementa sostibilidade” e “O teu momento. Coidado e benestar”. No marco destes bloques, algunhas das actividades máis solicitadas foron as de pilates, risoterapia, ioga, alfabetización dixital I (do papel ao ordenador), ximnasia hipopresiva, artesanía en coiro, musicoterapia, pintura ou iniciación ao patchwork, entre outras. Todas as accións formativas inclúen, de forma transversal nos seus contidos, o tratamento da igualdade efectiva entre homes e mulleres e terán unha duración de 35 horas.
