8.9 C
Pontevedra
Venres, 29 de Marzo de 2024
Máis
    HomeO CondadoPonteareasVerán 'pasado por auga' en Ponteareas co Campionato Galego de Augas Abertas...

    Verán ‘pasado por auga’ en Ponteareas co Campionato Galego de Augas Abertas e a Travesía a nado Vila do Tea

    A alcaldesa, Cristina Fernández, e concelleiro de Deporte, Miguel Bouzó, participaron no coloquio de presentación destas dúas probas

    Verán de competicións de natación en Ponteareas. A alcaldesa, Cristina Fernández, e o concelleiro de Deportes, Miguel Bouzó, participaron no coloquio de presentación do calendario de probas deportivas que o Club Natación Ponteareas celebrará na contorna natural da Freixa durante os meses estivais. Na presentación nos xardíns da empresa Sestelo estiveron acompañados polo Secretario Xeral de Deporte, José Ramón Lete; pola directora de Turismo de Galicia, Nava Castro; polo deputado de Deportes da Deputación de Pontevedra, Gorka Gómez; o vogal da Federación Galega de Natación, Santiago Escudero; o presidente do CN Ponteareas, Andrés Carrera; e o xerente da DOP Arzúa-Ulloa, Óscar Pérez.

    “Para Ponteareas é un orgullo acoller estes dous novos campionatos, uns eventos que non só realza a nosa contorna natural, senón que tamén promoven un estilo de vida saudábel e atraen visitantes de diferentes lugares”, salientou a rexedora. Cristina Fernández destacou que é ademais “unha grande oportunidade para amosar o noso compromiso co deporte e tamén co turismo, xa que estas e todas as probas que celebramos na vila xeran un grande impacto económico e fortalecen a imaxe de Ponteareas”.

    A primeira cita será o Campionato Galego de Augas Abertas o sábado 10 de xuño, unha proba que forma parte do circuíto galego de augas abertas e que estreará as competicións de natación no río Tea. Único campionato oficial que aglutina a máis de 230 nadadoras e nadadores da categoría máster e absoluto, este ano o cartel da competición recolle unha clara homenaxe ao Corpus de Ponteareas ao coincidir esta cita cunha das festas máis grandes da vila.

    Pola súa banda, o 19 de agosto é a quenda da Travesía a nado Vila do Tea, proba incluída tamén no circuíto galego e no nacional de Copa de España de Augas Abertas 2023. A cita estase a consolidar como unha das citas con máis nivel dentro do circuíto galego, xa que sempre participan destacados deportivas a nivel nacional e internacional.

    O concelleiro de Deportes, Miguel Bouzó, eloxiou o gran traballo realizado polo CN Ponteareas na organización destas dúas probas e de todos os campionatos de primeiro nivel que se celebran na vila ao longo do ano. “É un orgullo contar cun club deportivo tan comprometido co noso concello, porque a súa dedicación e esforzo son fundamentais para seguir ofrecendo experiencias deportivas únicas e atractivas para participantes e público e para seguir levando o nome de Ponteareas moi lonxe na natación”, recalcou.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.