8.7 C
Pontevedra
Xoves, 28 de Marzo de 2024
Máis
    HomeÉ NoticiaAs 'Subvencións Ágora' impulsarán proxectos en toda a provincia

    As ‘Subvencións Ágora’ impulsarán proxectos en toda a provincia

    As ‘Subvencións Ágora’, axudas do departamento de Mobilidade e Espazo Público para que os concellos redacten proxectos para recuperar a súa contorna urbana e núcleos rurais potenciando as mobilidades activas sobre as motorizadas, teñen impulsado 43 propostas de mellora no Baixo Miño en apenas dous anos e medio. Rosal, Tomiño, Tui, A Guarda e Salceda son os concellos que teñen apostado polo novo modelo de mobilidade e beneficiado do maior número de inxeccións económicas en toda a provincia.

    Para o deputado de Mobilidade Uxío Benítez a alta implicación do Baixo Miño é un éxito. Segundo asegura é fundamental que os concellos aposten pola redacción de proxectos e a planificación, xa que isto permite que teñan unha carteira de propostas listas para financiar tanto coas axudas para obras da Deputación a través do Plan Concellos, ReacPon ou outras liñas, así como con outras axudas externas, por exemplo as europeas, para cuxa consecución tamén hai asesoramento por parte da Rede Ágora. “Unha vez cos proxectos xa redactados os gobernos locais poden priorizar que obras poñen en marcha”, destacou.

    Segundo Benítez, as subvencións Ágora teñen alcanzado o 77% dos concellos e inxectado máis de 5,3 millóns de euros  en apenas dous anos e medio na provincia. “A recuperación do espazo público está na axenda política local da provincia”, dixo o nacionalista, quen destaca que os números amosan unha tendencia moi clara dos gobernos locais por planificar a recuperación do seu espazo público.

    Na terceira e última convocatoria das subvencións, de feito, en toda a provincia solicitáronse axudas para redactar 93 proxectos por parte de 37 concellos Ágora, unha cifra que esgota o orzamento de 900.000 dispoñible polo que Benítez destacou que se ampliará a partida noutros 550.000 euros para atender todas as peticións.

    Como datos globais, Benítez explicou que grazas ás axudas Ágora nos últimos dous anos estanse a impulsar 207 actuacións en 47 concellos da provincia sumando todas as convocatorias. As subvencións, así, chegaron ao 77% dos concellos da provincia, unha cifra que sube ata o 80% ao ter en conta que hai que deixar de lado a Pontevedra e Vigo por ter máis de 50.000 habitantes e non ser potenciais beneficiarios.

    En canto ao tipo de proxectos subvencionados, Benítez resaltou que moitos concellos apostaron por grandes actuacións (que recibían a contía máxima da subvención) e outros por actuacións máis modestas en pequenas prazas ou contornas rurais nas que se crearon espazos de convivencia, algo que demostra, segundo dixo, “que o modelo Ágora non é só de aplicación urbana”.

    Subliñou que, en todos os casos, os proxectos solicitantes cumpren cos requirimentos de supoñer un incremento mínimo do espazo peonil no ámbito de actuación dun 50 % con respecto ao existente na actualidade, e ter unha superficie mínima de 300 metros cadrados. No caso de creación ou mellora dun espazo segregado de circulación peonil e/ou ciclista  (sendas) todas teñen unha superficie mínima de 100 metros lineais e un largo mínimo de 2,5 metros.

    Os proxectos en carteira para o Baixo Miño

    No Baixo Miño, o Concello de Tomiño é o que maior número de axudas recibe, cun total de once. A primeira foi para as obras de mellora de mobilidade entre equipamentos da rúa República Arxentina na primeira convocatoria. Xa para proxectos, na segunda as axudas foron para o acondicionamento do torreiro de Taborda e Vilameán, para a mellora da mobildade peonil e ciclabe entre os equipamentos na avenida da República Arxentina e na avenida Ordóñez e para unha senda peonil no camiño do Alivio. Na terceira e última convocatoria, o concello socilitou axuda para proxectar un itinerario peonil na alameda de Goián, a mellora da comunicación peonil entre varios equipamentos na parroquia de Sobrada, a recuperación do espaxo público para as persoas na contorna da igrexa de Santa María de Tebra, para amobilidade peonil entre a rúa Daniel Calzado e a avaenida Baixo Miño e a recuperación e mellora da rúa Gondomar.

