O Concello do Rosal prepárase un ano máis para organizar o campamento de Nadal para que os máis cativos da casa “poidan gozar das vacacións escolares cunha morea de actividades lúdicas e educativas e axudar a rosaleiros a conciliar a vida familiar e laboral”, como explica a alcaldesa, Ánxela Fernández Callís.
O campamento desenvolverase os días 26, 27, 28 e 29 de decembro e o 2, 3, 4 e 5 de xaneiro de 08.45 a 14.15. horas e estará destinado a nenos e nenas matriculados en 4º, 5º ou 6º de Educación Infantil ou Educación Primaria neste curso escolar. O Concello abriu este mesmo luns 6 de novembro o prazo de solicitude de praza, que rematará o mércores 22 de novembro ás 14.00 horas.
Ofertaranse un total de 25 prazas, reservándose dúas para nenos e nenas que precisen dun apoio específico derivado dalgún tipo de diversidade funcional ou doutra patoloxía, e poderán optar a elas rapazada empadroada no Rosal ou non empadroada pero que o seu pai, nai, titor ou titora traballe ou posúa un negocio no Rosal. No caso de sobrar prazas, o campamento abrirase ao resto da poboación.
A actividade terá un custe de 20 euros por neno ou nena participante e as solicitudes de praza deberán presentarse con toda a documentación necesaria a través da Sede Electrónica ou de forma presencial no Rexistro do Concello. Xunto coa solicitude de participación deberá presentarse a autorización de recollida do neno ou nena menor de idade, un cuestionario de saúde e autonomía persoal, fotocopia do DNI do pai/nai/titor/titora, fotocopia do libro de familia, vida laboral actualizada e certificado de recoñecemento de discapacidade da persoa participante, de monoparentalidade ou de familia numerosa de ser o caso. O Concello elaborará unha listaxe de persoas adxudicatarias das prazas así como unha listaxe de reserva tendo en conta as diferentes circunstancias de baremación: 2 puntos por traballo de ambos membros da parella ou titores legais; un punto por traballo dun dos membros da parella; 2 puntos por pertencer a familia monoparental e 2 puntos por familia numerosa. A máxima puntuación será de 5 puntos.
