As obras da nova EDAR de Ponteareas (estación depuradora de augas residuais) acadaron un grao de execución global do 91 por cento, aínda que a porcentaxe elévase ao 96 % na actuación correspondente á depuradora, que xa iniciou a fase de posta en marcha, a cal se prolongará ata o mes de setembro.
A nova depuradora terá unha capacidade de tratamento de 8.894 m³/día e dará servizo a unha poboación de 22.522 habitantes equivalentes. Co inicio da posta en marcha das novas instalacións, deixáronse fóra de servizo as instalacións antigas, mantendo a obra civil do decantador e do biolóxico e renovando completamente os seus equipos electromecánicos. Procederase á demolición das partes que quedan fóra de servizo (principalmente o edificio de control e a liña de tratamento de lodos). Todos estes traballos na antiga EDAR finalizarán antes do mes de setembro de 2025.
Investimento entre Goberno, Xunta e Concello
A actuación está cofinanciada nun 50 % con fondos FEDER polo Goberno de España, a Consellería de Medio Ambiente e Cambio Climático da Xunta de Galicia, que achegou 2,3 millóns de euros e o resto será asumido polo Concello (4,5 millóns), pero será anticipado por ACUAES e o Concello poderá pagar a súa parte nun prazo de 25 anos.
A infraestrutura, clave para garantir un tratamento eficiente das augas residuais e cumprir coa normativa europea, conta cun investimento total de preto de 14 millóns de euros. Deste importe, ACUAES anticipará arredor de 4,5 millóns de euros correspondentes ao 32% da obra, que son responsabilidade municipal.
A partir da entrega das obras en setembro, o Concello comezará a devolución deste importe mediante anualidades de aproximadamente 268.000 euros, prolongándose ata o ano 2050.
A alcaldesa Nava Castro destacou que “este compromiso é unha mostra da responsabilidade e da visión de futuro do goberno municipal. A EDAR é unha infraestrutura imprescindible”.