A presidenta da Deputación, Carmela Silva, presidiu hoxe unha nova xuntanza do Comité de Seguimento do COVID19 no Príncipe Felipe, no que a preparación da medida anunciada polo Goberno de España para permitir as saídas controladas dos e das menores de 14 anos foi o asunto principal. Con esa previsión, Silva encargou a elaboración dun Protocolo específico para regular, ao detalle, o xeito en que se van efectuar eses paseos por parte das nenas e nenos do Centro.
O Comité de Seguimento e o director, Manuel Cendón, quedaron encargados de dar forma ao protocolo unha vez que se aprobe o Real Decreto. O documento establecerá a adaptación da norma estatal a un Centro que, polas súas características require de pautas específicas. Na xuntanza recalcouse que o protocolo deberá ser exhaustivo: “Non debemos correr ningún risco que bote por terra o magnífico traballo feito ata o de agora, así que é a nosa obriga facer todo o posible para seguir así”, destacou Silva.
Carmela Silva aplaudiu o esforzo e dedicación de todo o persoal do Príncipe Felipe e tamén o “comportamento exemplar” das rapazas e rapaces durante todo o confinamento. “Os máis cativos están a darnos leccións dunha gran responsabilidade”. A presidenta aproveitou a xuntanza para informar de que no marco da potente campaña da Deputación con motivo do Día do Libro, que se celebra mañá, Príncipe Felipe tamén vai formar parte co agasallo dun exemplar de literatura infantil e xuvenil para cada un dos e das menores internos.
Asemade, vaise desenvolver unha campaña nas Redes Sociais da Deputación inserindo citas literarias que os nenos e nenas acheguen baixo a etiqueta “PrincipiñxsDosLibros”. Só unha hora despois de poñer a campaña en marcha, a práctica totalidade dos e das menores residentes xa amosaron as súas preferencias literarias con cómics, contos clásicos, novelas de misterio, etc.
Ademais de todo elo, valorouse a progresiva chegada de material de protección para todo o persoal, o cumprimento das normas de prevención e, finalmente, a gran acollida que tivo a medida de implantar o servizo de teleconferencia na sala de televisión para facilitar o contacto das nenas e dos nenos coas súas familias. Un cambio que, en palabras do persoal, “foi todo un acerto porque para eles e elas non é o mesmo velos pola pantalla do móbil que por un monitor de televisión e, de feito, houbo moita emoción, especialmente, por parte dos máis pequenos”.
