Máis de 450.000 galegos e galegas de entre 65 e 79 anos serán invitados a participar nun estudo sobre a vacina da gripe que vai desenvolver a Consellería de Sanidade e investigadores do Grupo de Xenética, Vacinas e enfermidades infecciosas (GENVIP) do Instituto de Investigación Sanitaria de Santiago (IDIS). O ensaio GALFLU (www.galflu.gal), un dos de maior dimensión realizado en España con vacinas, quere comprobar se a versión da vacina de alta carga da gripe (a que xa se está a empregar en maiores de 80 anos porque se comprobou que é máis eficaz nesa franxa de idade) é igualmente beneficiosa nas persoas de entre 65 e 79 anos.
Tal e como detallou durante a presentación a directora xeral de Saúde Pública, Carmen Durán, xunto a Federico Martinón, promotor e investigador principal do ensaio, convidarase a participar voluntariamente a toda a poboación galega que teña entre 65 e 79 anos e que acuda a recibir a vacina fronte a gripe como parte da campaña de vacinación anual aos grandes recintos de vacinación situados en todas as áreas sanitarias de Galicia.
A invitación a participar no estudo enviarase a través dun SMS no que se cita a persoa para a vacinación fronte a gripe e a COVID-19. No mesmo infórmase da existencia do ensaio clínico e da posibilidade de participar. Por tanto a administración das vacinas do ensaio clínico será nos grandes puntos de vacinación que pon ao dispor a Consellería de Sanidade para a campaña de vacinación fronte a gripe e a COVID-19 a partir do día 26. Existirán filas diferenciadas e persoal específico informando, sendo necesario o consentimento informado da persoa participante.
Así, “de demostrarse a hipótese de partida, os galegos desta franxa de idade serán os primeiros en poder beneficiarse desta vacina de alta carga”, segundo subliñou Federico Martinón, promotor e investigador principal do ensaio, na presentación do estudio esta mañá nos laboratorios do IDIS.
Existen diferentes tipos de vacinas fronte á gripe, e na campaña de vacinación antigripal desta tempada vanse utilizar 2 diferentes: unha de alta dose (Efluelda®) e outra de dose estándar (Influvac Tetra®). Diferéncianse na cantidade de antíxenos que inclúen, é dicir os compostos capaces de xerar protección no organismo.
A vacina de alta dose demostrou ser máis eficaz na prevención da gripe e as súas complicacións nas persoas maiores de 80 anos polo que se administra de maneira habitual neste grupo de idade. Neste estudo o que se pretende valorar é se a vacina de alta dose é máis efectiva que a vacina de dose estándar en reducir os casos de gripe, hospitalizacións e complicacións asociadas nas persoas de 65 a 79 anos nas cales de maneira rutineira administraríase a vacina fronte á gripe de dose estándar.
Por tanto, no estudo administraranse os 2 tipos de vacina fronte á gripe, a de alta dose e a de dose estándar. Ambas vacinas están comercializadas e xa se administraron a millóns de persoas. Cada persoa participante ten un 50% de posibilidades de recibir unha vacina ou outra.
Para participar no estudo é necesario ler de forma detallada a folla de información ao paciente e resolver todas as posibles dúbidas. Finalmente, no punto de vacinación, solicitaráselle ao participante que asine o documento de consentimento informado para participar no mesmo. Como con todas as demais vacinas verificarase que non existan contraindicacións para recibir a vacina da gripe.
O estudo non implica acudir a ningún seguimento clínico, xa que se obterá a información necesaria da historia clínica de cada paciente para realizar o seguimento de eficacia e seguridade, polo que non se contactará de novo co paciente. O seguimento durará ata o mes de maio posterior á campaña de vacinación. Só o equipo investigador que participa no estudo poderá acceder á historia clínica, mantendo sempre a confidencialidade.
A gripe é unha infección respiratoria de orixe vírico que produce epidemias anuais a nivel mundial. Aínda que poida afectar a calquera persoa, aquelas de 65 anos ou máis son especialmente vulnerables e presentan un maior risco de sufrir hospitalizacións e complicacións.
