Novo recoñecemento internacional, e xa van tres, para a campaña ‘Fame de experiencias’ coa que a Deputación de Pontevedra promoveu en 2019 o destino Pontevedra Provincia. O audiovisual, producido pola empresa Esmerarte, vén de alzarse coa medalla de prata nos TV&Film Awards Festivals de New York. A Deputación e o destino foi a única representación de todo o Estado en obter o podium na modalidade de ‘Turismo’ do prestixioso festival internacional, despois de lograr entrar, xunto con Madrid, entre os 15 finalistas de entre os 50 países que competían. Trátase do terceiro recoñecemento a esta campaña, que primeiro obtivo en FITUR o premio ao mellor audiovisual, impoñéndose a 60 candidaturas e, despois en Berlín no Certame The Golden City Gate.
Para Carmela Silva esta medalla de prata nos TV & Film Awards Festivals pon en valor, “o traballo ben feito desta administración, mostra que imos no bo camiño, e premia a creatividade e talento do audiovisual da nosa provincia”. En New York, o feito de situarse entre os 15 finalistas xunto a destinos como Azerbaijan, Nova Zelanda, Dinamarca, Serbia, Grecia, Chile, Suíza, Singapur, Portugal, Noruega, Finlandia, Francia ou a propia cidade de Madrid, era xa para a presidenta da Deputación “un auténtico premio”.
“
Carmela Silva: “Representa que iamos ben encamiñados e que agora temos que seguir traballando para que despois desta situación de confinamento sexamos capaces de reinventarnos para seguir sendo un destino turístico con grande potencialidade”
Agora, esta medalla “nos sitúa como o único destino estatal en acadar o podium e temos unha excelente oportunidade de difundir o noso destino en novos mercados e representantes da industria audiovisual, influencers, cineastas e directores creativos de todo o mundo”. A presidenta da Deputación amosou a súa “enorme alegría” e subliñou que o recoñecemento manifesta o “acerto da promoción dun destino sostible, ligado ao territorio, que pon en valor a natureza, a proximidade, as persoas que forman parte do conglomerado turístico, a gastronomía, a viticultura e todas as produtoras e produtores”. Xunto a este feito, para a presidenta o galardón no festival internacional de New York tamén significa “que iamos ben encamiñados e que agora temos que seguir traballando para que despois desta situación de confinamento sexamos capaces de reinventarnos para seguir sendo un destino turístico con grande potencialidade”.
O vídeo ‘Fame de experiencias’, promove a gastronomía de excelencia da provincia de Pontevedra, poñendo en valor ás persoas produtoras e ao produto de excelencia e de calidade que se xera nunha contorna única: Rías Baixas.
