Alternativa Ciudadana de Ponteareas, ACiP, presentou dentro das súas propostas para as vindeiras eleccións municipais o seu Plan Estratéxico de Turismo, unha iniciativa que busca non so poñer en valor os moitos recursos turísticos cos que conta Ponteareas, senón tamén “potenciar o comercio e a hostalería de Ponteareas”. Para Juan Carlos González Carrera, a potenciación do sector turístico “aporta importantes beneficios para a economía local”.
O Plan tería como eixo central o río Tea e, dende esa perspectiva, a proposta de Alternativa Ciudadana de Ponteareas incide especialmente nas distintas praias fluviais do termo municipal. Logo de chamar a atención sobre o “estado de abandono” da Freixa, González Carrera adianta a creación dunha zona de lecer nun terreo de 25.000 metros cadrados, alén de recuperar as ruínas da primeira central hidroeléctrica do Condado”.
O plan estratéxico tamén contempla intervencións de recuperación nas praias de San Roque, A Moscadeira, unha das máis importantes por estar preto do casco urbano e onde tamén “se contempla habilitar un terreo de 20.000 metros cadrados”.
A proposta de ACiP abrangue tamén a creación de “diferentes roteiros para a práctica deportiva, con percorridos que, segundo os estudios médicos de referencia e para as distintas prácticas deportivas, roldarán entre os 45 e os 60 minutos de duración e que ben poderían denominarse “ruta do colesterol”.
Estes roteiros deportivos complementaríanse con roteiros turísticos, principalmente cerca do río e atravesando lugares de interese no concello. Neste sentido, unha das apostas máis fortes de ACiP é, segundo o seu portavoz e candidato á alcaldía, Juan Carlos González Carrera, “a que se coñece como ruta das cinco irmás, percorrido de case que 80 quilómetros de lonxitude que percorre tres concellos: Ponteareas, A Cañiza e Salvaterra. Chámase así porque pasa por cinco altos montañosos dende onde podes ver sempre os outros catro. Aquí temos que levar nós a iniciativa, pois o roteiro comeza en Ponteareas, na Ponte das Partidas, e trátase dunha aposta clara polo turismo que mestura natureza e deporte”.
Ligado ao anterior, o Plan Estratéxico de ACiP aposta tamén pola recuperación e reapertura do Cámping de A Freixa, de titularidade municipal, ou a habilitación dun aparcadoiro para autocaravanas; “un tipo de turismo crecente nos últimos anos e do que están a sacar proveito outros concellos como Mondariz, Salvaterra, As Neves ou Arbo e que aquí en Ponteareas no hai”, asegura González Carrera. Segundo o candidato de ACiP, a proposta contempla “a creación dun aparcadoiro para 25 autocaravanas, preto de Angoares e A Moscadeira, do centro urbano e da senda verde”.
