7.6 C
Pontevedra
Venres, 29 de Marzo de 2024
Máis
    HomeBaixo MiñoO RosalO Rosal capta 150.000 euros de fondos europeos para a Escola de...

    O Rosal capta 150.000 euros de fondos europeos para a Escola de Pías

    A reforma integral da Escola Unitaria de Pías foi o primeiro gran paso na estratexia do Concello de remodelación progresiva de todos os centros do CRA María Zambrano, un investimento de arredor de 200.000 euros para os que o Goberno municipal captou fondos europeos para o seu financiamento. O Concello vén de conseguir unha subvención de case 150.000 euros para as obras de mellora de eficiencia enerxética que se realizaron na Escola de Pías, coas que se fixeron grandes esforzos para a modernización duns centros dos que a única competencia que ten é de mantemento.

    Para a alcaldesa do Rosal, Ánxela Fernández Callís, a transformación feita neste edificio construído na década dos anos 50 “é un exemplo da clara aposta que estamos facendo dende o Goberno municipal para poñer en valor a educación de proximidade e pola recuperación de inmobles de gran valor patrimonial seguindo sempre a liña da eficiencia enerxética e a sostibilidade medioambiental”.

    Por unha banda, conseguíronse máis de 130.000 euros para os traballos realizados de redución da demanda e do consumo enerxéticos, que consistiron na renovación completa do sistema do alumeado interior e da carpintería, así como das instalacións eléctricas, a instalación dun novo illamento térmico e unha nova soleira que impermeabiliza o contacto co chan ou o illamento do teito e a instalación dun sistema de protección solar.

    Para a renovacións das instalacións de xeración térmica renovable e redes de frío e calor, concedéronse case 18.000 euros destinados a financiar os traballos realizados de instalación do sistema de aerotermia con bomba de calor de alta eficiencia, de incorporación de chan radiante para substituír os radiadores eléctricos de alto consumo ou de posta en marcha dun sistema de renovación do aire interior con ventilación mecánica e recuperación de calor para garantir a calidade de aire sen gastar enerxía na climatización. Con estas medidas, o Concello conseguiu reducir ata en oito veces as emisións de CO2 ocasionadas.

    Con estas obras de melloras o Concello dá solución “aos dous buratos negros de consumo detectados na auditoría enerxética municipal, as escolas unitarias e as luminarias públicas, para as que tamén conseguimos 1,2 millóns de euros de fondos europeos para a súa renovación”, salienta a rexedora.

    Dende o Concello do Rosal fíxose un grande esforzo para captar esta subvención para investimentos a proxectos singulares locais de enerxía limpa ao abeiro da liña de axudas da DUS 5000, financiado con fondos europeos Next Generation EU no marco do Programa de Rexeneración e Reto Demográfico do Plan de Recuperación, Transformación e Resiliencia xestionado polo Instituto para a Diversificación e Aforro da Enerxía (IDAE), do Ministerio para a Transición Ecolóxica e o Reto Demográfico.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.