O programa ‘Educando en familia’, posto en marcha polo Concello do Rosal, continúa achegando ferramentas prácticas para a vida cotiá das familias.
Este venres 27 de maio é a quenda de ‘Ensinar a comunicar: desenvolvemento da linguaxe e prevención de dificultades’, coa logopeda Lorena Guerra.
A charla será ás 19.00 horas no Centro Social Polivalente con entrada libre ata completar aforo, aínda que pode facerse inscrición previa a través da web do Concello para asegurar a praza. Co obxectivo de facilitar a asistencia, existe un servizo de canguro cun mínimo de 5 prazas, para o que si é necesario reservar e confirmar asistencia.
A alcaldesa, Ánxela Fernández Callís anima a veciñanza a participar “nesta actividade que, sen dúbida, axudará a dar resposta a moitas das inquedanzas que nais e pais atopan a diario”.
O punto final a ciclo de encontros deste curso porase o 17 de xuño coa conferencia ‘O uso do lecer na infancia: ocios educativos e nocivos’.
