A II edición de O Rosal Cámara Fest rematará por todo o alto o vindeiro sábado ás 22.00 horas na praza do Calvario. A banda da Agrupación Musical do Rosal, organizadora do festival, e Big Band AMdoR tocarán as últimas notas dun ciclo que musicou todas as parroquias do municipio con 12 concertos. A entrada é de balde e pode reservarse na web do Concello, ademais, durante o espectáculo, haberá un sorteo onde se repartirán vales de compra nos comercios da Asociación de Comerciantes do Rosal.
A alcaldesa, Ánxela Fernández, destaca que “no Concello estamos encantados coa boa acollida dun festival tan ben organizado”, e pon en valor o importante que é “para O Rosal”, que “a música sexa accesible a toda a veciñanza e valorice cos seus ritmos todos os nosos espazos”. “Non podemos deixar de agradecer o traballo da Agrupación para organizar este festival”, concluíu.
No Concello destacan que a II edición remata este sábado, pero que o festival “chegou para quedarse e darlle unha nova vitalidade ás nosas rúas e á propia agrupación”. O Cámara Fest naceu o verán pasado como unha adaptación do festival de Músicos Xoves que se viña celebrando cada ano. Por mor da Covid-19 era imposible xuntar nun mesmo espazo aos máis de 70 compoñentes da banda, polo que a Agrupación decidiu modificar o formato ofrecendo concertos por ensembles instrumentais que levan o nome de persoas destacadas da entidade, como Pepe Alfonso, ou Suso González.
