8.9 C
Pontevedra
Venres, 29 de Marzo de 2024
Máis
    HomeBaixo MiñoO RosalA Semana Santa chegará ao Rosal co turismo e a natureza como...

    A Semana Santa chegará ao Rosal co turismo e a natureza como protagonistas

    O Rosal prepárase para unha Semana Santa na que o turismo e a natureza serán os grandes protagonistas. O Concello porá en marcha de novo este ano visitas guiadas aos muíños de Folón e do Picón, ademais de realizar visitas guiadas ao Museo do Cabaqueiro e abrir as portas da Oficina de Información Turística para todas aquelas persoas que queiran afondar no que ver ou do que gozar durante eses días no municipio e na contorna.

    Deste xeito, en abril haberá dúas visitas guiadas aos muíños do Folón e do Picón, unha ruta a través da que todas e todos os participantes “poderán desfrutar dun percorrido no que a paisaxe natural e o patrimonio conviven en perfecto equilibrio”,  resalta a alcaldesa, Ánxela Fernández Callís. As saídas serán o xoves 6 e o venres 7 de abril con saída ás 17.00 horas dende a área de recepción dos muíños do Folón, a carón do aparcadoiro.

    Durante a Semana Santa tamén se organizarán visitas guiadas ao Museo do Cabaqueiro para todas aquelas persoas interesadas en coñecer a historia dun dos oficios máis tradicionais do Rosal. As visitas realizaranse do 3 ao 8 de abril, de luns a venres ás 11.30 horas e o sábado ás 11.30 e ás 17.30 horas. O encontro terá unha duración aproximada de 30 minutos e, ao remate, as persoas interesadas poderán visitar por libre todo o museo sen límite de tempo.

    Para completar toda a actividade turística do Rosal nestas datas, o Concello abrirá tamén as portas da Oficina de Información Turística do 3 ao 8 de abril. Situada na rúa Ramón Franco, 2, a oficina abrirá de luns a venres de 11.00 a 14.00 horas e o sábado de 11.00 a 14.00 e de 17.00 a 19.00 horas.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.