18.7 C
Pontevedra
Luns, 24 de Xuño de 2024
Máis
    HomeComarcasRedondelaO Pazo de Vilavella acolle, o xoves, 'Oito olladas sobre a folga...

    O Pazo de Vilavella acolle, o xoves, ‘Oito olladas sobre a folga feminista do 8-M’

    A xira de presentación da publicación “Oito olladas sobre a folga feminista do 8 de marzo”, editada por Galaxia e froito da iniciativa da Deputación de Pontevedra, chega este xoves, 7 de febreiro, ás 20.00 horas a Redondela. Tralo aprazamento do acto unha semana para evitar a súa coincidencia co pleno municipal e trala negativa do alcalde da vila, Javier Bas, a ceder un espazo no Multiusos de Redondela para acoller esta presentación, a Deputación de Pontevedra dará a coñecer a publicación no Pazo de Vilavella.

    O goberno de Carmela Silva lamentou esta mañá que “as e os servidores públicos poñan trabas para espallar a igualdade entre a sociedade. É vergoñento que soamente tres días antes do acto, cando xa o tiñamos anunciado e difundido á opinión pública, cando ademais hai salas libres no Multiusos, o alcalde Javier Bas nos negue un espazo público para presentar esta obra. Agora non será nun espazo público pero farémolo. Este xoves ás 20.00 horas no Pazo de Vilavella de Redondela presentaremos “Oito olladas”, porque non queremos que a actitude sectaria do Partido Popular nos impida estender os principios da igualdade entre a veciñanza do concello”.

    “Oito olladas sobre a Folga Feminista do 8 de marzo” trátase dunha publicación coordinada por Inma López Silva que recompila as reflexións e vivencias de oito mulleres sobre a histórica xornada do pasado 8 M e sobre as súas propias experiencias de ser muller nunha sociedade machista. Máis polo miúdo, nesta obra colectiva recóllense as olladas de López Silva pero tamén da xuíza Paz Filgueira, da matrona Susana Iglesias, a xornalista Susana Pedreira, a profesora e fotógrafa Ana Fresco, a funcionaria Sarai González, a estudante Sandra Núñez e a libreira Mercedes Corbillón. Tres delas, Susana Pedreira, Ana Fresco e Sarai González, estarán este xoves a partir das 20.00 horas no Pazo Vilavella xunto a Inma López Silva e á presidenta da Deputación Carmela Silva.

    A obra “Oito olladas sobre a folga feminista” está colleitando un notable éxito e xa vai pola súa segunda edición. Para dala a coñecer entre a cidadanía, a institución provincial está realizando unha xira de presentación por toda a provincia que pasou xa por Vigo, Pontevedra, Vilagarcía e Baiona congregando unha elevada afluencia de público. Esta semana a xira chega a Redondela e continuará nas vindeiras por Salceda de Caselas, Ponteareas e Bueu.

    Pontevedra, 5 de febreiro de 2019

    Saúdos

    Gabinete de Prensa

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.