O proxecto de creación dunha páxina web, “Kukuza”, dirixida a amosar e recoñecer o esforzo das empresas en prol da sostibilidade, foi a proposta coa que o equipo EcDesign, de A Guarda, formado por Luis Eduardo Castro, Jarol Meléndez, Leticia Correa e Genoveva Sousa, se fixo co primeiro premio do concurso Desenvolvemento de Solucións Innovadoras a Retos, organizado pola Deputación de Pontevedra a través de SmartPeme. A presidenta, Carmela Silva, asistiu esta tarde na sede provincial en Vigo ao evento final do certame no que se deron a coñecer os tres equipos gañadores deste reto tecnolóxico, no que participaron máis dunha decena de persoas de distintos lugares da provincia e que, como destacou Carmela Silva, “amosou o enorme talento que neste eido temos, do que temos agora que tomar boa nota desde as administracións”.
Os equipos concursaron en liña desde o pasado 24 de xaneiro en grupos multidisciplinares de ata catro persoas, para desenvolver solucións innovadoras a través da creación dunha aplicación móbil, web ou outra plataforma tecnolóxica para dar resposta a algún destes retos: axudar na promoción da sostibilidade nas empresas; contribuír na mellora da igualdade nas empresas ou axudar no impulso do emprendemento. No acto celebrado esta tarde, os equipos presentaron as liñas xerais das súas propostas e, na súa valoración, o xurado tivo en conta a validez do modelo de negocio, a súa factibilidade, a innovación e a diferenciación do proxecto.
“
Carmela Silva: “Igualdade, sostibilidade e emprendemento son retos aos que temos que dar resposta e coas vosas propostas tedes amosado o enorme talento que hai nesta provincia no eido tecnolóxico, do que as administracións temos que tomar nota”
A presidenta, Carmela Silva, quixo subliñar a riqueza de ideas presentadas á hora de facer fronte aos retos da igualdade, sostibilidade e o emprendemento, “aos que temos que dar resposta desde a creatividade e adaptándonos a estes novos tempos nos que a evolución tecnolóxica segue o seu avance sen deterse un segundo”. “Coas propostas que tedes presentado–sinalou- amosades o enorme talento que hai nesta provincia no eido da innovación. As vosas solucións poden mellorar a vida das persoas en múltiples ámbitos, desde o empresarial ao social, sen esquecer a sostibilidade, e esa versatilidade é o exemplo no que temos que mirarnos. Temos que conseguir na nosa sociedade implementar as boas prácticas que vemos en convocatorias como esta que organizamos a través do noso programa SmartPeme, un proxecto que está axudando a fortalecer no eido dixital ás pemes e ás persoas emprendedoras desta provincia”.
Os equipos gañadores
O equipo gañador, EcDesign, apostou por dar resposta ao reto da sostibilidade. Neste senso, a idea presentada por Luis Eduardo Castro, Jarol Meléndez, Leticia Correa e Genoveva Sousa, de A Guarda, foi a creación dunha páxina web, Kukuza, dirixida a facilitar a promoción dos esforzos das empresas nesa materia e amosar indicativos dos logros das empresas nas súas páxinas web. En Kukuza as empresas poden rexistrarse e responder a unha serie de cuestionarios sobre distintas temáticas de sostibilidade e, unha vez cubertos, dáselles unha puntuación e asígnaselles un posto nun ránking, dándolles, ademais, uns selos distintivos. Este primeiro premio consiste no acceso prioritario aos programas de coworking que a Deputación desenvolverá este 2022 nos viveiros de empresas de Lalín e Barro e unha estancia nun aloxamento na provincia para as 4 persoas integrantes do equipo, valorada en 1.000 euros.
O segundo premio foi para o equipo Datasight Consulting, de Pontevedra, promovido por Laureano Fernández, que presentou o proxecto Emprende Insight para dar resposta ao reto de impulsar o emprendemento. O fixo cunha plataforma web de visualización de datos baseada en Power BI para permitir ás persoas emprendedoras e ás administracións públicas coñecer e analizar aqueles factores que inflúen no emprendemento e comprender os insights clave do comportamento e o éxito das motivacións da persoa emprendedora. O obxectivo é contribuír a favorecer a taxa de éxito do emprendemento a través dos insights obtidos dos datos de emprendemento e proporcionar a través de machine learning os factores clave que contribúan ao éxito do mesmo. O premio consiste no acceso prioritario aos programas de coworking nos viveiros de Barro e Lalín da institución provincial e nunha experiencia gastronómica na provincia para 4 persoas valorada en 500 euros.
Finalmente, o terceiro galardón foi para o equipo Axudas Familia, integrado por Begoña Estévez e Juan José González, de Vigo, que deron resposta ao reto da igualdade, cunha solución web para acompañar e axudar ás familias en todos os aspectos relacionados con trámites e axudas. É dicir, encárganse da xestión do “papeleo”, proporcionando ás mesmas experiencia e coñecemento e información. Ademais, a web inclúe un apartado con información de utilidade para persoas emprendedoras. Este premio daralles acceso aos programas de coworking nos viveiros de Barro e Lalín da Deputación e a unha experiencia de turismo activo na provincia para 4 persoas, valorada en 250 euros.
