13.3 C
Pontevedra
Martes, 21 de Maio de 2024
Máis
    HomeBaixo MiñoO RosalO Concello do Rosal programa unha trintena de actividades para desfrutar da...

    O Concello do Rosal programa unha trintena de actividades para desfrutar da primavera

    Literatura, música, andainas, teatro, deporte ou festas tradicionais marcarán a axenda cultural en maio e xuño

    O Rosal prepárase para desfrutar da primavera cunha morea de actividades para todos os gustos, idades e públicos. Durante os meses de maio e xuño, o concello acollerá unha trintena de propostas nas que literatura, música, andainas, teatro, deporte ou festas tradicionais camiñarán da man para ofrecer “unha ampla programación que amosa o noso compromiso por contar cunha experiencia cultural e de lecer rica e diversa para toda a veciñanza”, como salienta a alcaldesa, Ánxela Fernández Callís.

    Tras as Festas de San Xosé Obreiro organizadas a pasada semana pola Comisión de Festas de Novás, a programación arrancou este mesmo luns 6 de maio cunha representación musicalizada de O violino de Luísa, unha homenaxe á protagonista do Día das Letras Galegas 2024, Luísa Villalta, presentando a súa biografía desde nena nunha aventura polas rúas da Coruña na procura de poesía e de música perdidas. O alumnado do CPI Manuel Suárez Marquier e do CRA María Zambrano desfrutaron desta obra no auditorio municipal e recibiron o libro de Verónica Santalices como agasallo.

    Click para ampliar

    A axenda cultural continuará esta semana coa presentación do libro Galicia para debutantes de Juan Carlos González este venres 10 de maio ás 20.00 horas na biblioteca municipal, co concerto de Abraham Cupeiro organizado pola Agrupación Musical do Rosal o sábado 11 ás 20.30 horas no auditorio e a celebración o domingo 12 da primeira edición de Rula Roupa Rosal, un novidoso mercado de roupa e complementos de segunda man.

    O Día das Letras Galegas celebrarase por todo o alto no Rosal cunha morea de actividades: ás 10.00 horas andaina e churrascada en Martín organizada pola Comisión de Festas de San Xoán, durante toda a xornada Torneo Memorial de Fútbol Iago Ameal no campo da Mata organizado pola UD Ribera e concerto do 17 de maio con Los Jinetes del Trópico ás 21.00 horas na Praza do Calvario.

    O 19 de maio chega unha nova ruta das andainas interpretativas pola Senda dos Pescadores do río Carballas e o mes de maio rematará cunha fin de semana cargada de actividade: a Festa da Crianza Xoaniñas organizada pola Asociación Xoaniñas o día 25 a partir das 11.00 horas na Área recreativa das Aceñas e a presentación do libro de Xoán Gándara Memoria dunha aldea da man da Asociación Ghorghalado na Abadía das Eiras ás 20.00 h e o día 26 Festa da ACOR cunha morea de propostas na Praza do Calvario dende as 09.00 horas.

    Xuño chegará tamén ao Rosal con moitas e moi variadas actividades para ir dando a benvida ao verán. O 6 de xuño chega con Culturactiva e Pallasos en rebeldía a obra de teatro Vía morta para o alumnado do CPI Manuel Suárez Marquier pola mañá e para o público xeral a partir das 20.30 horas no Centro Social Polivalente. Esa mesma fin de semana, o sábado 8, celebrarase o XVI Encontro Galaico Portugués de Asociacións de Espondilite no auditorio municipal de 10.00 a 14.00 horas.

    Á semana seguinte as charlas, a música, as festas e as camiñadas serán as protagonistas. O día 13 arrancan os Faladoiros no Xardín, unha serie de charlas sobre diversidade afectivo sexual e protección á infancia que se celebrarán nos xardíns do Concello ás 20.30 horas tamén os días 20 e 27 de xuño. O sábado 15 o alumnado da Escola de Música da Agrupación Musical do Rosal subiranse ao escenario do auditorio ás 12. 00 horas para unha audición e, ese mesmo día, comezan tamén as Festas de San Xoán de Martín organizadas pola Comisión de Festas e que terán lugar os días 15, 22 e 23 de xuño. O domingo 16 haberá dobrete coa andaina interpretativa polo Niño do Corvo e o Festival Musical do Coro Infantil e Combo da Agrupación Musical do Rosal ás 12.00 horas no auditorio municipal.

    O mes de xuño encara a recta final coa graduación do alumnado de 4º da ESO do CPI Manuel Suárez Marquier o día 19 ás 16.30 horas no auditorio municipal e co festival de fin de curso da Escola da Agrupación Musical do Rosal o día 22 ás 19.30 horas. A última fin de semana será a quenda da representación da obra Vila Marabilla a cargo da Escola Municipal de Teatro do Rosal o venres 28 ás 20.00 horas no auditorio municipal e o sábado 29 de xuño do X Concerto Coral Ecos do Verán de Ecos do Folón ás 20.30 horas tamén no auditorio do Rosal.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.