A Asociación de Persoas con Discapacidade da Comarca do Baixo Miño (Vontade) está a desenvolver, en colaboración co Club Sen Amarras, xornadas inclusivas de navegación polo río Miño, nas que contribúe á difusión da contorna natural da comarca e nas que participaron máis de 100 persoas.
Estas xornadas, que se realizan co apoio da Deputación Provincial de Pontevedra no marco do proxecto Río Miño Marca Inclusiva, introducen o concepto do turismo accesible ofrecendo os recursos que garanten a igualdade de oportunidades de todas as persoas, poñendo en valor un recurso natural e medioambiental, como é o río Miño, ao grupo social das persoas con discapacidade que de forma habitual non pode acceder a este medio.
Nas mesmas tamén participa o Concello de Tomiño a través do proxecto Navegando pola historia do Baixo Miño, co obxectivo de dar a coñecer o patrimonio histórico da contorna achegándonos ao sistema de fortificacións e á historia da Guerra de Restauração que deron lugar ás mesmas.
A actividade prolongarase durante o mes de setembro, polo que as persoas e/ou entidades interesadas en participar poden contactar coa asociación Vontade no teléfono 986 62 30 44.
Dende Vontade recalcan a necesidade “de facer accesible e promocionar a comarca entre as persoas con discapacidade, cumprindo cos obxectivos de accesibilidade universal”.
