9.6 C
Pontevedra
Xoves, 28 de Marzo de 2024
Máis
    HomeÉ NoticiaAs subvencións Ágora da Deputación alcanzan ao 77 % dos concellos da...

    As subvencións Ágora da Deputación alcanzan ao 77 % dos concellos da provincia

    “A recuperación do espazo público está na axenda política local da provincia”. Así o manifestou o deputado de Mobilidade e Espazos Públicos provincial, Uxío Benítez, ao  expoñer os datos das subvencións Ágora concedidas aos concellos para realizar actuacións de transformación urbana e gañar espazos para as persoas.

    Segundo destacou, os números amosan unha tendencia moi clara dos gobernos locais, que están a apostar por planificar a recuperación do seu espazo público. Na terceira e última convocatoria, explicou, solicitáronse axudas para redactar 93 proxectos por parte de 37 concellos Ágora, unha cifra que esgota o orzamento de 900.000 dispoñible. Neste sentido, Benítez destacou que se ampliará a partida noutros 550.000 euros para atender todas as peticións.

    “A convocatoria e o programa están a ser un éxito. A cifra de proxectos presentados foi un récord e impos suplementar o crédito para financiar todas as actuacións. Isto é síntoma de que Ágora conseguiu que recuperar o espazo público sexa máis fácil. Estamos a crear un efecto bola de neve e a converternos nun dos territorios nos que máis importancia se dá ao espazo público”, insistiu.

    Como datos globais, Benítez explicou que grazas ás axudas Ágora nos últimos dous anos estanse a impulsar 207 actuacións en 47 concellos da provincia sumando todas as convocatorias. As subvencións, así, chegaron ao 77% dos concellos da provincia, unha cifra que sube ata o 80% ao ter en conta que hai que deixar de lado a Pontevedra e Vigo por ter máis de 50.000 habitantes e non ser potenciais beneficiarios.

    En canto a investimento total, na primeira convocatoria inxectáranse 2,35 millóns de euros, que impulsaran 38 actuacións (7 obras e 31 proxectos) en 38 concellos; na segunda convocatoria 1,96 millóns de euros destinados a 76 proxectos en 26 concellos; e outros 900.213 euros, aos que se sumarán os 550.000 euros extra. Xa se está a traballar, ademais, nunha futura nova edición das subvencións.

    En canto ao tipo de proxectos subvencionados, Benítez resaltou que moitos concellos apostaron por proxectos de grandes actuacións (que recibían a contía máxima da subvención) e outros por actuacións máis modestas en pequenas prazas ou contornas rurais nas que se crearon espazos de convivencia, algo que demostra, segundo dixo, “que o modelo Ágora non é só de aplicación urbana”.

    Subliñou que, en todos os casos, os proxectos solicitantes cumpren cos requerimentos de supoñer un incremento mínimo do espazo peonil no ámbito de actuación dun 50 % con respecto ao existente na actualidade, e ter unha superficie mínima de 300 metros cadrados. No caso de creación ou mellora dun espazo segregado de circulación peonil e/ou ciclista  (sendas) todas teñen unha superficie mínima de 100 metros lineais e un largo mínimo de 2,5 metros.

    Por comarcas, no Salnés financiáronse coas ‘Subvencións Ágora’ ata agora 27 proxectos de seis concellos (Cambados, Sanxenxo, Vilagarcía, Meaño, Meis e O Grove), no Morrazo 18 proxectos de cinco concellos (Bueu, Moaña, Marín, Cangas e Vilaboa), na área de Vigo 30 proxectos de cinco concellos (Soutomaior, Redondela Mos, Porriño e Pazos), na comarca de Caldas 14 proxectos de seis concellos (Portas, Catoira, Moraña, Caldas, Valga e Pontecesures), no Val Miñor 16 proxectos en catro concellos (Baiona, Nigrán, Gondomar, Oia), no Baixo Miño 43 proxectos –o maior número da provincia- en cinco concellos (Rosal, Tui, A Guarda, Tomiño e Salceda), na comarca de Pontevedra 14 proxectos en tres concellos (Poio, Ponte Caldelas e Cerdedo Cotobade), no Deza Tabeirós 13 proxectos en cinco concellos (Silleda, Vila de Cruces, A Estrada e Lalín e Agolada, que se adheriron nos últimos meses), e no Condado Paradanta 31 proxectos en oito concellos (Ponteareas, Arbo, Mondariz Balneario, Mondariz, Salvaterra, Cañiza, Covelo e As Neves).

     “Nós estamos a axudar a impulsar o modelo e os proxectos, a axudar tecnicamente na súa concepción e tamén a financiar, xa que moitos reciben outras axudas da Deputación, non só de Ágora, senón tamén a través do Plan Concellos, ReaCPON e outros. Tamén damos asesoramento para acceder a outras liñas de financiamento europeo e de onde se poidan sumar máis cartos”, subliñou o deputado.

    Así, mesmo, e  lembrando que o obxectivo de Ágora foi dende o inicio crear un “movemento” arredor da recuperación do espazo público para convertelo en elemento central na axenda dos concellos, destacou que tamén se puxeron a disposición ferramentas formativas (Facultade Ágora), de asesoramento, ou divulgativas (#FotoÁgora), entre outras.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.