    No Rosal, a primeira axuda Ágora das dez totais foi para o proxecto de remodelación da Praza do Calvario, xa executada. Na segunda convocatoria as subvencións destináronse a proxectos de mellora urbana en San Miguel de Tabagón: estrada vella e rúa Santiago, recuperación da rúa Estrada e integración dos camiños de San Gregorio, mellora da calidade viaria na contorna das pozas das Pesqueiras, senda peonil en Fornelos (PO353-PO354), e rúas Jesús Noya e travesía do Casal e integración do camiño da Vila Vella. Na terceira convocatoria as peticións foron para proxectos de mellora do núcleo de San Xián, Fucheiros-A Lomba, núcleo de Pancenteo, e contorna de igrexa de San Bartolomeu.

    O Concello de A Guarda recibiu na primeira convocatoria axuda para o proxecto de humanización da rúa Joaquín Alonso; na segunda, para a urbanización da rúa Malteses, coa súa mellora de accesibilidade e seguranza viaria, e para a mellora da contorna do CEIP As Solanas. No caso da última convocatoria, as solicitudes son para proxectos de senda en Aloqueiro, no camiño Traslajo, na pista da Xunqueira, na rúa Cavacos, e para outra senda no camiño de Fonteboa dende Sextas a Baliños.

    O Concello de Tui recibiu unha primeira axuda para o proxecto para a mellora e rexeneración na Corredera e contorna; na segunda convocatoria para os proxectos de acondicionamento da igrexa de O Sagrario de Pazos de Rei, para a reforma de rúa en A Guía, na parroquia de Randufe, para a contorna da igrexa de Santiago de Baldráns, para a contorna do balneario de Caldelas, e o acondicionamento da Rúa da Barca, no Camiño Portugués a Santiago. Na terceira convocatoria, para o acondicionamento dun treito da avenida da Concordia e da conexión entre o río Miño e a PO-552 a través da igrexa de Santa Mariña.

    Os proxectos en carteira para a área de Vigo

    Na área de Vigo concedéronse axudas na segunda convocatoria ao Concello de Redondela (9 SUBVENCIÓNS), que se incorporou á Rede Ágora nos últimos meses, para o proxecto de creación dunha área de espazo público na contorna do CEIP Porto Cabeiro, para o proxecto de recuperación de espazo amable no centro de servizos de Cedeira e para a contorna do Torreiro do Vigo. Na terceira convocatoria Redondela solicitou axudas para seis proxectos: reurbanización da rúa Prego de Montaos, camiño escolar de subida a Portocabeiro, recuperación da contorna da Igrexa de Tramaño, reurbanización da rúa Muro, creación dun espazo peonil na contorna da igrexa de Ventosela e a reurbanización da rúa das Cardosas, a rúa Salgueiral e a súa continuación pola avenida.

    No Porriño (10),  o Concello recibiu unha subvención para a humanización da rúa Manuel Rodríguez na primeira convocatoria. Na segunda a axuda foi para cinco proxectos: o acondicionamento do viario paralelo á vía férrea nas proximidades do paseo do Louro, a humanización da rúa Antonio Palacios (treito rúa Cruceiro-colexio), a humanización da Rúa San Sebastián, das rúas Tarela e Navuxil, e da rúa Parque infantil no treito rúa Salgueira-Avenida Domingo Bueno. Na última convocatoria as subvencións van destinadas aos proxectos de acondicionamento da senda peonil en Centeáns (Pontellas), ao acceso peonil ás paradas do bus na zona de polígonos, á humanización da rúa Navuxil e a primeira e segunda travesía de Antonio Palacios, e a dotación de beirarrúa  (fase I) A Mota –Torneiros.

    Salceda de Caselas recibiu axuda para a reurbanización da rúa Ador na primeira convocatoria. Para a mobilidade amable da rúa Vigo, da Rúa Victoriano Pérez Vidal e o treito final da Rúa Coruña na segunda convocatoria, e ten solicitado na terceira axuda para os proxectos de recuperación de espazos públicos e creación de sendas peonís da rúa Brasil e Rosalía de Castro.

    No caso do Concello de Mos, adherido á rede apenas hai unhas semanas, a subvención da terceira convocatoria de Axudas Ágora será para a mellora da contorna da igrexa de Sanquiñeda, no barrio de Piñeiro.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.