Gozar da Praza do Calvario e de toda a súa contorna durante os vindeiros dous meses. Ese é un dos obxectivos co que nace ‘Primavera na Praza’, un programa de actividades posto en marcha polo Concello do Rosal que ata xuño aglutinará numerosos e variados eventos que atraerán a todos os públicos. “Con este novo programa empregamos a cultura non só como actividade de lecer para os veciños, senón tamén como forma de convivencia e de encontro social para desfrutar do Rosal”, salienta a alcaldesa, Ánxela Fernández Callís.
As actividades arrancarán esta mesma fin de semana coa Feira do Libro o 23 de abril, toda unha xornada na que o público poderá achegarse á literatura a través de diferentes espectáculos para distintas idades. O xoves 27 de abril a Praza do Calvario acollerá a visita do foodtruck ‘Galicia sabe a mar’, co que se poderán degustar de balde produtos galegos do mar en horario de mañá e tarde.
Barafunda inaugurará o mes de maio co seu espectáculo infantil ‘Pinga-Pinga’, co que os máis pequenos e pequenas poderán aprender a facer un uso responsable da auga. Será o sábado 6 ás 12.00 horas. O seguinte sábado, 13 de abril, será a quenda do Festival da Asociación de Comerciantes do Rosal, ACOR, coa súa Feira de Oportunidades, torneo de petanca, música, comida, xogos, concursos… durante todo o día.
O Día das Letras Galegas, o 17 de maio, a Praza do Calvario acollerá ‘A Festa da nosa lingua’, unha tarde chea de actividades musicais con grupos locais coas que homenaxear tamén a Francisco Fernández del Riego. O sábado 20 de maio volven as actividades para público infantil co espectáculo de monicreques ‘Toribio de Mañón’, de Viravolta Títeres, que achegará a historia do famoso bandoleiro galego á cativada a partir das 12.00 horas.
O mes de xuño comezará coa sesión vermú o día 10 amenizada co grupo musical Tonichi&Pacheco e rematará o día 28 coa conmemoración do Día do Orgullo, na que haberá dende as 19.30 horas ‘Skeirrum’ polo centro do Calvario e a actuación musical de Terapia de Grupo.
