16.6 C
Pontevedra
Venres, 14 de Xuño de 2024
Máis
    HomeBaixo MiñoO RosalA Festa da Crianza do Rosal desafiou ao mal tempo cun grande...

    A Festa da Crianza do Rosal desafiou ao mal tempo cun grande éxito de acollida

    Xuntou nas Aceñas a nenos, nenas e maiores para desfrutar dun día en familia con actividades culturais e de lecer

    Grandísimo éxito de acollida da Festa da Crianza de Xoaninhas Crianza Respetuosa, que reuniu na área recreativa das Aceñas a nenos, nenas e maiores para celebrar un día en familia. As e os participantes desafiaron ao mal tempo para gozar dunha xornada chea de actividades e que contou tamén coa presenza de postos de artesanía e comida, así como do grupo local de apoio a Palestina, a cooperativa Miudinho e a Escola Semente de Vigo.

    A mañá comezou con bo tempo e o obradoiro de ioga deu o pistoletazo de saída ao evento cunha ampla participación. Despois, mentres a organización preparaba un xantar popular composto por arroz vexetal cociñado con produtos ecolóxicos e de proximidade, Cé Orquestra Pantasma poñía a nota musical á festa animando a grandes e pequenos a bailar e cantar. 

    Aínda que o tempo comezou a mudar e unhas nubes ameazaron con empañar a festa, pola tarde celebrouse de forma paralela o obradoiro de arxila, no que a rapazada puido plasmar a súa imaxinación no barro, e a xuntanza sobre crianza, na que participaron diferentes representantes da propia asociación, así como membros da Escola Semente de Vigo, da cooperativa Miudinho e público xeral.

    Xa durante o roteiro de exploración da natureza dirixido pola axencia ambiental Biophilia, a ameaza de choiva converteuse nun feito, obrigando ás persoas asistentes a refuxiarse e abandonar o lugar e a suspender a foliada con varios músicos de Trebón dos Xidos prevista para pechar a festa.

    A pesar do inesperado final, a festa deixou ganas de máis e con idea de repetir en vindeiras edicións. Como sinalou a alcaldesa, Ánxela Fernández Callís, “a pesar da choiva a xornada foi todo un éxito e demostrou o grande interese e compromiso de rosaleiros e rosaleiras coas iniciativas culturais e educativas”.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.