10.2 C
Pontevedra
Venres, 29 de Marzo de 2024
Máis
    HomeÉ NoticiaA Deputación celebrará o Día das Escritoras cun encontro literario

    A Deputación celebrará o Día das Escritoras cun encontro literario

    A sede da Deputación en Vigo celebrará o vindeiro venres, 11 de novembro, o Día das Escritoras cun encontro literario das mulleres asinantes do “Manifesto de Soutomaior”. “Imos xuntarnos ese día –informou a presidenta Carmela Silva- para tomar decisións moi relevantes e novidosas”, entre as que anunciou a posta en marcha duns premios literarios e un concurso escolar de relatos. Tamén se descubrirá a “grande sorpresa artística” coa que se conmemorará a celebración, unha escultura que se instalará no exterior da sede viguesa da institución e que tamén terá réplica nos xardíns do Pazo provincial en Pontevedra.

    Se o pasado ano o Castelo de Soutomaior foi o punto de encontro dun grupo de 19 mulleres da escrita e da cultura que, da man da Deputación de Pontevedra, celebraron por vez primeira o Día das Escritoras e culminou coa histórica sinatura do “Manifesto de Soutomaior”, neste 2022 será a sede de Vigo o escenario da xuntanza. Será un auténtico “encontro literario no que se continuarán dando pasos cara a igualdade das mulleres na escrita” detallou Carmela Silva. Así, entre as iniciativas que se van impulsar atópase a posta en marcha duns premios literarios para o 2023 cuxo nome, número de premios que se van entregar e recursos que se van destinar definiranse durante o encontro.

    Tamén durante a xuntanza acordarase o lanzamento dun concurso escolar de relatos para premiar “as mellores redaccións centradas na igualdade e na loita contra a violencia de xénero” elaboradas por alumnas/os de educación secundaria de centros educativos da provincia. Ademais, o encontro servirá para dar conta do avance da creación dunha biblioteca dixital de mulleres ou definir un concurso de composición musical centrado en poetas galegas.

    Dende hai sete anos a Biblioteca Nacional de España, en colaboración coa Asociación Clásicas y Modernas, organiza a celebración do Día das Escritoras, unha iniciativa que ten o obxectivo de reivindicar o labor e o legado das escritoras ao longo da historia.   

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.