10.8 C
Pontevedra
Martes, 19 de Marzo de 2024
Máis
    HomeÉ NoticiaO PSdeG advirte a PP e BNG que "terán que explicar moi...

    O PSdeG advirte a PP e BNG que “terán que explicar moi ben” o seu voto en contra da reforma das pensións

    O secretario de Emprego do PSdeG resalta o amplo acordo con axentes sociais, partidos de esquerdas e a Comisión Europea que respalda a reforma do sistema

    O secretario de emprego do PSdeG, Pedro Blanco, advertiu ao PP e ao BNG que “terán que explicar moi ben aos galegos e galegas” o seu voto en contra da reforma das pensións que garante o nivel adquisitivo de 700.000 galegos e galegas e que ten un amplo consenso político, económico e social.

    O representante do PSdeG pronunciouse respecto da convalidación do Real Decreto Lei no Congreso, da reforma das pensións realizada polo goberno de España. Resaltou que a mesma saíu dunha negociación cos axentes sociais, conta co respaldo da maioría de grupos de esquerdas presentes na cámara baixa e está avalado pola Comisión Europea.

    Subliñou tamén que “é a primeira reforma que non restrinxe dereitos, senón que os garante”, mantendo a capacidade de compra dos preto de 700.000 pensionistas que hai en Galicia ao blindar a suba das súas pensións ao cambios no prezo da vida. “Esta reforma establece un sistema para que haxa pensións os vindeiros 50 anos”, engadiu Blanco.

    Estas razóns que expoñen os socialistas a favor da reforma, son as mesmas que lles leva a pensar que os outros dous partidos con peso político en Galicia, PP e BNG, terán moi difícil explicar á cidadanía a súa posición contraria.

    No relativo aos populares, Pedro Blanco declarou que “entendemos que o PP pide a mesma solución que en Francia”, sendo esta “unha solución unilateral que revoca dereitos”. Isto ven a colación da propia defensa da reforma francesa que fixo Núñez Feijóo ante a presidenta da Comisión Europea, e de que nas reformas pasadas do goberno de Rajoy foron sempre neste sentido de empobrecer aos pensionistas.

    A posición do BNG recibiu tamén os reproches do socialista, xa que “votan en contra sen saber moi ben por que” a unha reforma na que participan os representantes dos traballadores, que é apoiada polos seus homólogos doutras partes do Estado e que garante o poder adquisitivo dos pensionistas presentes e futuros, todo isto co aval da máxima institución comunitaria europea.

    Por todo isto, Pedro Blanco concluíu asegurando que ambas formacións terán que “dar explicacións de por que non apoian un sistema de pensións público e suficiente”, algo que consideran que non comprende a maioría da cidadanía galega, especialmente sensible con este sector da poboación.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.